மேஜர் கழக T20 தொடரின் இறுதிப்போட்டியில் இளம் துடுப்பாட்ட வீரர் சினெத் ஜயவர்தனவின் அதிரடியான துடுப்பாட்டத்தின் உதவியுடன் தமிழ் யூனியன் கிரிக்கெட் மற்றும் மெய்வல்லுனர் கழகம் வெற்றிபெற்று சம்பியனாக மகுடம் சூடியது.
அவிஷ்க பெர்னாண்டோ தலைமையிலான எஸ்.எஸ்.சி கழகத்தை எதிர்கொண்ட தமிழ் யூனியன் அணி 28 பந்துகள் மீதமிருக்க 7 விக்கெட்டுகள் வித்தியாசத்தில் வெற்றியினை பதிவுசெய்தது.
>> பாகிஸ்தான் செல்லும் இலங்கை இளவயது ஆடவர் கிரிக்கெட் அணி
கொழும்பு ஆர்.பிரேமதாஸ மைதானத்தில் நடைபெற்ற இந்தப் போட்டியில் நாணய சுழற்சியில் வெற்றிபெற்று முதலில் துடுப்பெடுத்தாடிய எஸ்.எஸ்.சி அணி 20 ஓவர்கள் நிறைவில் 8 விக்கெட்டுகளை இழந்து 163 ஓட்டங்களை பெற்றுக்கொண்டது.
எஸ்.எஸ்.சி அணிக்கு விஷாட் ரந்திக 68 ஓட்டங்களையும், அவிஷ்க பெர்னாண்டோ 51 ஓட்டங்களையும் பெற்றுத்தந்து மிகச்சிறந்த ஆரம்பத்தை பெற்றுக்கொடுத்த போதும், அடுத்துவந்த துடுப்பாட்ட வீரர்கள் குறைந்த ஓட்டங்களுக்குள் ஆட்டமிழந்தனர். இவர்கள் இருவரை தவிர நிபுன் தனஞ்சய மாத்திரம் இரட்டை இலக்க (12) ஓட்டங்களை பெற்றுக்கொண்டார். பந்துவீச்சில் பினுர பெர்னாண்டோ 3 விக்கெட்டுகளையும், நவோத் பரணவிதான 2 விக்கெட்டுகளையும் சாய்த்தனர்.
பதிலுக்கு துடுப்பெடுத்தாட களமிறங்கிய தமிழ்யூனியன் அணியின் ஆரம்ப துடுப்பாட்ட வீரராக களமிறங்கிய தனுக தாபரே இரண்டாவது பந்தில் ஆட்டமிழந்து வெளியேறினார்.
எனினும் இவருடன் ஆரம்ப ஜோடியாக களமிறங்கிய சினெத் ஜயவர்தன அதிரடியான துடுப்பாட்டத்தை வெளிப்படுத்தினார். இவருக்கு உதவியாக நவோத் பரணவிதானவும் சிறப்பாக ஆடினார். இவர்கள் இருவரும் இரண்டாவது விக்கெட்டுக்காக 133 ஓட்டங்களை இணைப்பாட்டமாக பெற, 3 விக்கெட்டுகளை மாத்திரம் இழந்த தமிழ் யூனியன் அணி 15.2 ஓவர்கள் நிறைவில் வெற்றியிலக்கை அடைந்து சம்பியனாக மகுடம் சூடியது.
சினெத் ஜயவர்தன வேகமாக ஆடி 32 பந்துகளில் 5 சிக்ஸர்கள் மற்றும் 9 பௌண்டரிகள் அடங்கலாக 82 ஓட்டங்களை விளாசியதுடன், நவோத் பரணவிதான ஆட்டமிழக்காமல் 38 பந்துகளில் 58 ஓட்டங்களை பெற்றுக்கொடுத்தார். பந்துவீச்சில் மல்ஷ பெர்னாண்டோ 2 விக்கெட்டுகளை வீழ்த்தினார்.
>> பாகிஸ்தான் செல்லும் இலங்கை இளவயது ஆடவர் கிரிக்கெட் அணி
இறுதிப்போட்டியில் மிகச்சிறப்பாக ஆடிய சினெத் ஜயவர்தன ஆட்டநாயகன் விருதினை வென்றதுடன், தொடரில் அதிக விக்கெட்டுகளை (17) வீழ்த்தி சிறந்த பந்துவீச்சாளராக விஜயகாந்த் வியாஸ்காந்த் தெரிவுசெய்யப்பட்டார்.
அதேநேரம் பந்துவீச்சு மற்றும் துடுப்பாட்டம் என இரண்டிலும் தொடர் முழுவதிலும் பிரகாசித்த தமிழ் யூனியன் அணியின் நவோத் பரணவிதான மதிப்புமிக்க வீரராக தெரிவுசெய்யப்பட்டதுடன், தொடரில் சினெத் ஜயவர்தனவுக்கு அடுத்தப்படியாக (372) இரண்டாவது அதிகூடிய ஓட்டங்களை பெற்ற மூவர்ஸ் கிரிக்கெட் கழகத்தின் சொஹான் டி லிவேரா (307) சிறந்த துடுப்பாட்ட வீரராக தெரிவுசெய்யப்பட்டமை குறிப்பிடத்தக்கது.
சுருக்கம்
எஸ்.எஸ்.சி – 163/8 (20) விஷாட் ரந்திக 68, அவிஷ்க பெர்னாண்டோ 51, பினுர பெர்னாண்டோ 3/22, நவோத் பரணவிதான 2/34
தமிழ் யூனியன் கிரிக்கெட் மற்றும் மெய்வல்லுனர் கழகம் – 164/3 (15.2) சினெத் ஜயவர்தன 82, நவோத் பரணவிதான 58*, மல்ஷ பெர்னாண்டோ 2/37
முடிவு – தமிழ் யூனியன் கிரிக்கெட் மற்றும் மெய்வல்லுனர் கழகம் 7 விக்கெட்டுகளால் வெற்றி
>>மேலும் கிரிக்கெட் செய்திகளைப் படிக்க<<
