கொழும்பு எப்.சியை வீழ்த்தி எட்டாவது வெற்றியை பெற்ற அப்கண்ட்ரி லயன்ஸ்

கொழும்பு சுகததாஸ அரங்கில் நடைபெற்று வரும் சுப்பர் லீக்கின் 40ஆவது போட்டியில் கொழும்பு எப்.சி அணிக்கு எதிராக 2 – 0 என்ற கோல்கள் கணக்கில் அப் கண்ட்ரி லயன்ஸ் அணி வெற்றியை பதிவுசெய்துள்ளது.

ஆரம்பம் முதல் விறுவிறுப்பாக நடைபெற்ற இந்தப் போட்டியில் இரண்டு அணிகளும் தங்களுக்கான கோல் முயற்சிகளில் ஈடுபட்டன. இதில் தோல்விகளின்றி சுப்பர் லீக்கை தொடரும் அப்கண்ட்ரி லயன்ஸ் அணி ஆதிக்கத்தை வெளிப்படுத்தியது.

>>நியூவ் யங்ஸ் அணியை 2-0 என வீழ்த்திய சீ ஹாக்ஸ் எப்.சி<<

போட்டியின் 17ஆவது நிமிடத்தில் அப்கண்ட்ரி லயன்ஸ் அணியின் முன்கள வீரர் மொஹமட் ஆகிப் பெனால்டி எல்லைக்குள் வைத்து இலகுவான கோல் வாய்ப்பொன்றினை தவறவிட்டார்.

எனினும் 21ஆவது நிமிடத்தில் மொஹமட் இஷான் பெனால்டி எல்லைக்கு வெளியிலிருந்து தட்டிக்கொடுத்த பந்தை அப்துல் ரஹ்மான் யையா, பெஞ்சமின் யோர்க்கிற்கு பரிமாற்ற, பெஞ்சமின் யோர்க் பந்தினை கோல் கம்பத்தினுள் செலுத்தி முதல் கோலை பெற்றுக்கொடுத்தார்.

இதனை தொடர்ந்து இரண்டு அணிகளும் சிறந்த போட்டித்தன்மையான ஆட்டத்தை வெளிப்படுத்தியிருந்தன. இதில் 40ஆவது நிமிடத்தில் முறையற்ற விதத்தில் பந்தினை தடுக்க முற்பட்டு, அப்கண்ட்ரி லயன்ஸ் அணியின் நவீன் ஜூட்டை வீழ்த்தியதற்காக, கொழும்பு எப்.சி அணியின் வீரர் சரித் ரத்நாயக்கவுக்கு மஞ்சள் அட்டை காட்டப்பட்டது. இந்தப் போட்டியில் ஏற்கனவே ஒரு மஞ்சள் அட்டையை பெற்றிருந்த இவர், சிவப்பு அட்டையை பெற்று, ஆட்டத்திலிருந்து வெளியேற்றப்பட்டார். எனவே 10 வீரர்களுடன் போட்டியை தொடரும் நிலை கொழும்பு எப்.சி அணிக்கு ஏற்பட, முதல் பாதி 1 – 0 என நிறைவுபெற்றது.

முதல் பாதி – அப்கண்ட்ரி லயன்ஸ் 1 – 0 கொழும்பு எப்.சி

இரண்டாவது பாதி ஆரம்பித்த பின்னர் அப்கண்ட்ரி லயன்ஸ் அணி கோல் வாய்ப்புகளை ஏற்படுத்திய போதும், கொழும்பு எப்.சி அணியின் பின்கள வீரர்கள் சிறப்பாக செயற்பட்டு அவற்றை தடுத்திருந்தனர்.

இதற்கிடையில் ஆட்டத்தின் 63ஆவது நிமிடத்தில் கொழும்பு எப்.சி அணியின் கோல் வாய்ப்பு துரதிஷ்டவசமாக தவறியிருந்தது. பெனால்டி எல்லைக்கு வெளியில் 5 மீட்டர் தூரத்திலிருந்து மொஹமட் ஷாகீல் உதைத்த பந்து வேகமாக சென்று கோல் கம்பத்தின் மேல் பகுதியில் பட்டு வெளியே சென்றது.

>>முக்கியமான வெற்றிகளுடன் தொடரும் ப்ளூ ஸ்டார் மற்றும் ரெட் ஸ்டார்!<<

பின்னர் 67ஆவது நிமிடத்தில் பெனால்டி எல்லைக்கோட்டுக்கு அருகிலிருந்து அப்கண்ட்ரி லயன்ஸ் அணியின் அப்துல் ரஹ்மான் யையா கோலை நோக்கி பந்தினை அடிக்க, அதனை கொழும்பு எப்.சி அணியின் கோல் கீப்பர் தடுத்தார். எனினும் குறித்த பந்து அவரின் கைகளிலிருந்து நழுவிய அடுத்த நொடியில் அந்த வாய்ப்பினை பயன்படுத்திய மொஹமட் ஆகிப் பந்தினை கோல் கம்பத்துக்குள் உதைத்து அணிக்கு இரண்டாவது கோலை பெற்றுக்கொடுத்தார்.

இந்த இரண்டு கோல்களை பெற்று அப்கண்ட்ரி லையன்ஸ் அணி தங்களுடைய வெற்றியினை உறுதிசெய்ததுடன், கொழும்பு எப்.சி அணியால் மீதமிருந்த நேரத்தில் கோல்களை பெற முடியவில்லை. எனவே போட்டி 2 – 0 என்ற கோல்கள் கணக்கில் நிறைவுக்கு வந்ததுடன், அப்கண்ட்ரி லயன்ஸ் அணி தங்களுடைய 8ஆவது வெற்றியையும் பெற்றுக்கொண்டது.

முழுநேரம் – அப்கண்ட்ரி லயன்ஸ் 2 – 0 கொழும்பு எப்.சி

கோல் பெற்றவர்கள் – பெஞ்சமின் யோர்க் 21’, மொஹமட் ஆகிப் 67’

>> மேலும் கால்பந்து செய்திகளுக்கு <<