சூரிச் டயமண்ட் லீக்கிலும் முதலிடம் பிடித்து சாதனை படைத்தார் ருமேஷ் தரங்க

இலங்கையின் நட்சத்திர ஈட்டி எறிதல் வீரரான ருமேஷ் தரங்க சுவிட்சர்லாந்தில் நேற்று (28) நடைபெற்ற சூரிச் டயமண்ட் லீக் தடகளத் தொடரின் ஆண்களுக்கான ஈட்டி எறிதல் போட்டியில் முதலிடத்தைப் பிடித்து மீண்டும் உலகளவில் இலங்கைக்குப் பெருமை தேடித்தந்துள்ளார்.

இப்போட்டியில் 92.07 மீற்றர் தூரத்தைப் பதிவு செய்த ருமேஷ், தொழில்முறை விளையாட்டு வாழ்க்கையில் 92 மீற்றர் எல்லையை இரண்டாவது முறையாகக் கடந்து சாதனையும் படைத்தார்.

முன்னதாக, இந்த ஆண்டின் ஜூன் மாதம் நடைபெற்ற ரோமா டயமண்ட் லீக் சுற்றில் ரூமேஷ் 92.62 மீற்றர் தூரத்தைப் பதிவு செய்து முதலிடத்தைப் பிடித்த அவர், இலங்கையின் தேசிய சாதனையை முறியடித்திருந்தமை குறிப்பிடத்தக்கது.

அதேபோல, ஈட்டி எறிதல் வரலாற்றில் 92 மீற்றருக்கும் அதிகமான தூரத்தை இரு தடவைகள் எறிந்த உலகளவில் 5ஆவது தடகள வீரர் என்ற வரலாற்றுச் சாதனையையும் ருமேஷ் படைத்துள்ளார்.

அதேபோல, இந்த வெற்றியின் மூலம், யுபுன் அபேகோனுக்குப் பிறகு டயமண்ட் லீக் இறுதிப்போட்டிக்குத் தகுதி பெற்ற இரண்டாவது இலங்கை வீரர் என்ற பெருமையையும் ருமேஷ் தரங்க பெற்றுள்ளார். இதன்படி, பெல்ஜியத்தில் செப்டெம்பர் 4, 5ஆம் திகதிகளில் நடைபெறவுள்ள ப்ரசல்ஸ்ஸ் டயமண்ட் லீக் இறுதிப் போட்டியிலும் ருமேஷ் தரங்க பங்குபற்றவுள்ளார்.

• லௌசேன் டயமண்ட் லீக்கில் சம்பியனானார் ருமேஷ் தரங்க
• பொதுநலவாய விளையாட்டு விழாவில் தங்கம் வென்று புது வரலாறு படைத்தார் ருமேஷ் தரங்க

தற்போது உலக ஈட்டி எறிதல் தரவரிசையில் முதலிடத்தில் இருக்கும் 23 வயதான ருமேஷ், அண்மையில் நிறைவடைந்த பொதுநலவாய விளையாட்டுப் விழாவிலும் 89.75 மீற்றர் தூரம் எறிந்து தங்கப் பதக்கத்தை வென்றிருந்தார்.

இப்போட்டியில் கிரெனடாவின் முன்னாள் உலக சம்பியன் ஆண்டர்சன் பீட்டர்ஸ் 86.93 மீற்றர் தூரத்தைப் பதிவு செய்து இரண்டாம் இடத்தையும், போலந்தின் டேவிட் வேக்னர் 85.16 மீற்றர் தூரத்துடன் மூன்றாம் இடத்தையும் பிடித்தனர். அதேபோல, 2012 லண்டன் ஒலிம்பிக் சம்பியனான டிரினிடாட் மற்றும் டொபாகோவின் கெஷோர்ன் வோல்கட் (83.02 மீற்றர்) நான்காம் இடத்தையும், கென்யாவின் ஜூலியஸ் யேகோ (81.66 மீற்றர்) ஐந்தாம் இடத்தையும் பெற்றனர். மறுபுறத்தில் இந்தியாவின் நீரஜ் சோப்ரா இந்தப் போட்டியில் பங்கேற்கவில்லை.

இந்த வெற்றியின் மூலம் ருமேஷ் தரங்க இந்த ஆண்டில் தனது தொடர்ச்சியான சிறந்த திறமையை மீண்டும் உறுதிப்படுத்தியுள்ளார். அவர் இந்த ஆண்டில் பங்கேற்ற 12 போட்டிகளில் 11 இல் வெற்றி பெற்றுள்ளதோடு, அதில் தொடர்ச்சியான 6 வெற்றிகளும் அடங்கும். மேலும், ரோமா, ஒஸ்ட்ராவா மற்றும் டோஹா டயமண்ட் லீக் சுற்றுகளின் வெற்றிகளையும் ருமேஷ் இந்த ஆண்டில் தனதாக்கியுள்ளார் என்பது குறிப்பிடத்தக்கது.

>>மேலும் பல மெய்வல்லுனர் செய்திகளைப் படிக்க<<