இரண்டாவது அணியாக LPL 2026 இறுதிப் போட்டியில் கோல் கெலன்ட்ஸ்

கொழும்பு ஆர். பிரேமதாச சர்வதேச கிரிக்கெட் மைதானத்தில் நேற்று (07) நடைபெற்ற லங்கா பிரீமியர் லீக் (LPL) 2026 தொடரின் இரண்டாவது கொலிபையர் (Qualifier 2) போட்டியில் கொழும்பு கேப்ஸ் அணியை 6 விக்கெட்டுகள் வித்தியாசத்தில் வீழ்த்தி கோல் கெலன்ட்ஸ் அணி இறுதிப்போட்டிக்கு தகுதி பெற்றுள்ளது.

>>2025ஆம் ஆண்டுக்கான டயலொக் கிரிக்கெட் விருதுகள் அறிவிப்பு<<

இரண்டாவது குவாலிபையர் போட்டிக்கு கொழும்பு கேப்ஸ், எலிமினேட்டர் மோதலில் கண்டி ரோயல்ஸை வீழ்த்தி தெரிவாக, கோல் கெலன்ட்ஸ் தமது முதல் கொலிபையர் மோதலில் ஜப்னா கிங்ஸ் அணியிடம் தோல்வியினைத் தழுவியதன் காரணமாக இரண்டாவது கொலிபையர் போட்டியில் ஆடும் வாய்ப்பினை முன்னதாகப் பெற்றிருந்தது.

போட்டியின் நாணயச் சுழற்சியில் வென்று முதலில் துடுப்பெடுத்தாடிய கொழும்பு கேப்ஸ் அணி, தொடக்கத்தில் விக்கெட்டுகளை இழந்து தடுமாறியது. ஒரு கட்டத்தில் 52 ஓட்டங்களுக்கு 5 விக்கெட்டுக்களை இழந்த அவ்வணிக்கு ரூபின் ஹெர்மன் மற்றும் ரவிந்து பெர்னாண்டோ கைகொடுக்க கொழும்பு கேப்ஸ் 18.5 ஓவர்களில் அனைத்து விக்கெட்டுகளையும் இழந்து 176 ஓட்டங்கள் பெற்றது.

கொழும்பு கேப்ஸ் துடுப்பாட்டத்தில் ரவிந்து பெர்னாண்டோ 5 சிக்ஸர்கள் மற்றும் ஒரு பௌண்டரி அடங்கலாக 27 பந்துகளுக்கு 48 ஓட்டங்கள் பெற்றார். ரூபின் ஹெர்மன் 33 பந்துகளில் 2 சிக்ஸர்கள் மற்றும் 3 பெளண்டரிகள் அடங்கலாக 45 ஓட்டங்கள் எடுத்தார்.

>>இலங்கை டெஸ்ட் தொடரில் இவ்வாரம் இணையும் சுதர்ஷன்<<

கோல் கெலன்ட்ஸ் பந்துவீச்சில் சரித் அசலங்க மற்றும் சசிந்து கொலம்பகே ஆகியோர் தலா 2 விக்கெட்டுக்கள் வீதம் வீழ்த்தினர்.

பின்னர் 177 ஓட்டங்கள் என்ற இலக்கை நோக்கிப் பதிலுக்கு ஆடிய கோல் கெலன்ட்ஸ் அணிக்காக சேம் ஹார்பர் மற்றும் சரித் அசலங்க ஜோடி அபாரமான ஆட்டத்தை வெளிப்படுத்தியது. இதனால் கோல் கெலன்ட்ஸ் போட்டியின் வெற்றி இலக்கினை 18.4 ஓவர்களில் 4 விக்கெட்டுக்களை மாத்திரம் இழந்து 177 ஓட்டங்கள் எடுத்து அடைந்து கொண்டது.

கோல் கெலன்ட்ஸ் வெற்றியினை உறுதி செய்த சேம் ஹார்பர் 51 பந்துகளில் 4 பௌண்டரிகள் மற்றும் 4 சிக்ஸர்கள் அடங்கலாக 77 ஓட்டங்கள் குவித்து ஆட்டநாயகன் விருதை வென்றார். அவருக்குத் துணையாகச் செயல்பட்ட சரித் அசலங்க 42 பந்துகளில் 4 சிக்ஸர்கள் மற்றும் 3 பௌண்டரிகள் அடங்க 59 ஓட்டங்கள் குவித்தார்.

இப்போட்டியில் வென்றிருக்கும் கோல் கெலன்ட்ஸ் அணி, இறுதிப்போட்டியில் இன்று (08) ஜப்னா கிங்ஸ் அணியை எதிர்கொள்கின்றது. அதேநேரம் போட்டியில் தோல்வியினைத் தழுவிய கொழும்பு கேப்ஸ் LPL தொடரில் இருந்து வெளியேறும் மூன்றாவது அணியாக மாறுகின்றது.

>> மேலும் கிரிக்கெட் செய்திகளைப் படிக்க<<