ஜப்னா கிங்ஸ் அணியிடம் படுதோல்வியடைந்த கண்டி ரோயல்ஸ்

லங்கா பிரீமியர் லீக் (LPL) 2026 தொடரின் 13ஆவது போட்டியில் கண்டி ரோயல்ஸ் அணியை 93 ஓட்டங்கள் வித்தியாசத்தில் வீழ்த்தி ஜப்னா கிங்ஸ் அணி அபார வெற்றி பெற்றுள்ளது.

>>தம்புள்ளை சிக்ஸர்ஸை வீழ்த்தி வெற்றியோட்டத்தை தொடரும் கொழும்பு கேப்ஸ்

முன்னதாக தம்புள்ளையில் ஆரம்பமாகிய இந்தப் போட்டியின் நாணய சுழற்சியில் வென்று முதலில் துடுப்பாடிய ஜப்னா கிங்ஸ் அணி நிர்ணயிக்கப்பட்ட 20 ஓவர்களில் 4 விக்கெட்டுகள் இழப்பிற்கு 199 ஓட்டங்கள் குவித்தது.

ஆரம்பம் முதலே கண்டி பந்துவீச்சை துவம்சம் செய்த ஆரம்பவீரர்களான அவிஷ்க பெர்னாண்டோ மற்றும் கமில் மிஷார ஜோடி முதல் விக்கெட்டுக்கு 129 ஓட்டங்கள் இணைப்பாட்டமாக பெற்றது. இதில் அவிஷ்க பெர்னாண்டோ 36 பந்துகளில் 10 பௌண்டரிகள் மற்றும் 2 சிக்ஸர்களுடன் 66 ஓட்டங்களை விளாசினார்.

மறுமுனையில் சிறப்பான ஆட்டத்தை வெளிப்படுத்திய கமில் மிஷார 53 பந்துகளில் 6 பௌண்டரிகள், 4 சிக்ஸர்களுடன் 78 ஓட்டங்கள் குவித்தார்.

கண்டி ரோயல்ஸ் பந்துவீச்சு சார்பில் ஷஹீன் அப்ரிடி சிறப்பாக பந்துவீசி 4 ஓவர்களில் 27 ஓட்டங்கள் விட்டுக்கொடுத்து 3 விக்கெட்டுகளைக் கைப்பற்றினார்.

>>விஷ்மி – ஹர்ஷிதாவின் அபார சதங்களால் பாகிஸ்தானை வீழ்த்தியது இலங்கை<<

பின்னர் 200 ஓட்டங்கள் என்ற கடின வெற்றி இலக்கை நோக்கி களமிறங்கிய கண்டி ரோயல்ஸ் அணி, ஜப்னா கிங்ஸ் அணியின் பந்துவீச்சை எதிர்கொள்ள முடியாமல் தடுமாறியதுடன், 18.2 ஓவர்களில் 106 ஓட்டங்களுக்கு அனைத்து விக்கெட்டுகளையும் இழந்து போட்டியில் படுதோல்வியடைந்தது.

கண்டி துடுப்பாட்டத்தில் ஆரம்பவீரரான லஹிரு உதார தவிர மற்ற வீரர்கள் மிகவும் சொற்ப ஓட்டங்களில் ஆட்டமிழந்தனர். லஹிரு உதார 41 பந்துகளில் 6 பௌண்டரிகள், 2 சிக்ஸர்களுடன் 54 ஓட்டங்கள் எடுத்தார்.

மறுமுனையில் ஜப்னா பந்துவீச்சாளர்களில் துனித் வெல்லாலகே மற்றும் மொஹமட்  சிராஸ் ஆகியோர் அபாரமாக செயற்பட்டு தலா 3 விக்கெட்டுக்கள் வீதம் கைப்பற்றினர். ஜப்னா அணியின் கமில் மிஷார போட்டியின் ஆட்ட நாயகனாகத் தெரிவு செய்யப்பட்டார்.

>>மேலும் கிரிக்கெட் செய்திகளைப் படிக்க <<