தம்புள்ளை சிக்ஸர்ஸை வீழ்த்தி வெற்றியோட்டத்தை தொடரும் கொழும்பு கேப்ஸ்

தம்புள்ளை மைதானத்தில் நடைபெற்று முடிந்திருக்கும் லங்கா ப்ரீமியர் லீக் 11ஆவது லீக் மோதலில், கொழும்பு கேப்ஸ் 21 ஓட்டங்களால் தம்புள்ளை சிக்ஸர்ஸ் அணியை வீழ்த்தியுள்ளது.

>>விஷ்மி – ஹர்ஷிதாவின் அபார சதங்களால் பாகிஸ்தானை வீழ்த்தியது இலங்கை<<

தம்புள்ளையில் நேற்று (25) ஆரம்பமாகிய இந்தப் போட்டியில் நாணய சுழற்சி முடிவடிப்படையில் முதலில் துடுப்பெடுத்தாடிய கொழும்பு கேப்ஸ் அணி, நிர்ணயிக்கப்பட்ட 20 ஓவர்களில் 5 விக்கெட் இழப்புக்கு 197 ஓட்டங்கள் பெற்றது.

கொழும்பு அணியின் தலைவர் கமிந்து மெண்டிஸ் மிகச் சிறப்பாகவும் அதிரடியாகவும் விளையாடி, வெறும் 39 பந்துகளில் 88 ஓட்டங்களை விளாசி இறுதிவரை ஆட்டமிழக்காமல் களத்தில் நின்றார். இதில் 9 பெளண்டரிகளும், 4 சிக்ஸர்களும் அடங்கும். இவருக்கு உறுதுணையாக ஆரம்ப வீரர் ரூபின் ஹேர்மன் 24 பந்துகளில் 39 ஓட்டங்களை எடுத்து வலுவான அடித்தளத்தை அமைத்துக் கொடுத்திருந்தார்.

பின்னர் 198 ஓட்டங்கள் எடுத்தால் வெற்றி என்ற கடினமான இலக்குடன் களமிறங்கிய தம்புள்ளை சிக்ஸர்ஸ் அணி, ஆரம்பம் முதலே வெற்றிக்குக் கடுமையாகப் போராடியது. இருப்பினும், கொழும்பு கேப்ஸ் அணியின் சிறப்பான மற்றும் கட்டுக்கோப்பான பந்துவீச்சை எதிர்கொள்ள முடியாமல் ஓட்டங்களைக் குவிக்கத் திணறியது.

இறுதியில் தம்புள்ளை சிக்ஸர்ஸ் வீரர்கள் 20 ஓவர்கள் முடிவில் 8 விக்கெட்டுக்களை இழந்து 176 ஓட்டங்களை மட்டுமே எடுத்தனர். தம்புள்ளை துடுப்பாட்டத்தில் பவன் ரத்நாயக்க 30 பந்துகளில் ஒரு சிக்ஸர் மற்றும் 6 பெளண்டரிகள் அடங்கலாக 50 ஓட்டங்கள் எடுத்தார். மார்கஸ் ஏக்கர்மன் 33 பந்துகளில் 40 ஓட்டங்கள் எடுத்தார்.

கொழும்பு கேப்ஸ் பந்துவீச்சில் சாஹ்நவாஸ் தஹானி மற்றும் முஜிபுர் ரஹ்மான் ஆகியோர் தலா 2 விக்கெட்டுக்கள் வீதம் கைப்பற்றினர்

>>தசுன் ஷானக்கவின் போராட்டம் வீண்; கண்டி ரோயல்ஸ் வெற்றி<<

அதிரடியாக விளையாடி 88 ஓட்டங்களைக் குவித்த கமிந்து மெண்டிஸ், போட்டியின் ஆட்டநாயகனாக தெரிவானார். இப் போட்டியின் வெற்றியோடு கொழும்பு கேப்ஸ் தொடரில் தமது மூன்றாவது வெற்றியினையும், இரண்டாவது தொடர் வெற்றியையும் பதிவு செய்துள்ளது.

>>மேலும் கிரிக்கெட் செய்திகளைப் படிக்க <<