T20 உலகக் கிண்ணத் தொடரில் இருந்து விலகும் வனிந்து ஹஸரங்க

கடந்த ஞாயிற்றுக்கிழமை (08) அயர்லாந்துக்கு எதிராக நடைபெற்ற T20 உலகக் கிண்ணப் போட்டியில் ஏற்பட்ட தசை உபாதை காரணமாக இலங்கை அணியின் நட்சத்திர சுழல் சகலதுறை வீரரான வனிந்து ஹஸரங்க, T20 உலகக் கிண்ணத் தொடரில் இருந்து விலகியுள்ளார்.

>>வளர்ந்து வரும் ஆசியக் கிண்ணத்தில் களமிறங்கும் இலங்கை மகளிர் குழாம் அறிவிப்பு

அதன்படி தான் உபாதைக்குள்ளான அயர்லாந்து போட்டியில் தனது பந்துவீச்சு பெறுதியினை பூர்த்தி செய்திருந்த வனிந்து ஹஸரங்க 4 ஓவர்களில் 25 ஓட்டங்களுக்கு 3 விக்கெட்டுகளை வீழ்த்தி இலங்கை அணியின் வெற்றியினை உறுதி செய்வதில் முக்கிய பங்காற்றியிருந்தார்.

இந்த நிலையில் திங்கட்கிழமை வனிந்து ஹஸரங்கவிற்கு மேற்கொள்ளப்பட்ட MRI பரிசோதனையில் அவரின் இடது தொடைத்தசையில் உபாதை ஏற்பட்டிருப்பது உறுதி செய்யப்பட்டுள்ளது.

வனிந்து ஹஸரங்கவின் மருத்துவ அறிக்கை பிரிட்டனில் உள்ள ஒரு நிபுணரால் ஆய்வு செய்யப்பட்டதைத் தொடர்ந்து, செவ்வாய்க்கிழமை அவர் தொடரிலிருந்து விலகுவதாக அறிவிக்கப்பட்டது.

ஹஸரங்கவின் உபாதை அவரது முந்தைய தொடைத் தசை உபாதையுடன் தொடர்புடையது என்று கருதப்பட்டாலும், அது பழைய காயத்தின் நேரடித் தொடர்ச்சி அல்ல எனவும் குறிப்பிடப்பட்டுள்ளது.

ஹஸரங்கவுக்குப் பதிலாக துஷான் ஹேமன்தவை இலங்கை குழாத்தில் உள்வாங்க தீர்மானம் மேற்கொள்ளப்பட்டிருப்பதாக கூறப்பட்டிருக்கின்ற போதும் அதற்கு ஐ.சி.சி இன்னும் அனுமதி அளிக்கவில்லை சுட்டிக்காட்டப்பட்டுள்ளது.

31 வயது நிரம்பிய துஷான் ஹேமன்த உள்ளூர் போட்டிகளில் பிரகாசித்திருக்கின்ற போதும் சர்வதேச அளவில் அவருக்கு மிகக்குறைந்த வாய்ப்புகளே கிடைத்துள்ளன. இதுவரை மூன்று T20 போட்டிகளில் மாத்திரம் விளையாடியுள்ள அவர் நான்கு விக்கெட்டுகளை மாத்திரமே வீழ்த்தியுள்ளார்.

அதேநேரம் ஹஸரங்கவின் விலகல் இலங்கை அணிக்கு இந்த T20 உலகக் கிண்ணத்தில் பாரிய பின்னடைவாகும். அதேவேளை இலங்கை அணி தனது இரண்டாவது லீக் போட்டியில் ஓமானை பெப்ரவரி 12ஆம் திகதி பல்லேகலையில் வைத்து எதிர்கொள்கின்றது.

Insert this link with below caption – மேலும் கிரிக்கெட் செய்திகளைப் படிக்க – www.thepapare.com/tamil/cricket