இலங்கையிலும், இந்தியாவிலும் கூட்டாக நடத்தப்படும் பத்தாவது ஐசிசி ஆடவர் T20 உலகக் கிண்ண கிரிக்கெட் தொடரின் ஆரம்பப் போட்டியை மைதானத்திற்குச் சென்று நேரடியாகக் காண்பதற்கு பொதுமக்களுக்கு இலவச அனுமதி வழங்கப்பட்டுள்ளது.
நாளை (பெப்ரவரி 7) கொழும்பு எஸ்.எஸ்.சி (SSC) மைதானத்தில் நடைபெறவுள்ள இம்முறை T20 உலகக் கிண்ணத் தொடரின் முதல் போட்டியில் பாகிஸ்தான் மற்றும் நெதர்லாந்து அணிகள் மோதவுள்ளன. இப்போட்டியைக் காண்பதற்காக மைதானத்தின் 5 மற்றும் 7 ஆம் இலக்க நுழைவாயில்கள் காலை 9:30 மணி முதல் பொதுமக்களுக்காகத் திறந்து வைக்கப்படும் என அறிவிக்கப்பட்டுள்ளது.
இதனிடையே, கொல்கத்தா, ஈடன் கார்டன் மைதானத்தில் நாளை (7ஆம் திகதி) பிற்பகல் 3.00 மணிக்கு மேற்கிந்திய தீவுகள் மற்றும் ஸ்கொட்லாந்து அணிகள் 2ஆவது போட்டியில் மோதவிருப்பதோடு, இரவு 7.00 மணிக்கு ஆரம்பமாகும் 3ஆவது போட்டியில் இந்தியா மற்றும் அமெரிக்க அணிகள் மோதவுள்ளன.
அதேபோல, ஐசிசி T20 உலகக் கிண்ணத் தொடரின் பிரம்மாண்ட தொடக்க விழா நாளை இரவு 7.00 மணிக்கு மும்பையில் ஆரம்பமாகவுள்ளது. இத்தொடரின் ஆரம்பத்தை சிறப்பிக்கும் வகையில் கண்ணைக் கவரும் இசை மற்றும் நடன நிகழ்ச்சிகள் பல ஏற்பாடு செய்யப்பட்டுள்ளன.
பிரபல கலைஞர்களான ரிஷப் சர்மா, சிவமணி மற்றும் பாட்ஷா (Badshah) ஆகியோரின் இனிமையான இசை மைதானம் எங்கும் எதிரொலிக்க, அதனைத் தொடர்ந்து பிரபல நடிகை நோரா ஃபதேஹியின் (Nora Fatehi) கண்கவர் நடனத்துடன் இவ்விழா களைகட்டும்.
- T20 உலகக் கிண்ணத்துக்கான டிக்கெட் விற்பனை நிலையங்கள் திறப்பு
- T20 உலகக் கிண்ணத்தில் முக்கிய வேகப்பந்துவீச்சாளரினை இழக்கும் அவுஸ்திரேலியா
இவ்விழாவின் விசேட அம்சமாக, வானில் மிதந்து வரும் நபர் ஒருவர் மூலம் உலகக்கிண்ணம் வான்கடே மைதானத்திற்குள் கொண்டு வரப்படும். சர்வதேச கிரிக்கெட் பேரவையின் தலைவர் ஜெய் ஷா மற்றும் கடந்த 2024 T20 உலகக்கிண்ணத்தை வென்ற இந்திய அணியின் முன்னாள் தலைவர் ரோஹித் சர்மா ஆகியோர் மைதானத்தில் உலகக் கிண்ணத்தை வரவேற்பதற்கு தயாராக இருப்பார்கள்.
T20 கிரிக்கெட்டின் வேகம் மற்றும் உத்வேகத்தை வெளிப்படுத்தும் வகையில் இம்முறை தொடக்க விழா வடிவமைக்கப்பட்டுள்ளது. இதற்காக முழு வான்கடே மைதானமும் ஒரு பிரம்மாண்ட காட்சித் தளமாக (Visual Canvas) பயன்படுத்தப்படவுள்ளதுடன், தொடரின் அதிகாரப்பூர்வ இலச்சினை பிரதான மேடையில் மின்னொளியில் பிரதிபலிக்கச் செய்யப்படும்.
இந்த கலைநிகழ்ச்சிகளைத் தொடர்ந்து, இந்திய மற்றும் இலங்கை நேரப்படி இரவு 7.00 மணிக்கு வண்ணமயமான வாணவேடிக்கை நிகழ்வு இடம்பெறும். அதனைத் தொடர்ந்து, இந்தியா மற்றும் அமெரிக்கா அணிகளுக்கு இடையிலான போட்டி ஆரம்பமாகவுள்ளது.
>>மேலும் கிரிக்கெட் செய்திகளைப் படிக்க<<
