சுற்றுலா ஆப்கான் மற்றும் இலங்கை அணிகள் இடையில் நடைபெற்று வரும் டெஸ்ட் போட்டியின் இரண்டாம் நாள் ஆட்டநிறைவில் இலங்கை கிரிக்கெட் அணியானது அஞ்செலோ மெதிவ்ஸ் மற்றும் தினேஷ் சந்திமால் ஆகியோரது சதங்களோடு வலுப் பெற்றிருக்கின்றது.
கொழும்பு SSC மைதானத்தில் நடைபெற்று வரும் இந்த டெஸ்ட் போட்டியின் முதல் நாள் ஆட்டநிறைவில் ஆப்கானிஸ்தான் அணியின் முதல் இன்னிங்ஸ் (198) துடுப்பாட்டத்தை அடுத்து தமது முதல் இன்னிங்ஸ் துடுப்பாட்டத்தினை தொடங்கிய இலங்கை அணியானது 80 ஓட்டங்களுக்கு விக்கெட் இழப்பின்றி காணப்பட்டது. களத்தில் ஆட்டமிழக்காது இருந்த நிஷான் மதுஷ்க 36 ஓட்டங்களுடனும், திமுத் கருணாரட்ன 42 ஓட்டங்களுடனும் காணப்பட்டிருந்தனர்.
இன்று போட்டியின் இரண்டாம் நாள் ஆட்டத்தில் 118 ஓட்டங்கள் பின்தங்கியவாறு தமது முதல் இன்னிங்ஸ் துடுப்பாட்டத்தினை தொடர்ந்த இலங்கை அணி இரண்டாம் நாளின் மதிய போசணத்திற்கு முன்னதாக நிஷான் மதுஷ்க, திமுத் கருணாரட்ன மற்றும் குசல் மெண்டிஸ் ஆகியோரது விக்கெட்டுக்களைப் பறிகொடுத்தது. இதில் நிஷான் மதுஷ்க 37 ஓட்டங்கள் பெற்றிருக்க, குசல் மெண்டிஸ் வெறும் 10 ஓட்டங்களுடன் ஆட்டமிழந்து ஏமாற்றம் தந்தார். எனினும் திமுத் கருணாரட்ன தன்னுடைய 35ஆவது டெஸ்ட் அரைச்சதத்தோடு 72 பந்துகளில் 12 பௌண்டரிகள் அடங்கலாக 77 ஓட்டங்கள் பெற்றார்.
இதன் பின்னர் இலங்கை அணியின் நான்காம் விக்கெட்டுக்காக பொறுப்புடன் இணைப்பாட்டம் ஒன்றை உருவாக்கத் தொடங்கிய அஞ்செலோ மெதிவ்ஸ் – தினேஷ் சந்திமால் ஜோடி நான்காம் விக்கெட் இணைப்பாட்டமாக 232 ஓட்டங்களைப் பகிர்ந்ததோடு அது இலங்கை அணி முதல் இன்னிங்ஸில் வலுப்பெறவும் உதவியது.
இதனையடுத்து இலங்கை அணியின் நான்காம் விக்கெட்டாக தினேஷ் சந்திமால் ஆட்டமிழந்தார். தினேஷ் சந்திமால் ஆட்டமிழக்கும் போது அவரின் 15ஆவது டெஸ்ட் சதத்தோடு ஒரு சிக்ஸர் 10 பௌண்டரிகள் அடங்கலாக 107 ஓட்டங்கள் பெற்றார்.
தொடர்ந்து அஞ்செலோ மெதிவ்ஸ் அபார ஆட்டத்தோடு இலங்கை அணியானது இரண்டாம் ஆட்டநிறைவில் 410 ஓட்டங்களுக்கு 6 விக்கெட்டுக்களை இழந்து காணப்படுகின்றது. களத்தில் ஆட்டமிழக்காது நிற்கும் சதீர சமரவிக்ரம 22 ஓட்டங்களுடன் காணப்பட, இரண்டாம் நாள் ஆட்டநிறைவின் போது ஆட்டமிழந்த அஞ்செலோ மெதிவ்ஸ் 14 பௌண்டரிகள் மற்றும் 3 சிக்ஸர்கள் அடங்கலாக 141 ஓட்டங்கள் பெற்றிருந்தார். அத்துடன் இது அஞ்செலோ மெதிவ்ஸின் 16 டெஸ்ட் சதமாகவும் மாறியது.
