சுற்றுலா மேற்கிந்திய தீவுகள் மற்றும் இலங்கை அணிகளுக்கு இடையில் நடைபெற்றுவரும் முதல் டெஸ்ட் போட்டியின், முதல் நாள் ஆட்டநேர நிறைவில், இலங்கை அணி திமுத் கருணாரத்னவின் சதத்தின் உதவியுடன், 3 விக்கெட்டுகளை இழந்து 267 ஓட்டங்களை பெற்றுக்கொண்டுள்ளது.
காலி சர்வதேச கிரிக்கெட் மைதானத்தில் நடைபெற்றுவரும் இந்த போட்டியின் நாணய சுழற்சியில் வெற்றிபெற்ற இலங்கை அணித்தலைவர் திமுத் கருணாரத்ன முதலில் துடுப்பெடுத்தாடுவதற்கு தீர்மானித்தார்.
அதன்படி களமிறங்கிய இலங்கை அணிக்கு மிகச்சிறந்த ஆரம்பத்தினை திமுத் கரணாரத்ன மற்றும் பெதும் நிஸ்ஸங்க ஆகியோர் பெற்றுக்கொடுத்தனர். இவர்கள் இருவரும் மதியபோசன இடைவேளைவரை விக்கெட்டினை விட்டுக்கொடுக்காமல் துடுப்பெடுத்தாட, இலங்கை அணி விக்கெட்டிழப்பின்றி 61 ஓட்டங்களை பெற்றுக்கொண்டது. இதன்போது திமுத் கருணாரத்ன 32 ஓட்டங்களையும், பெதும் நிஸ்ஸங்க 25 ஓட்டங்களையும் பெற்றக்கொண்டனர்.
குறித்த இந்த மதியபோசன இடைவேளைக்கு முன்னர், திமுத் கருணாரத்ன வேகமாக அடித்த பந்து ஒன்று, ஷோர்ட் லெக் (Short Leg) பகுதியில் களத்தடுப்பில் ஈடுபட்ட மே.தீவுகளின் அறிமுக வீரர் ஜெரமி சொலேன்ஷோவின் ஹெல்மட்டில் பட்டதையடுத்து, அவர் வைத்தியசாலைக்கு அழைத்துச்செல்லப்பட்டார்.
மதியபோசன இடைவேளைக்கு பின்னர் இலங்கை அணி மிகச்சிறந்த ஆட்டத்தை வெளிப்படுத்த, அணித்தலைவர் திமுத் கருணாரத்ன தன்னுடைய 27வது டெஸ்ட் அரைச்சதத்தை பூர்த்திசெய்ததுடன், பெதும் நிஸ்ஸங்க தன்னுடைய 2வது டெஸ்ட் அரைச்சதத்தை பதிவுசெய்தார். இவர்கள் இருவரும்
மே.தீவுகளுக்கு நெருக்கடி கொடுத்துவந்த போதும், துரதிஷ்டவசமாக பெதும் நிஸ்ஸங்க 56 ஓட்டங்களுடன், ஷெனொன் கேப்ரியலின் பந்துவீச்சில் ஆட்டமிழந்தார்.
எனினும், அணித்தலைவர் திமுத் கருணாரத்ன அபாரமாக ஆடி 89 ஓட்டங்களை பெற, புதிய துடுப்பாட்ட வீரர் ஓசத பெர்னாண்டோ 3 ஓட்டங்களை பெற்றுக்கொண்டிருந்த போது, ஆட்டத்தில் தேநீர் இடைவேளை வழங்கப்பட்டது. இதன்போது, இலங்கை அணி ஒரு விக்கெட்டினை இழந்து, 163 ஓட்டங்களை பெற்றுக்கொண்டது.
பின்னர், தேநீர் இடைவேளையின் பின்னர் இலங்கை அணி களமிறங்கிய போது, ரொஸ்டன் சேஸின் பந்துவீச்சில் ஓசத பெர்னாண்டோ மூன்று ஓட்டங்களுடன் ஆட்டமிழக்க, தொடர்ந்து களமிறங்கிய அஞ்செலோ மெதிவ்ஸ் 3 ஓட்டங்களுடன் வெளியேறினார். எனினும், ஆரம்பம் முதல் சிறப்பாக ஆடிய திமுத் கருணாரத்ன தன்னுடைய 13வது டெஸ்ட் சதத்தை பதிவுசெய்ய, அடுத்து களமிறங்கிய தனன்ஜய டி சில்வா அரைச்சதம் கடந்தார்.
இவர்கள் இருவரும் இன்றயை ஆட்டநேர இறுதிவரை சிறப்பாக ஓட்டங்களை குவிக்க, திமுத் கருணாரத்ன 132 ஓட்டங்களையும், தனன்ஜய டி சில்வா 56 ஓட்டங்களையும் ஆட்டமிழக்காமல் பெற்றுக்கொண்டனர். இதனடிப்படையில், இலங்கை அணி ஆட்டநேர நிறைவில், 3 விக்கெட்டுகளை இழந்து, 267 ஓட்டங்களை பெற்றுக்கொண்டது.