லஹிரு உதாரவின் அதிரடியில் கண்டி ரோயல்ஸ் அசத்தல் வெற்றி

கண்டியில் இன்று (29) நடைபெற்று முடிந்திருக்கும் லங்கா பிரீமியர் லீக் (LPL) தொடரின் 16ஆவது போட்டியில் கோல் கெலன்ட்ஸ் அணியினை கண்டி ரோயல்ஸ் லஹிரு உதாரவின் அசத்தல் சதத்தோடு 6 விக்கெட்டுக்களால் வீழ்த்தி அபார வெற்றியை பெற்றுள்ளது.

>>WATCH – கடைசி ஓவரில் 30 ஓட்டங்களை விளாசிய தவ்ஹித் ஹிரிடோய்! | LPL 2026

முன்னதாக இந்தப் போட்டியின் நாணய சுழற்சியில் வென்று முதலில் துடுப்பாடிய கோல் கெலன்ட்ஸ் ஆரம்ப வீரர் சேம் ஹார்ப்பர் மற்றும் சரித் அசலன்க ஆகியோரது அதிரடியில் 20 ஓவர்களுக்கு 3 விக்கெட்டுக்களை இழந்து 208 ஓட்டங்கள் பெற்றது.

கோல் கெலன்ட்ஸ் துடுப்பாட்டத்தில் சேம் ஹார்ப்பர் 38 பந்துகளில் 3 சிக்ஸர்கள் மற்றும் 7 பௌண்டரிகள் அடங்கலாக 72 ஓட்டங்கள் எடுத்தார். மறுமுனையில் சரித் அசலன்க ஆட்டமிழக்காது 32 பந்துகளில் 4 சிக்ஸர்கள் மற்றும் 7 பெளண்டரிகளோடு 70 ஓட்டங்கள் எடுத்தார். கண்டி ரோயல்ஸ் பந்துவீச்சில் ஷஹீர் கான் 2 விக்கெட்டுக்களை கைப்பற்றினார்.

பின்னர் 209 ஓட்டங்கள் என்கிற வெற்றி இலக்கை நோக்கி களமிறங்கிய கண்டி ரோயல்ஸ் ஆரம்பவீரராக வந்த லஹிரு உதாரவின் அபார சதத்தோடு போட்டியின் வெற்றி இலக்கினை 18.5 ஓவர்களில் 4 விக்கெட்டுக்களை இழந்து 214 ஓட்டங்களுடன் அடைந்தது.

>>பாகிஸ்தானுக்கு எதிரான T20I தொடருக்கான இலங்கை மகளிர் குழாம் அறிவிப்பு

இம்முறை LPL பருவத்தில் முதல் சதம் விளாசிய உதார 63 பந்துகளில் 7 சிக்ஸர்கள் மற்றும் 15 பௌண்டரிகள் அடங்கலாக 132 ஓட்டங்கள் பெற்றார். கோல் கெலன்ட்ஸ் அணியின் பந்துவீச்சில் சசிந்து கொலம்பகே 3 விக்கெட்டுக்களை கைப்பற்றியும் அவரது பந்துவீச்சு வீணாகியது. போட்டியின் ஆட்டநாயகன் விருதினை லஹிரு உதார வென்றார்.

>>மேலும் கிரிக்கெட் செய்திகளைப் படிக்க<<