ගෙවුනු දවස සැප්තැම්බර් 6 – ඉතිහාසයේ දැවැන්තම පරාජය?

371

කාර්යය බහුල ජීවන රටාවත් සමඟින් ඔබට මඟ හැරෙන ක්‍රීඩා පිටියේ උණුසුම් පුවත් සංක්ෂිප්තව, සෑම උදෑසනකම ඔබ වෙත රැගෙන එන ලිපි මාලාව වන “ගෙවුනු දවස”.

    ක්‍රිකට්    

තරග 9ක්, පරාජයන් 9ක්

U Tharanga

ක්‍රිකට් ක්‍රීඩාවේ තරග රටාවන් තුනේ දී ම එක ලෙස දස්කම් පාන දකුණත් සුපිරි පිතිකරු විරාත් කෝලි දැක්වූ සුවිශේෂී දස්කම් නිසා ඉන්දු – ශ්‍රී ලංකා එකම විස්සයි විස්ස තරගයේ දීත් පරාජය භාර ගැනීමට ඊයේ (06) ශ්‍රී ලංකා කණ්ඩායමට සිදු විය.

කෙසේ වෙතත් මීට පෙර පැවති බොහෝ තරගවලට වඩා වැඩි උද්‍යෝගයක් ඊයේ ශ්‍රී ලංකා ක්‍රීඩකයින්ගෙන් නිරූපණය වූ බැවින් තරගයේ අවසානය තෙක්ම ජයග්‍රාහකයා තීරණය කිරීම තරමක් අසීරු විය.

ඊයේ දිනය පුරාවට මාලිගාවත්ත ප්‍රදේශයට අතොරක් නැතිව ඇද හැලුණු වර්ෂාව නිසා දෙපිළ අතර මෙම මහා ක්‍රිකට් ගැටුම ආරම්භ කිරීමට හැකි වූයේ පුරා හෝරාවක පමණ ප්‍රමාදයකින් අනතුරුවයි. සැබවින්ම වර්ෂාවට තරග උණුසුම තුනී කර දමන්නට ඉඩ නොදුන් පිටියේ කාර්‍යමණ්ඩලය තම රාජකාරිය යුහුසුළුව ඉටු නොකරන්නට ආර්. ප්‍රේමදාස පිටිය කරා ඇදුණු ක්‍රීඩාලෝලීන්ට වැසි දියෙන් තෙතබරිත වී හිස් අතින්ම නැවතත් නිවෙස් බලා පියවර මනින්නට සිදු වන්නට ඉඩ තිබුණි. පස්වරු 8 වන විට ඇරඹි තරගයට ඉන් අනතුරුව කිසිදු ආකාරයකින් බාධාවක් ඇති නොවූ නිසා පන්දුවාර කප්පාදුවකින් තොරවම පූර්ණ විස්සයි විස්ස තරගයක අසිරිය විඳ ගැනීමට දෙපිළේම ප්‍රේක්ෂකයින්ට ඉඩ හසර විවර විය.

සම්පූර්ණ වාර්තාව: කෝලිගේ ප්‍රහාරය විස්සයි විස්ස සිහිනයත් බොඳ කරයි


සුමතිපාල ඔට්ටු අර්බුදයෙන් නිදහස්

1543

ශ්‍රී ලංකා ක්‍රිකට් ආයතනයේ වත්මන් සභාපති තිලංග සුමතිපාල මහතා ඔට්ටු ඇල්ලීම සම්බන්ධව තමාට ඇති චෝදනාවලින් නිදහස් වූ බව ඊයේ (6) ශ්‍රී ලංකා ක්‍රිකට් ආයතනය විසින් මාධ්‍ය නිවේදනයක් නිකුත් කරමින් ප්‍රකාශ කළේය.

එහි දී ශ්‍රී ලංකා ක්‍රිකට් ආයතනය ප්‍රකාශ කළේ ඔට්ටු ඇල්ලීම සම්බන්ධව සමාජ ජාල වෙබ් අඩවි හරහා පැතිර යන චෝදනා මේ සමඟින් තරයේම ප්‍රතික්ෂේප කරන බවයි. මෙකී චෝදනාව සම්බන්ධයෙන් නඩු විභාගයක් පැවැත්වූ අතර එහි දී තිලංග සුමතිපාල මහතා නිදොස් විය.

ඒ අනුව ශ්‍රී ලංකා ක්‍රිකට් ආයතනය විසින් සුමතිපාල මහතාට විරුද්ධව ඔට්ටු ඇල්ලීම සම්බන්ධව චෝදනා නැති බව ප්‍රකාශ කරන ලදි.

සම්පූර්ණ වාර්තාව: සුමතිපාල මහතා ඔට්ටුවලට සම්බන්ධ නැහැ

දිනයක අවසානය