நியூசிலாந்து அணிக்கு எதிரான ஐந்து போட்டிகள் கொண்ட ஒருநாள் தொடரின் முதல் மூன்று போட்டிகளுக்கான 15 பேர் கொண்ட மேற்கிந்திய தீவுகள் வீரர்கள் குழாம் அறிவிக்கப்பட்டுள்ளது.
>>மஹவிதானவின் அதிரடிச் சதத்தால் இந்திய இளையோரை வீழ்த்தியது இலங்கை<<
அதன்படி கயானா மற்றும் பார்படோஸ் ஆகிய மைதானங்களில் நடைபெறவுள்ள இந்தத் தொடருக்கான மேற்கிந்திய தீவுகள் அணியில், வெறும் 19 வயது மாத்திரம் நிரம்பிய இளம் மணிக்கட்டு சுழல்பந்துவீச்சாளர் விட்டல் லோவ்ஸ் இணைக்கப்பட்டுள்ளார்.
இந்த ஆண்டு நடைபெற்ற ஐ.சி.சி இன் 19 வயதுக்குட்பட்டோருக்கான உலகக் கிண்ணத் தொடரில் 10 விக்கெட்டுக்களை வீழ்த்திய லோவ்ஸ், குறித்த தொடரில் அதிக டொட் பந்துகளை வீசிய பந்துவீச்சாளராகவும் அசத்தியிருந்தார்.
அதேநேரம் இலங்கைக்கு எதிராக நடைபெற்ற ஒருநாள் தொடரில் விளையாடிய முக்கிய வீரர்கள் நியூசிலாந்துக்கு தொடரிலும் உள்வாங்கப்பட்டிருக்கின்றனர். எனினும் அதிரடி துடுப்பாட்டவீரர் ஷிம்ரோன் ஹெட்மையர் மற்றும் சகலதுறைவீரர் ஷமார் ஸ்பிரிங்கர் ஆகியோர் அறிவிக்கப்பட்டுள்ள குழாத்தில் உள்வாங்கப்படவில்லை. இதில் தாயின் மறைவு காரணமாக நியூசிலாந்துடனான போட்டிகளில் ஓய்வு பெறும் ஷமார் ஸ்பிரிங்கருக்குப் பதிலாக கீமோ பால் ஒருநாள் அணியில் இணைந்துள்ளார்.
>>ஏழாவது தடவையாக ICC மகளிர் T20 சம்பியனாகியது அவுஸ்திரேலியா<<
ஜூலை 8 தொடக்கம் நியூசிலாந்து ஒருநாள் தொடருக்கான பயிற்சிகளை மேற்கிந்திய தீவுகள் ஆரம்பிக்கவிருக்கின்றது. அத்துடன் ஒருநாள் தொடரின் இறுதி இரண்டு போட்டிகளுக்குமான அணியில் ஏதேனும் மாற்றங்கள் இருந்தால், அவை பின்னர் அறிவிக்கப்படும் எனத் தெரிவிக்கப்பட்டிருக்கின்றது.
முதல் மூன்று போட்டிகளுக்கான மேற்கிந்தியத் தீவுகள் ஒருநாள் குழாம்:
ஷேய் ஹோப் (தலைவர்), அகீம் அகஸ்டே, ஜோன் கெம்பல், கீசி கார்ட்டி, ரொஸ்டன் சேஸ், மேத்யூ போர்டே, ஜஸ்டின் கிரீவ்ஸ், அமீர் ஜங்கூ, அல்சாரி ஜோஷேப், ஷமார் ஜோஷேப், விட்டல் லோவ்ஸ், குடாகேஷ் மோட்டீ, கீமோ போல், ஷெர்பானே ரூதர்போர்ட், ஜய்டன் சீல்ஸ்.
ஒருநாள் தொடர் அட்டவணை
முதல் ஒருநாள் போட்டி: ஜூலை 11, கயானா
இரண்டாவது ஒருநாள் போட்டி: ஜூலை 13, கயானா
மூன்றாவது ஒருநாள் போட்டி: ஜூலை 16, கயானா
நான்காவது ஒருநாள் போட்டி: ஜூலை 19, பார்படோஸ்
ஐந்தாவது ஒருநாள் போட்டி: ஜூலை 21, பார்படோஸ்
>>மேலும் கிரிக்கெட் செய்திகளைப் படிக்க<<
