சுற்றுலா இலங்கை – பாகிஸ்தான் ஆகிய அணிகள் இடையிலான T20 தொடரின் முதல் போட்டியில் பாகிஸ்தான் 4 விக்கெட்டுக்களால் வெற்றி பெற்றிருப்பதோடு, மூன்று போட்டிகள் கொண்ட தொடரிலும் 1-0 என முன்னிலை அடைந்திருக்கின்றது.
>>உபாதையினால் முக்கிய வீரர்களை இழக்கும் நியூசிலாந்து T20 குழாம்<<
பாகிஸ்தானுக்கு சுற்றுப்பயணம் மேற்கொண்டுள்ள இலங்கை அணியானது முதற்கட்டமாக பாகிஸ்தானுடன் மூன்று போட்டிகள் கொண்ட T20 தொடரில் ஆடுகின்றது. இந்த தொடரின் முதல் போட்டி இன்று (09) ராவல்பிண்டியில் ஆரம்பமாகியது.
போட்டியின் நாணய சுழற்சியில் வென்ற இலங்கை அணியின் தலைவர் குசல் மெண்டிஸ் முதலில் துடுப்பாட்டத்தினை தெரிவு செய்தார். நாணயச்சுழற்சியை வென்று களமிறங்கிய இலங்கை அணிக்கு சிறந்த ஆரம்பம் அமையவில்லை. முதல் இரண்டு விக்கெட்டுக்களையும் குறுகிய இடைவெளியில் இழந்த இலங்கை அணி பவர்பிளே முடிவில் 45 ஓட்டங்களுக்கு 2 விக்கெட்டுக்களை இழந்து காணப்பட்டிருந்தது. ஆனால் லஹிரு உதார மற்றும் கமிந்து மெண்டிஸ் ஜோடி 60 ஓட்டங்கள் இணைப்பாட்டமாக சேர்த்த நிலையில், 10ஆவது ஓவரில் சயீம் அய்யூப்பின் பந்தில் கமிந்து மெண்டிஸ் ஆட்டமிழந்தார்.
புதிய வீரராக களம் வந்த சஹான் ஆராச்சிகே மொஹமட் இம்ரானின் பந்தில் ஆட்டமிழந்தபோதும், உதார தொடர்ந்து துரிதமாக ஓட்டங்களைச் சேர்த்தார். அவர் 32 பந்துகளில் அரைச்சதமும் விளாசினார். தொடக்கத்தில் திணறிய தசுன் ஷானக்க சிக்ஸர்கள் மூலம் அணியின் ஓட்டங்களை அதிகரிக்க முயன்ற போதும் எதிர்பார்த்த பெறுபேறு கிடைக்கவில்லை. தசுன் ஷானக்க உதாரவுடன் ஜோடி சேர்ந்து 57 ஓட்டங்கள் பெற்று 18 ஓட்டங்களுடன் ஆட்டமிழந்தார்.
>>பஹ்ரைன் கிரிக்கெட் அணிக்கு கரம் கொடுத்த இலங்கை கிரிக்கெட்<<
பின்னர் லஹிரு உதாரவின் ஆட்ட உதவியோடு இலங்கை அணியானது 20 ஓவர்கள் நிறைவில் இலங்கை அணி 8 விக்கெட்டுக்களை இழந்து 182 ஓட்டங்களை எட்டியது.
இலங்கை அணியின் துடுப்பாட்டத்தில் லஹிரு உதார 55 பந்துகளில் தனது சிறந்த T20I இன்னிங்ஸ் உடன் ஒரு சிக்ஸர் மற்றும் 11 பௌண்டரிகள் அடங்கலாக 91 ஓட்டங்கள் பெற்றார்.
பாகிஸ்தான் பந்துவீச்சில் நஷீம் சாஹ் 36 ஓட்டங்களுக்கு 3 விக்கெட்டுக்களையும், மொஹமட் இம்ரான் 2 விக்கெட்டுக்களையும் கைப்பற்றினர்.
பின்னர் போட்டியின் வெற்றி இலக்கான 183 ஓட்டங்களை 20 ஓவர்களில் அடைய பதிலுக்கு துடுப்பாடிய பாகிஸ்தான் அணி குறித்த வெற்றி இலக்கினை அணித்தலைவர் சஹிப்சதா பர்ஹான் மற்றும் மாஸ் சதாகட் ஆகியோரது துரித அரைச்சதங்களுடன் 18.5 ஓவர்களில் 6 விக்கெட்டுக்களை இழந்து 187 ஓட்டங்களுடன் அடைந்து கொண்டது.
பாகிஸ்தானின் வெற்றியினை உறுதி செய்த பர்ஹான் 4 சிக்ஸர்கள் மற்றும் 10 பௌண்டரிகள் அடங்கலாக 53 பந்துகளில் 89 ஓட்டங்கள் பெற்றதோடு, மாஸ் சதாகட் 29 பந்துகளில் 3 சிக்ஸர்கள் மற்றும் 4 பௌண்டரிகள் அடங்கலாக 50 ஓட்டங்கள் பெற்றார்.
இலங்கை அணியின் பந்துவீச்சில் எஷான் மாலிங்க மற்றும் மகீஷ் தீக்ஸன தலா 2 விக்கெட்டுக்கள் வீதம் சாய்த்த போதும் அது வீணாகியது. போட்டியின் ஆட்டநாயகனாக பர்ஹான் தெரிவாகியிருந்தார்.
>>மேலும் கிரிக்கெட் செய்திகளைப் படிக்க<<
