சுப்பர் லீக் தொடரில் நேற்று நடைபெற்ற ப்ளூ ஈகல்ஸ் அணிக்கு எதிரான போட்டியில் 4-0 என்ற கோல்கள் கணக்கில் வெற்றிபெற்ற அப் கண்ட்ரி லயன்ஸ் அணி தொடர் வெற்றிகளுடன் முன்னிலைப்பெற்று வருகின்றது.
இம்முறை சுப்பர் லீக்கில் தொடர்ந்து ஆதிக்கம் செலுத்திவரும் அப் கண்ட்ரி லயன்ஸ் அணி தங்களுடைய 7ஆவது வெற்றியினை நேற்றைய தினம் பதிவுசெய்தது.
>>ப்ளூ ஈகல்ஸை வீழ்த்தி புள்ளிப்பட்டியலில் முன்னேறிய ரெட் ஸ்டார்<<
ஆட்டத்தின் முதல் பாதியில் இரண்டு அணிகளும் கோல்கள் பெறும் முயற்சிகளை மேற்கொண்ட போதும், இரண்டு அணிகளாலும் கோல்களை பெறும் வாய்ப்புகளை சரியாக நிறைவுசெய்ய முடியவில்லை.
முதல் பாதி – அப் கண்ட்ரி லயன்ஸ் 0 – 0 ப்ளூ ஈகல்ஸ்
பின்னர் ஆரம்பித்த இரண்டாவது பாதியின் ஆரம்பத்திலும் அப் கண்ட்ரி லயன்ஸ் அணி மேற்கொண்ட கோல் முயற்சிகளை ப்ளூ ஈகல்ஸ் அணியின் பின்கள வீரர்கள் சிறப்பாக தடுத்திருந்தனர்.
எனினும் ஆட்டத்தின் 60ஆவது நிமிடத்தில் மொஹமட் ஆகிப் தட்டிக்கொடுத்த பந்தை நவீன் ஜூட் ஹெடர் செய்து முதல் கோலை பெற்றுக்கொடுத்தார்.
தொடர்ந்து 66ஆவது நிமிடத்தில் மத்தியக்களத்திலிருந்து ஷர்வான் ஜொஹார் உதைத்த பந்தை பெனால்டி எல்லைக்கு அருகிலிருந்து பெற்றுக்கொண்டு, கோல் காப்பாளரை இலாவகமாக தாண்டிசென்று நவீன் ஜூட் மீண்டும் கோலடித்து அணியின் முன்னிலையை 2-0 என மாற்றினார்.
>>நியூவ் யங்ஸை 6-0 என வீழ்த்திய அப் கண்ட்ரி லயன்ஸ்!<<
இந்த கோல் பெறப்பட்ட அடுத்த நிமிடத்தில் மொஹமட் ஆகிப் கோர்னர் பகுதியிலிருந்து ப்ளூ ஈகல்ஸ் அணியின் பின்கள வீரர்களை ஏமாற்றி கோர்னர் பகுதியிலிருந்து கொண்டுசென்ற பந்தை பெனால்டி கட்டத்துக்குள் எடுத்து சென்று கோல் கம்பத்துக்குள் செலுத்தினார்.
போட்டியில் 3-0 என்ற முன்னிலையை பெற்றுக்கொண்ட அப் கண்ட்ரி லயன்ஸ் 91ஆவது நிமிடத்தில் மீண்டும் ஒரு கோலை பதிவுசெய்து 4-0 என வெற்றியை உறுதிசெய்தது. மொஹமட் ஆகிப் கோல் காப்பாளரை ஏமாற்றிச் சென்று பந்தினை கோல் கம்பத்தினுள் செலுத்தி தன்னுடைய இரண்டாவது கோலினையும் இவர் பதிவுசெய்திருந்தார்.
அப் கண்ட்ரி லயன்ஸ் அணி இந்த வெற்றியுடன் தாங்கள் விளையாடிய 7 போட்டிகளிலும் வெற்றிபெற்று 21 புள்ளிகளுடன் புள்ளிப்பட்டியலில் முதலிடத்தை தொடர்ந்தும் தக்கவைத்துள்ளமை குறிப்பிடத்தக்கது.
முழு நேரம் – அப் கண்ட்ரி லயன்ஸ் 4-0 ப்ளூ ஈகல்ஸ்
கோல் பெற்றவர்கள் – நவீன் ஜூட் 60’,66’, மொஹமட் ஆகிப் 67’, 91+1’
>> மேலும் கால்பந்து செய்திகளுக்கு <<
