கடைசி நிமிட கோலுடன் போட்டியை சமப்படுத்திய கொழும்பு எப்.சி

கொழும்பு சுகததாச அரங்கில் சீ ஹாக்ஸ் மற்றும் கொழும்பு எப்.சி அணிகள் மோதிய சுப்பர் லீக் தொடரின் 34ஆவது போட்டி 1-1 என சமனிலையில் முடிவடைந்தது.

சுப்பர் லீக் தொடர் விறுவிறுப்பான கட்டத்தை எட்டியுள்ள நிலையில் ஒவ்வொரு அணிகளும் தங்களுடைய வெற்றியை நோக்கிய பயணத்தை மேலும் தீவிரப்படுத்தியுள்ளன.

>>சர்வதேச கால்பந்து அரங்கில் இருந்து விடைபெற்ற லியோனல் மெஸ்ஸி<<

அதன்படி நேற்று திங்கட்கிழமை (31) நடைபெற்ற சீ ஹாக்ஸ் மற்றும் கொழும்பு எப்.சி அணிகளுக்கு இடையிலான போட்டி ஆரம்பம் முதல் விறுவிறுப்பாக நடைபெற்றது.

முதல் பாதியில் இரண்டு அணிகளும் வாய்ப்புகளை உருவாக்கிய போதும், அதனை சரியாக நிறைவுசெய்ய முடியாமல் கோல் வாய்ப்புகளை இழந்திருந்தன. குறிப்பாக ஆட்டத்தின் 19ஆவது நிமிடத்தில் சீ ஹாக்ஸ் அணியின் செஹான் சில்வாவை மோதி வீழ்த்திய காரணத்திற்காக  கொழும்பு எப். சி அணியின் மொஹமட் பாதிலிற்கு சிவப்பு அட்டை வழங்கப்பட்டது.

எனவே இதன்பின்னர் 10 வீரர்களுடன் விளையாடிய வேண்டிய கட்டாயத்துக்கு முகங்கொடுத்த கொழும்பு எப்.சி அணி கடினமான முயற்சிகளை மேற்கொண்டு சீ ஹாக்ஸ் அணியின் கோல் வாய்ப்புகளை தகர்க்க முதல் பாதி கோல்களின்றி நிறைவுக்கு வந்தது.

முதல் பாதி – சீ ஹாக்ஸ் 0 – 0 கொழும்பு எப்.சி

பின்னர் ஆரம்பித்த இரண்டாவது பாதியில் சீ ஹாக்ஸ் அணி கோல் வாய்ப்புகளை அதிகமாக ஏற்படுத்தியிருந்தது. இதன் பலனமாக இரண்டாவது பாதி ஆரம்பித்த நான்காவது நிமிடத்தில் (49) 16 தட்டிக்கொடுத்த பந்தை செஹான் சில்வா ஹெடர் செய்து அணியின் கோல் கணக்கை ஆரம்பித்தார்.

இந்த கோல் பெறப்பட்ட 10 நிமிடங்களுக்குள் மேலும் மூன்று கோல் வாய்ப்புகளை தொடர்ச்சியாக சீ ஹாக்ஸ் அணி ஏற்படுத்திய போதும், அதனை கோலாக மாற்றுவதற்கு தவறியிருந்தது. தொடர்ந்தும் 10 வீரர்களுடன் போராட்டம் காண்பித்த கொழும்பு எப்.சி அணி போட்டியை சமப்படுத்தும் முயற்சியில் களமிறங்கியது.

போட்டியின் இறுதி நிமிடம் வரை போராடிய கொழும்பு எப்.சி அணியானது ஆட்ட நேரம் நிறைவடைந்த பின்னரும், மேலதிகமாக வழங்கப்பட்ட  7 நிமிடங்களை பயன்படுத்தி கோலடித்திருந்தது.

>>டிபெண்டர்ஸ் அணியை இலகுவாக வீழ்த்திய ரெட் ஸ்டார்! ரினௌன் வி.க எதிர் ப்ளூ ஸ்டார் வி.க<<

குறிப்பாக ஆட்டத்தின் கடைசி நிமிடத்தில் (9+7) மத்தியக்களத்திலிருந்து சலன சமீர அடித்த பிரீ கிக்கினை சீ ஹாக்ஸ் கோல் கீப்பர் பந்தினை தன்வசப்படுத்த தவறவிட்ட போது, இப்ராஹீம் லெபீ பந்தினை கோல் கம்பத்துக்குள் செலுத்தி போட்டியை சமப்படுத்தினார்.

இம்முறை சுப்பர் லீக் தொடரில் தோல்வியை காணாமால் போட்டியிட்டு வந்த கொழும்பு எப்.சி அணி கடைசி நிமிடத்தில் கோலடித்து போட்டியை சமப்படுத்தியதுடன், சீ ஹாக் அணியின் வெற்றிக்கனவையும் கடைசி நிமிடத்தில் தகர்த்திருந்தது.

போட்டி சமனிலையாகியதுடன் அணிகள் தலா ஒவ்வொரு புள்ளிகளை பெற்றுக்கொண்டதுடன், கொழும்பு எப்.சி அணி 15 புள்ளிகளுடன் மூன்றாவது இடத்தையும், சீ ஹாக்ஸ் அணி 12 புள்ளிகளுடன் நான்காவது இடத்தையும் பிடித்துக்கொண்டுள்ளமை குறிப்பிடத்தக்கது.

முழு நேரம் – சீ ஹாக்ஸ் எப்.சி 1 – 1 கொழும்பு எப்.சி

கோல் பெற்றவர்கள் – செஹான் சில்வா 49’ (சீஹாக்ஸ்), இப்ராஹீம் லெபீ 90+7’ (கொழும்பு எப்.சி)

>> மேலும் கால்பந்து செய்திகளுக்கு <<