ஜேசன் ஹோல்டர் மற்றும் ஷாய் ஹோப் ஆகியோரது சிறந்த ஆட்டத்துடன் இலங்கை அணிக்கு எதிரான முதலாவது T20I போட்டியில் மேற்கிந்திய தீவுகள் அணி 7 விக்கெட்டுக்களால் வெற்றி பெற்றுள்ளது.
மேலும் இந்த வெற்றியுடன் மூன்று போட்டிகள் கொண்ட தொடரிலம் மேற்கிந்திய தீவுகள் 1–0 என முன்னிலை பெற்றுள்ளது.
>>இலங்கைக்கு சுற்றுப்பயணம் மேற்கொள்ளவுள்ள பாக். மகளிர் அணி<<
நேற்று (11) ஜமெய்க்காவில் ஆரம்பமான இந்தப் போட்டியில் நாணய சுழற்சியில் வென்ற இலங்கை அணியானது முதலில் துடுப்பாட்டத்தை தெரிவு செய்து கொண்டது.
இலங்கை XI: பெதும் நிஸ்ஸங்க, குசல் மெண்டிஸ் (தலைவர்), லசித் குரூஸ்புள்ளே, பவன் ரத்நாயக்க, கமிந்து மெண்டிஸ், தசுன் ஷானக்க, வனிந்து ஹஸரங்க, மஹீஷ் தீக்ஷன, துஷ்மன்த சமீர, எஷான் மலிங்க, டில்ஷான் மதுஷங்க
மேற்கிந்திய தீவுகள் XI: ஷாய் ஹோப் (தலைவர்), பிரண்டன் கிங், ஷிம்ரன் ஹெட்மேயர், ரொஸ்டன் சேஸ், ஷெர்பேன் ரூதர்போர்ட், ரொவ்மன் பவல், ஜேசன் ஹோல்டர், ரொமாரியோ ஷெப்பர்ட், மெதிவ் போர்ட், அகீல் ஹொசைன், ஷமார் ஜோசப்
நாணய சுழற்சியின் பின்னர் முதலில் துடுப்பெடுத்தாடிய இலங்கை அணிக்கு, புதிய T20I தலைவர் குசல் மெண்டிஸ் 23 பந்துகளில் 3 சிக்ஸர்கள் மற்றும் 2 பௌண்டரிகள் அடங்கலாக 36 ஓட்டங்களைப் பெற்று அதிரடியான ஆரம்பத்தைத் தந்தார்.
எனினும் ஜேசன் ஹோல்டரின் பந்துவீச்சில் தடுமாற ஆரம்பித்த இலங்கை அணியானது 65 ஓட்டங்களுக்கு 4 விக்கெட்டுக்களை இழந்து தடுமாறியது. இந்த நிலையில் கமிந்து மெண்டிஸ் மற்றும் தசுன் ஷானக்க ஜோடி அணியை மீட்கப் போராடி இறுதியில் இலங்கை அணி, நிர்ணயிக்கப்பட்ட 20 ஓவர்கள் முடிவில் 9 விக்கெட்டுகளை இழந்து 147 ஓட்டங்களை மாத்திரமே பெற்றது.
இலங்கை அணியின் துடுப்பாட்டத்தில் கமிந்து மெண்டிஸ் 39 பந்துகளில் 2 சிக்ஸர்கள் மற்றும் 4 பௌண்டரிகள் அடங்கலாக 51 ஓட்டங்கள் பெற்றார். மறுமுனையில் தசுன் ஷானக்க 22 ஓட்டங்கள் எடுத்தார்.
மேற்கிந்திய தீவுகள் பந்துவீச்சில் ஜேசன் ஹோல்டர் மற்றும் ஷமார் ஜோசப் ஆகியோர் தலா 3 விக்கெட்டுக்கள் வீதம் சுருட்டியிருந்தனர்.
பின்னர் வெற்றி இலக்காக நிர்ணயியக்கப்பட்ட 147 ஓட்டங்களை 20 ஓவர்களில் எட்ட துடுப்பாடிய மேற்கிந்திய தீவுகள் அணி போட்டியின் வெற்றி இலக்கை 19.2 ஓவர்களில் 3 விக்கெட்டுக்களை இழந்து அடைந்து கொண்டது.
மேற்கிந்திய தீவுகளின் வெற்றியை உறுதி செய்த அதன் தலைவர் ஷாய் ஹோப் ஆரம்ப வீரராக வந்து தன்னுடைய 12ஆவது T20I அரைச்சதத்தோடு 54 பந்துகளில் 2 சிக்ஸர்கள் மற்றும் 5 பௌண்டரிகள் அடங்கலாக 65 ஓட்டங்களைக் குவித்தார். மறுமுனையில் பிரண்டன் கிங் 22 பந்துகளில் 37 ஓட்டங்களைப் பெற்று தனது பங்களிப்பினை வழங்கியிருந்தார்.
இலங்கை அணியின் பந்துவீச்சில் வனிந்து ஹஸரங்க 2 விக்கெட்டுகளைக் கைப்பற்றினார். போட்டியின் ஆட்டநாயகன் விருது ஜேசன் ஹோல்டருக்கு வழங்கப்பட்டது.
போட்டியின் சுருக்கம்
இலங்கை: 147/9(20) கமிந்து மெண்டிஸ் 51, குசல் மெண்டிஸ் 36, ஜேசன் ஹோல்டர் 3/18, ஷமார் ஜோசப் 3/29
மேற்கிந்திய தீவுகள்: 149/3(19.2) ஷாய் ஹோப் 65, பிரண்டன் கிங் 37; வனிந்து ஹஸரங்க 2/32, எஷான் மலிங்க 1/26
முடிவு: மேற்கிந்திய தீவுகள் அணி 7 விக்கெட்டுகளால் வெற்றி
>>மேலும் கிரிக்கெட் செய்திகளைப் படிக்க<<
