இங்கிலாந்து லயன்ஸ் – இலங்கை அணிகள் இடையில் நடைபெற்ற முதல் சுற்றுலா T20 போட்டியில் இலங்கை அணியை 9 விக்கெட்டுகள் வித்தியாசத்தில் இங்கிலாந்து லயன்ஸ் வீழ்த்தி அபார வெற்றியினைப் பதிவு செய்துள்ளது.
>>அனுபவ வீரர்களுடன் ஆசிய விளையாட்டு போட்டிகளுக்கான இந்திய கிரிக்கெட் அணி<<
இங்கிலாந்துக்கு T20 மற்றும் ஒருநாள் தொடர்களில் விளையாட சுற்றுப்பயணம் மேற்கொண்டிருக்கும் இலங்கை அதற்கு முன்னதாக இரு போட்டிகள் கொண்ட சுற்றுலா T20 தொடரில் இங்கிலாந்து லயன்ஸ் அணியினை எதிர்கொள்கின்றது.
அந்தவகையில் இந்த தொடரின் முதல் போட்டி நேற்று (11) இங்கிலாந்தின் செல்ம்ஸ்போட் கவுண்டி அரங்கில் ஆரம்பமாகியது. போட்டியின் நாணய சுழற்சியில் வென்ற இங்கிலாந்து லயன்ஸ் இலங்கை வீரர்களை முதலில் ஆடப் பணித்தது.
பின்னர் துடுப்பாடத் தொடங்கிய இலங்கை அணி ஆரம்பம் முதலே வேகப்பந்துவீச்சாளர்களின் ஆதிக்கத்தால் தடுமாறியது. இங்கிலாந்து லயன்ஸ் அணியின் இடதுகை வேகப்பந்துவீச்சாளர் லூக் வூட், முதல் ஓவரிலேயே ஆரம்பத் துடுப்பாட்டவீரர் பெதும் நிஸ்ஸங்கவை 4 ஓட்டங்களுடன் வெளியேற்றினார். பின்னர் அவர் 3ஆவது ஓவரில் லஹிரு உதார (6) மற்றும் பவன் ரத்நாயக்க (0) ஆகியோரின் விக்கெட்டுகளை அடுத்தடுத்து வீழ்த்தி அதிர்ச்சி அளித்தார். பின்னர் சோனி பேக்கர் விக்கெட்காப்பாளர் கமில் மிஷாராவை (5) ஆட்டமிழக்கச் செய்ய, இலங்கை அணி 19 ஓட்டங்களுக்கு 4 விக்கெட்டுகளை இழந்து நிர்க்கதியானது.
>>பாகிஸ்தானை வீழ்த்தி மகளிர் ஆசியக் கிண்ண இறுதிப் போட்டிக்கு முன்னேறியது இலங்கை<<
சுழற்பந்துவீச்சாளர்களும் இலங்கைக்கு நெருக்கடி கொடுத்தனர். அதில் இங்கிலாந்து லயன்ஸ் தலைவர் வில் ஜேக்ஸ் குறுகிய இடைவெளியில் ஜனித் லியனகே (5) மற்றும் துனித் வெல்லாலகே (4) ஆகியோரை வெளியேற்றினார். இதனால் முதல் 6 ஓவர்களுக்குள்ளேயே இலங்கை 49 ஓட்டங்களுக்கு 6 விக்கெட்டுகளை இழந்து பெரும் இக்கட்டான நிலைக்குத் தள்ளப்பட்டது.
அணித்தலைவர் கமிந்து மெண்டிஸ் 22 பந்துகளில் 29 ஓட்டங்கள் எடுத்து நம்பிக்கை வழங்கிய போதும் சுழல்வீரர்களின் நெருக்கடியால் இலங்கை மீண்டும் 78 ஓட்டங்களுக்கு 9 விக்கெட்டுக்களை இழந்து மீண்டும் தடுமாறியது. எனினும் பின்வரிசையில் களமிறங்கிய தரிந்து ரத்நாயக்க தனி ஆளாகப் போராட இலங்கை அணி 16.4 ஓவர்களில் அனைத்து விக்கெட்டுக்களையும் இழந்து 117 ஓட்டங்கள் பெற்றது.
இலங்கை அணியின் துடுப்பாட்டத்தில் தரிந்து ரத்நாயக்க 5 பௌண்டரிகள் மற்றும் 3 சிக்ஸர்களுடன் 37 பந்துகளில் 48 ஓட்டங்களை விளாசினார்.
இங்கிலாந்து லயன்ஸ் பந்துவீச்சில் லூக் வூட் 27 ஓட்டங்களுக்கு 4 விக்கெட்டுக்களையும் சொன்னி பேக்கர், வில் ஜேக்ஸ் மற்றும் ஜாபர் சோஹான் ஆகியோர் தலா 2 விக்கெட்டுக்கள் வீதமும் கைப்பற்றினர்.
பின்னர் 118 ஓட்டங்கள் என்ற வெற்றி இலக்கை நோக்கி துடுப்பாடிய இங்கிலாந்து லயன்ஸ் போட்டியின் வெற்றி இலக்கினை வெறும் 7.2 ஓவர்களில் ஒரு விக்கெட்டினை மாத்திரம் இழந்து 118 ஓட்டங்களுடன் அடைந்தது.
இங்கிலாந்து லயன்ஸ் அணியின் வெற்றியினை உறுதி செய்த டொம் பேன்டன் 24 பந்துகளை மட்டும் எதிர்கொண்டு 3 சிக்ஸர்கள் மற்றும் 7 பௌண்டரிகள் அடங்கலாக 56 ஓட்டங்கள் பெற்றார். இலங்கை பந்துவீச்சில் துனித் வெல்லாலகே மற்றும் ஒரு விக்கெட் கைப்பற்றியிருந்தமை குறிப்பிடத்தக்கது. சுற்றுலா T20 தொடரின் அடுத்த போட்டி நாளை (13) இடம்பெறவிருக்கின்றது.
>>மேலும் கிரிக்கெட் செய்திகளைப் படிக்க<<
