அவுஸ்திரேலிய அணியின் வேகப்பந்துவீச்சாளரான ஜோஷ் ஹேசல்வூடிற்குப் பதிலாக 2026 T20 உலகக் கிண்ணத் தொடரில் ஸ்டீவ் ஸ்மித் இணைக்கப்பட்டுள்ளதாக தெரிவிக்கப்பட்டுள்ளது.
>>ஐ.சி.சி ஆடவர் T20 உலகக் கிண்ணம் 2026: நுழைவுச்சீட்டு பற்றிய முக்கிய அறிவிப்பு<<
முன்னணி வேகப்பந்துவீச்சாளரான ஜோஷ் ஹேசல்வூட் தசைப் பகுதியில் ஏற்பட்ட காயம் காரணமாக 2026 T20 உலகக் கிண்ணத் தொடரில் இருந்து அதிகாரப்பூர்வமாக வெளியேறியுள்ளார்.
உபாதைக்குள்ளாகியிருந்த ஹேசல்வூட் சுப்பர் 8 சுற்றில் அவுஸ்திரலிய அணியில் இணைந்து ஆடுவார் என மருத்துவக் குழு நம்பியிருந்தது. ஆனால் அவர் குணமடைய இன்னும் கூடுதல் காலம் தேவைப்படும் என்பதால் அவரை அவுஸ்திரேலிய அணியில் இருந்து விலக்கிய இருப்பதாக, ஆஸி. அணியின் தேர்வுக் குழு உறுப்பினர் டோனி டோடெமெய்ட் தெரிவித்துள்ளார்.
விடயங்கள் இவ்வாறு காணப்பட்டிருக்க பெப்ரவரி 15ஆம் திகதி ஸ்டீவ் ஸ்மித்தை பிரதியீட்டு வீரராகச் சேர்க்க ICC இடம் அவுஸ்திரேலியா அனுமதி கோரியது. இந்த அனுமதி கோரலுக்கு, T20 தொடரின் தொழில்நுட்பக் குழு ஒப்புதல் வழங்கியிருக்கும் நிலையில், இன்று (16) பல்லேகலையில் இலங்கை அணிக்கு எதிராக நடைபெறவுள்ள முக்கியப் போட்டிக்கு முன்னதாக ஸ்டீவ் ஸ்மித்தினை இணைக்கும் இந்த அறிவிப்பு வந்துள்ளது.
36 வயது நிரம்பிய ஸ்டீவ் ஸ்மித் 2024ஆம் ஆண்டின் பெப்ரவரி மாதம் கடைசியாக T20 சர்வதேச போட்டியொன்றில் விளையாடியிருந்தார். எனினும் அண்மையில் நிறைவுக்கு வந்த 2025-26 பிக் பேஷ் லீக் (BBL) தொடரில் ஸ்மித் வெளிப்படுத்திய அபாரமான ஆட்டமே அவர் மீண்டும் அணியில் இடம்பிடிக்கக் காரணமாக அமைந்தது. ஸ்மித் BBL தொடரில் சிட்னி சிக்ஸர்ஸ் அணிக்காக ஆரம்ப வீரராகக் களம் இறங்கி 59.80 என்கிற சராசரியுடன் 299 ஓட்டங்களை குவித்திருந்தார்.
அதேநேரம் குழு B இல் காணப்படும் அவுஸ்திரேலியா அயர்லாந்துக்கு எதிரான போட்டியில் வெற்றி பெற்ற போதும், ஜிம்பாப்வே அணிக்கு எதிரான போட்டியில் அதிர்ச்சித் தோல்வியைத் தழுவியது. இதனால் இன்றைய இலங்கை அணியுடனான போட்டியில் கட்டாய வெற்றியினை எதிர்பார்த்து களமிறங்குகின்றமை சுட்டிக்காட்டத்தக்கது.
>>மேலும் கிரிக்கெட் செய்திகளைப் படிக்க<<
