மல்யுத்தத்தில் தங்கம் வென்று நிபுனி வாசனா வரலாற்றுச் சாதனை

சீனாவின் சன்யாவில் நடைபெற்றுவரும் 6ஆவது ஆசிய கடற்கரை விளையாட்டு விழாவில் இன்று (29) நடைபெற்ற பெண்களுக்கான 50 கிலோ எடைப்பிரிவு மல்யுத்தப் போட்டியில் இலங்கை வீராங்கனை நிபுனி வாசனா தங்கப் பதக்கம் வென்று புதிய வரலாறு படைத்துள்ளார்.  

ஆசிய கடற்கரை விளையாட்ட விழாவில் இலங்கை வென்ற முதல் தங்கப் பதக்கம் இதுவாகும் என்பதுடன், ஆசிய மட்டத்திலான மல்யுத்தப் போட்டியொன்றில் இலங்கை வீராங்கனை ஒருவர் தங்கப் பதக்கம் வென்ற முதல் சந்தர்ப்பம் இதுவாகும். 

விறுவிறுப்பான இறுதிப் போட்டியில், வியட்நாம் வீராங்கனை டொஆன் தி கிம் ஓவானை 3-1 என்ற புள்ளிகள் கணக்கில் தோற்கடித்து நிபுனி இந்த வெற்றியைப் பதிவு செய்தார். 21 வயதான நிபுனியின் விளையாட்டு வாழ்க்கையில் இது ஒரு முக்கிய மைல்கல்லாகக் கருதப்படுகிறது.

இறுதிப் போட்டிக்கு முன்னதாக நிபுனி வெளிப்படுத்திய திறமை அனைவரது கவனத்தையும் ஈர்த்தது. ஆரம்பச் சுற்றுப் போட்டிகளில் அவர் கஸகஸ்தான், கம்போடியா மற்றும் சீனா ஆகிய நாடுகளின் வீராங்கனைகளை 2-0 என்ற புள்ளிகள் கணக்கில் வீழ்த்தினார்.

குறிப்பாக, அரையிறுதிப் போட்டியில் பலம் வாய்ந்த ஜப்பான் வீராங்கனை யானோ புனாவை 4-0 என்ற புள்ளிகள் கணக்கில் தோற்கடித்து இறுதிப் போட்டிக்குத் தகுதி பெற்றார். இறுதிப் போட்டிக்கு முந்தைய அனைத்துப் போட்டிகளிலும் தனது எதிராளிகளுக்கு ஒரு புள்ளியைக்கூடப் பெற இடமளிக்காமல் அவர் ஆதிக்கம் செலுத்தியது குறிப்பிடத்தக்கது.

• ஆசிய கடற்கரை விளையாட்டு விழா கபடியில் இலங்கைக்கு 2 பதக்கங்கள்
• ஆசிய கடற்கரை விளையாட்டு விழாவில் இலங்கைக்கு 3 பதக்கங்கள்
• 60 மீற்றர் அஞ்சலோட்டத்தில் இலங்கை அணிக்கு வெண்கலம்

இதனிடையே, நிபுனி வாசானா அண்மையில் கிர்கிஸ்தானின் பிஷ்கெக் நகரில் நடைபெற்ற சிரேஷ்ட ஆசிய மல்யுத்த சம்பியன்ஷிப் போட்டியிலும் சிறப்பான திறமையை வெளிப்படுத்தி, வெண்கலப் பதக்கத்திற்கான சுற்று வரை முன்னேறியிருந்தார்.  

எனவே, 18 வயதில் பொதுநலவாய விளையாட்ட விழாவில் பதக்கம் வென்ற நெத்மி அஹின்சாவிற்குப் பிறகு, மல்யுத்தம் விளையாட்டில் இலங்கைக்குப் பெருமை சேர்த்த மற்றுமொரு இளம் வீராங்கனையாக நிபுனி உருவெடுத்துள்ளார்.

இதேவேளை, நிபுனி வென்ற இந்தத் தங்கப் பதக்கத்துடன், இலங்கை இம்முறை பதக்கப் பட்டியலில் 9-வது இடத்தைப் பிடித்துள்ளது. இலங்கை அணி இதுவரை ஒரு தங்கம், 2 வெள்ளி மற்றும் 4 வெண்கலப் பதக்கங்களுடன் மொத்தம் 7 பதக்கங்களை வென்றுள்ளது. முன்னதாக 2012, 2014 மற்றும் 2016 ஆம் ஆண்டுகளில் தலா இரண்டு வெண்கலப் பதக்கங்களை மாத்திரமே இலங்கை வென்றிருந்ததுடன், 2008 மற்றும் 2010 ஆம் ஆண்டுகளில் எந்தப் பதக்கத்தையும் வென்றிருக்கவில்லை.

தற்போதைய நிலவரப்படி, 21 தங்கப் பதக்கங்களுடன் சீனா முதலிடத்திலும், தாய்லாந்து மற்றும் ஈரான் ஆகிய நாடுகள் அடுத்தடுத்த இடங்களிலும் உள்ளன.

6ஆவது ஆசிய விளையாட்டு விழா நாளை (30) நிறைவடைய உள்ளமை குறிப்பிடத்தக்கது. 

>> மேலும் பல விளையாட்டு செய்திகளைப் படிக்க <<