சீனாவின் சன்யாவில் நடைபெற்றுவரும் 6ஆவது ஆசிய கடற்கரை விளையாட்டு விழாவில் ஆண்கள் மற்றும் பெண்களுக்கான நீளம் பாய்தல் போட்டியில் இலங்கை வீரர்கள் ஒரு வெள்ளி மற்றும் 2 வெண்கலப் பதக்கங்களை வென்று வரலாற்றுச் சாதனை படைத்துள்ளனர்.
இதில் நேற்று நடைபெற்ற பெண்களுக்கான நீளம் பாய்தலில் இஷாரா சமன்மலி 5.87 மீற்றர் தூரம் பாய்ந்து வெள்ளிப் பதக்கத்தை சுவீகரித்தார். ஆசிய கடற்கரை விளையாட்டுப் போட்டி வரலாற்றில் இலங்கை வென்ற முதல் வெள்ளிப் பதக்கம் இதுவாகும். அவருடன் போட்டியிட்ட சஷிகலா லங்காத்திலக 5.83 மீற்றர் தூரம் பாய்ந்து வெண்கலப் பதக்கத்தை உறுதி செய்தார்.
13 வீராங்கனைகள் பங்குகொண்ட இப்போட்டியில் வியட்நாமின் தி துய் ஹாங் ஹா 6.16 மீற்றர் தூரம் பாய்ந்து தங்கப் பதக்கம் வென்றார்.
இதனிடையே, இன்று (25) நடைபெற்ற ஆண்களுக்கான நீளம் பாய்தலில் இலங்கை வீரர் சம்பத் மிரென்டா 7.37 மீற்றர் தூரம் பாய்ந்து வெண்கலப் பதக்கம் வென்றார்.
இம்முறை ஆசிய விளையாட்டு விழாவில் இலங்கை வென்ற 3ஆவது பதக்கம் இதுவாகும் என்பதுடன், இந்த 3 பதக்கங்களும் மெய்வல்லுனர் போட்டி நிகழ்ச்சிகளில் கிடைத்தமை மற்றுமொரு சிறப்பம்சமாகும்.
ஆண்களுக்கான நீளம் பாய்தலில் வியட்நாம் மற்றும் சீன நாட்டு வீரர்கள் முறையே தங்கம் மற்றும் வெள்ளிப் பதக்கங்களை வென்றனர். அதேபோல, சம்பத்துடன் இப்போட்டியில் களமிறங்கிய மற்றுமொரு இலங்கை வீரரான இநுர பியசிறிக்கு 7ஆவது இடத்தையே பெற்றுக்கொள்ள முடிந்தது.
>>10 வருடங்களின் பின்னர் ஆசிய கடற்கரை விளையாட்டு விழா இன்று ஆரம்பம்<<
இதேவேளை, இன்று நடைபெற்ற ஆண்களுக்கான 60 மீற்றர் இறுதிப் போட்டியில் பங்கேற்ற இலங்கையின் மலித் கௌஷான் தமேல், போட்டித் தூரத்தை 6.87 செக்கன்களில் கடந்து 6ஆவது இடத்தையும், பெண்களுக்கான 60 மீற்றர் இறுதிப் போட்டியில் பங்கேற்ற திலக்ஷி அநுராதிகா 7.70 செக்கன்களில் போட்டியை நிறைவு செய்து 7ஆவது இடத்தையும் பெற்று ஏமாற்றம் அளித்தனர்.
பெண்களுக்கான குண்டு போடுதல் போட்டியில் 2 இலங்கை வீராங்கனைகள் பங்கேற்றனர். இதில் ஒவினி சந்ரசேகர (12.96 மீற்றர்) 5ஆவது இடத்தையும், காவ்யா ஜயசூரிய (9.47 மீற்றர்) 7ஆவது இடத்தையும் பெற்றுக் கொண்டனர்.
இந்த நிலையில், சன்யா குடா ஹய்யுவே ஸ்கொயார் அரங்கில் இன்று நடைபெற்ற பெண்களுக்கான கடற்கரை கபடி போட்டியில் சிரியாவை எதிர்த்தாடிய இலங்கை 51 – 19 என்ற புள்ளிகள் வித்தியாசத்தில் வெற்றிகொண்டது.
இதேவேளை, ஆண்களுக்கான கரப்பந்து தகுதிகாண் போட்டியில் பூட்டானை எதிர்த்தாடிய இலங்கை 2 – 0 என்ற செட்கள் வித்தியாசத்தில் வெற்றியீட்டியதுடன், மற்றுமொரு போட்டியில் லாவோஸ் அணியை 2 – 0 என்ற செட்கள் வித்தியாசத்தில் வீழ்த்தியமை குறிப்பிடத்தக்கது.
இது இவ்வாறிருக்க, ஆசிய கடற்கரை விளையாட்டு விழா 3ஆவது நாள் நிறைவுக்கு வரும் போது பதக்கப் பட்டியலில் இலங்கை ஒரு வெள்ளி மற்றும் 2 வெண்கலப் பதக்கங்களை வென்று 9ஆவது இடத்தைப் பிடித்துள்ளது.
