2020 පාසල් මහා තරග වීරයෝ – දිනෙත් ජයකොඩි

174
86 වැනි සාන්තුවරුන්ගේ සටනේ දී දිනෙත් මහා තරගයක දී ලබා ගත් මංගල ශතකයේ සතුට සමරමින්
 

මේ අවුරුද්දෙත් සුපුරුදු ලෙස ආරම්භ වුන මාර්තු උන්මාදය (March Madness) Covid-19 වසංගතය නිසා එක්වරම අවසන් වුනේ මහා තරග රැසක් දින නියමයක් නොමැතිව කල් යමිනුයි. ඒ කොහොම වුනත් මේ අවුරුද්දේ මෙතෙක් පැවති තරගවල දී ද ක්‍රීඩකයින් රැසක් ඔවුන්ගේ දක්ෂතා පෙන්වන්න සමත් වුනා.

2020 පාසල් මහා තරග වීරයෝ – ශලින් ද මෙල්

සෑම වසරකම වගේ පෙබරවාරි අන්තිම වගේ ඉඳන් අප්‍රේල් මුල වගේ වෙනකන් ලංකාවේ පාසල්…

සාන්ත ජෝසප් විද්‍යාලයේ මැදපෙළ නියෝජනය කරන විශ්වාසවන්ත පිතිකරුවෙක් වන දිනෙත් ජයකොඩි සාන්ත ජෝසප් සහ සාන්ත පීතර විදුහල් අතර පැවති 86 වැනි සාන්තුවරුන්ගේ සටනේ දී අගනා ශතකයක් ලබා ගන්න සමත් වුනේ තරගයේ වීරයා සහ තරගයේ හොඳම පිතිකරුවා ලෙස අභිෂේක ලබමිනුයි.

පසුගිය මාර්තු 6 සහ 7 කොළඹ පී. සරා ඕවල් පිටියේ දී පැවැත්වුන මෙවර සාන්තුවරුන්ගේ සටනේ කාසියේ වාසිය දිනා ගත්ත සාන්ත ජෝසප් නායක ජොහෑන් ද සිල්වා පළමුව පන්දු යැවීමට තීරණය කළ අතර සිය පළමු ඉනිම දියත් කළ සාන්ත පීතර විද්‍යාලය නියමිත පන්දුවාර 60 අවසානයේ සියල්ලන්ම දැවී ලකුණු 224ක් ලබා ගන්න සමත් වුනා.

සාන්ත ජෝසප් පිළිතුරු පළමු ඉනිම ආරම්භ කළේ නායක ජොහෑන් සහ කඩුලු රකින ක්‍රීඩක ශෙරන් ෆොන්සේකායි. ඔවුන් දෙදෙනා සහ ඔවුන්ගේ ප්‍රබල පිතිකරුවන් දෙදෙනෙක් වන ශෙවෝන් ඩැනියල් සහ දුනිත් වෙල්ලාලගේ යන හතර දෙනාම මුළු ලකුණු 43ක් වන විට ක්‍රීඩාගාරයේ රැඳී සිටීම නිසා සාන්ත ජෝසප් ක්‍රීඩකයින් දෙසට දැඩි පීඩනයක් එල්ල වී තිබුණා.

ඉන්පසු පිටියට පැමිණි දකුණතින් පිතිකරණයේ නිරත වන දිනෙත් සමඟ එක්වුණු සදීෂ ජයවර්ධන 5 වැනි කඩුල්ල වෙනුවෙන් ලකුණු 192ක දැවැන්ත සබඳතාවයක් ගොඩනැගුවේ වසර 72ක වාර්තාවක් ද බිඳ දමමිනුයි. 

සාන්තුවරුන්ගේ තරග ඉතිහාසයේ පස්වැනි කඩුල්ල සඳහා පැවති හොඳම සම්බන්ධතාවයේ වාර්තාව ඒ අනුව ඔවුන් දෙදෙනා සතු වූ අතර මීට පෙර එම වාර්තාවට හිමිකම් කීවේ ජෝ මීසෝ හා පැට්‍රික් පෙරේරා, ඒ 1938 වසරේ දී පස්වැනි කඩුල්ල සඳහා ලකුණු 158 සබඳතාවක් ගොඩනගමින්. 

86 වැනි සාන්තුවරුන්ගේ සටනේ දී දිනෙත් සමඟ එක්වුණු සදීෂ ජයවර්ධන 5 වැනි කඩුල්ල වෙනුවෙන් පිතිකරණයේ නිරත වෙමින්

පිතිකරණයෙන් ඉතාමත් හොඳ දස්කම් දක්වා තිබෙන 18 හැවිරිදි දිනෙත්, මේ වන විට සාන්තුවරයින්ගේ සටන් 3ක් සඳහා සහභාගි වෙමින් අර්ධ ශතක 2ක් සහ ශතකයක් වාර්තා කරගෙන තිබෙනවා. 2018 සිය පළමු පාසල් මහා තරගයට ක්‍රීඩා කරපු දිනෙත් පළමු ඉනිමේ ලකුණු 13ක් සහ දෙවන ඉනිමේ ලකුණු 55*ක් ලබා ගැනීමට සමත් වුනා. 

මහා තරග ඉතිහාසයේ දිනෙත් ජයකොඩිගේ පිතිකරණ දස්කම් (2018-2020)

තරග ඉනිම ලකුණු පන්දු ලකුණු ලබා ගැනීමේ සාමාන්‍ය අර්ධ ශතක ශතක 4 පහර 6 පහර වැඩිම ලකුණු 
3 4 267 415 89.00 2 1 26 6 122

දිනෙත්ගේ ක්‍රිකට් දිවියේ ආරම්භය

2001 පෙබරවාරි 2 වැනිදා උපන් දිනෙත්, ජයකොඩි පවුලේ එකම දරුවා. මුලින්ම වත්තල ලයිසියම් ජාත්‍යන්තර පාසලෙන් අධ්‍යාපනය ලැබූ දිනෙත් ලයිසියම් පාසලේ 6 වසරේ දී පාසලේ ක්‍රිකට් ක්‍රීඩාව සඳහා යොමු වන්නේ ක්‍රිකට් ක්‍රීඩා කළ ඔහුගේ මිතුරන් නිසාවෙනුයි. 

86 වැනි සාන්තුවරුන්ගේ සටනේ පිතිකරණයේ නිරත වන දිනෙත්

“පොඩි කාලේ ඉඳන් මම මගේ යාලුවෝ සෙල්ලම් කරන විදිහ බලාගෙන හිටියා, මුලින් මුලින් නම් එච්චර ආසාවක් ආවේ නැහැ. හැබැයි පස්සේ පස්සේ මට ඒ ක්‍රිකට් සෙල්ලමට ලොකු ආසාවක් ආවා. තාත්තාට මම ඒක කිව්වම තාත්තා වගේම ගෙදර අයත් කැමති වුනා මම ක්‍රිකට් ක්‍රීඩාවට යනවට.” යැයි දිනෙත් ThePapare.com වෙත පැවසුවා.

වත්තලින් මරදානට 

7 වසර වෙනකන් වත්තල ලයිසියම් පාසලට ගිය දිනෙත්, වයස අවුරුදු 13න් පහළ ජාත්‍යන්තර පාසල් ක්‍රිකට් තරගාවලියේ දක්වපු දස්කම් නිසා ශ්‍රී ලංකා වයස අවුරුදු 13න් පහළ සංවර්ධන සංචිතයට ඇතුළත් වෙන්න අවස්ථාව ලැබෙනවා. එතැනින් ඔහුගේ ක්‍රිකට් දිවිය වෙනස්ම මාර්ගයකට යොමුවෙනවා.

“13න් පහළ සංවර්ධන සංචිතයට මාව ඇතුළත් කරගත්තට පස්සේ මගේ හැකියාවන් තවත් වර්ධනය වුනා. එතැන දී මම ගොඩක් දේවල් ඉගෙන ගත්තා. පස්සේ සාන්ත ජෝසප් විද්‍යාලය අපේ ටික දෙනෙක්ව ඔවුන්ගේ පාසලට කැඳවලා, අපේ දස්කම් පරික්ෂා කරලා බැලුවා. පස්සේ මාව සාන්ත ජෝසප් විද්‍යාලයට තෝරාගත්තා. සාන්ත ජෝසප් විද්‍යාලයේ 13න් පහළ කණ්ඩායමට සෙල්ලම් කරපු පළමු තරගාවලියේම තරග තුනක දී ලකුණු 180ක් ලබා ගන්න මට පුළුවන් වුනා. ඒකට ශතකයක් සහ අර්ධ ශතකයක් ඇතුළත්.”

පවුලෙන් ලැබෙන සහය

දිනෙත් සිය මව සහ පියා සමඟ

“පොඩි කාලේ ඉඳන් මේ වෙනකන්ම තාත්තායි, අම්මයි මගේ ක්‍රිකට් ගමන සාර්ථක කරගන්න ගොඩක් උදව් කරලා තියෙනවා. ඒක වචනවලින් කියන්න බැහැ. ඒ අය නොහිටින්න මට මේ දැන් ඉන්න තැනට එනවා කියන්නේ හීනයක් වගේ.”

“ඒ වගේම තමයි මගේ තාත්තා පොඩි කාලේ ඉඳන් මාව පුහුණුවීම්වලට/ තරගවලට එක්කරගෙන ගියා. අම්මා මගේ සෙල්ලම් කරල මඩ වුනු ඇඳුම් හෝදලා ඊළඟ දවසට මට පුහුණුවීම් යන්න ලෑස්ති කරලා දුන්නා. ඒ වගේම මගේ කෑම බීම ගැනත් පවුලේ අය ගොඩක් සැලකිලිමත් වුනා. ඒ ගොල්ලෝ මේ ලබා දුන්න සහයෝගය මගේ ක්‍රිකට් දිවියේ මේ ඉන්න තැනට එන්න ගොඩක් උදව් වුනා.” යැයි පවුලේ අයගෙන් ලැබෙන සහය ගැන අහපු ප්‍රශ්නෙට උත්තර දෙමින් දිනෙත් පැවසුවා.  

පාසලෙන් සහ පුහුණුකරුවන්ගෙන් ලැබෙන සහය

“මගේ මුල්ම ක්‍රිකට් ගුරුවරයා වුනේ වත්තල ලයිසියම් පාසලේ කසේල සර්. සර්ගෙන් මම ගොඩක් දේවල් මගේ ක්‍රිකට් ජීවිතයට වගේම පුද්ගලික ජීවිතයටත් එකතු කරගත්තා.” යැයි දිනෙත් පැවසුවේ ඉතාමත් සතුටෙන්.

“අසේල සර්, CCC පාසලේ නෙල්සන් සර්, රොජර් සර්, නිරෝෂන් බණ්ඩාරතිලක සර්, මයිකල් ඇඩම්ස් සර්, ගාමිණී සර්, දුමින්ද සර්, ලයිසියම් පාසලේ සහ සාන්ත ජෝසප් විද්‍යාලයේ සියලුම ගුරු මහත්ම මහත්මීන්, සියලුම ක්‍රිකට් පුහුණුකරුවන්, දිස්ත්‍රික් සහ පළාත් පුහුණුකරුවන් මම මතක් කරන්න කැමති. ඔවුන්ගෙන් මම ඉගෙන ගත්ත දේවල් බොහෝමයි.”

ක්‍රිකට් දිවියේ සොඳුරු මතකයන්

“ඇත්තටම මම පිතිකරුවෙක් හැබැයි පන්දු යවන්න අවස්ථාවක් ආවොත් කණ්ඩායම වෙනුවෙන් මම ඒක කරන්න පස්සට යන්නේ නැහැ. 2017/18 19න් පහළ පළමු පෙළ ක්‍රිකට් තරගාවලියේ දී මම රාජකීය විද්‍යාලයට එරෙහිව අර්ධ ශතකයක් ලබාගෙන එක ඉනිමක දී කඩුලු 5ක් දවා ගත්තා. ඒක මට කවදාවත් අමතක වෙන්නේ නැහැ.”

“ඒ වගේම 2016/17 17න් පහළ පාසල් ක්‍රිකට් තරගාවලියේ දී සාන්ත ජෝසප් විද්‍යාලය වෙනුවෙන් මම එක දිගට නොකඩවා ශතක තුනක් ලබා ගත්තා. ඒ වගේමයි 2020 මහා තරගයේ දී ලබා ගත්ත ශතකයත් මට කවදාවත් අමතක වෙන්නේ නැහැ. 

මට මගේ පාසල වෙනුවෙන් තවත් මහා තරගයක් ක්‍රීඩා කරන්න වෙන්නේ නැහැ. ඒක නිසා මම මගේ පාසල වෙනුවෙන් ශතකයක් ලබා ගන්නවා කියලා ලොකු අධිෂ්ඨානයකින් ඒ තරගයට ආවේ. කොහොම හරි මම ඒක කළා. ඒක නම් මගේ තිබ්බ ලොකුම ඉලක්කයක්.” 

දිනෙත් 86 වැනි සාන්තුවරුන්ගේ සටනේ හොඳම පිතිකරුවා සහ තරගයේ වීරයා යන සම්මාන දෙක ලබා ගනිමින්

දිනෙත්ගේ අනාගත බලාපොරොත්තුව

“මම පිතිකරණයෙන් දස්කම් දක්වන ක්‍රීඩකයෙක්, පන්දු රකින්නත් මම ගොඩක් ආසයි,එහෙම දස්කම් පෙන්වලා පාසල් මට්ටමින් අන්තර් සමාජ, ශ්‍රී ලංකා දෙවන පෙළ ජාතික ක්‍රිකට් කණ්ඩායමත් ක්‍රීඩා කරලා ජාතික කණ්ඩායම වෙනුවෙන් ක්‍රීඩා කරලා රට වෙනුවෙන් දෙයක් කරන්න මගේ ලොකු බලාපොරොත්තුවක් තියෙනවා.”

අවසන් වශයෙන්,

“මම මේ දැන් ඉන්න තැනට එන්න උදව් කරපු මගේ අම්මා, තාත්තා, නෑදෑ හිතමිතුරන්, කුඩා කාලයේ ඉඳන් මේ වෙනකන් උදව් කරපු හැම පුහුණුකරුවෙක්වම, පාසලේ විදුහල්පති පියතුමා ඇතුළු සියලුම ගුරුවරුන්, පාසලේ ආදී ශිෂ්‍ය සංගමය, අපේ පාසල් ක්‍රිකට් කණ්ඩායමේ පරණ හිටපු නායකයින්, මාත් එක්ක එකට ක්‍රීඩා කරපු කණ්ඩායමේ සහෝදර ක්‍රීඩකයින්, පාසලේ මගේ ළඟින්ම හිටපු මිතුරන් වගේම මට උදව් කරපු හැමෝටම මම ස්තුතිවන්ත වෙනවා.”

86 වැනි සාන්තුවරුන්ගේ සටනේ නිමාව

මෙවර පාසල් මහා තරගවල විශිෂ්ට දස්කම් දක්වපු ක්‍රීඩකයින් ගැන තවත් විශේෂාංග ලිපි කිහිපයක්ම නුදුරු දින කිහිපය තුල ඔබ වෙත ගෙන එන්න ThePapare.com සූදානම්. ඔබේ පාසලේ දක්ෂතමයත් ඒ අතර ඉන්න පුළුවන්, රැඳී සිටින්න ThePapare.com සමඟම.

>> තවත් විශේෂාංග ලිපි සඳහා පිවිසෙන්න <<