ශ්‍රී ලංකා වොලිබෝල් කෙතේ නව අස්වැන්න – මහේල ඉන්දීවර

870
Mahela Indeewara

ශ්‍රී ලංකාව තුළින් බිහිවුණු ජාතික වොලිබෝල් ක්‍රීඩකයන් ගැන මතක් කරන විට ඉක්මනින් මතකයට එන නම් කිහිපයක් ඇත. ඩබ්. එල්. සිරිවර්ධන, කැමිලස් ඇන්තනී, කාලික වසන්තප්‍රිය, කේ. එම්. කේ. සුනිල්, නලීන් සම්පත්, මොරිස් චමින්ද, අසංක ප්‍රදීප්, ජනිත සුරත්, දීප්ති රොමේෂ්… ඒ නාමාවලිය ඉදිරියට ඇදෙන්නට නම් නවක ක්‍රීඩකයන් විසින් ඒ යෂ්ටිය භාරගත යුතුය. ඕනෑම ක්‍රීඩාවක ඉදිරි ගමන තීරණය වෙන්නට බලපාන ප්‍රධාන සාධකයක් වන්නේ නැගී එන ක්‍රීඩකයන්ය.

ශ්‍රී ලංකා වොලිබෝල් ක්‍රීඩාවේ අනාගත තරුව ඔහු යැයි කියන්නට හදිසි නොවුනත්, ලාංකේය වොලිබෝල් කෙතේ නවතම සරු අස්වැන්න ඔහුයැයි මම කියමි. ඔහු නමින් මහේල ඉන්දීවර ය. මේ වන විට නාත්තන්ඩිය ධම්මිස්සර විද්‍යාලය, නාත්තන්ඩිය යුනයිටඩ්, යුධ හමුදා කණ්ඩායම සහ ශ්‍රී ලංකා කණ්ඩායම නියෝජනය කර ඇති මහේල, අවස්ථානුකූලව වෙනස් වන උස පන්දු ප්‍රහාරකයෙකි. මේ, ඔහු අප හා යෙදුණු කෙටි පිළිසඳරකි. 

Mahela Indeewara
“මහේල උස පැනීමේ තරග ඉසව්වකට සහභාගී වෙමින්”

මහේල ඉන්දීවර කියන්නෙ කවුද?

ගොඩක් මිනිස්සු මාව අඳුරගන්නේ වොලිබෝල් ගහන මහේලවිදිහට. මම හයි ජම්ප්, ඇත්ලටික්ස්, මියුසික්, වොලිබෝල් කියන දේවල් වලට දක්ෂයි කියලා හිතනවා.

ඔහුට සහ වොලිබෝල් ප්‍රේක්ෂකයන්ට අනුව ඔහු ජාතික තලයේ දක්ෂ, නැගී එන වොලිබෝල් ක්‍රීඩකයෙකු බවට කිසිදු සැකයක් නැත. එහෙත් සාමාන්‍යයෙන් “ක්‍රීඩාවට යොමුවන දරුවන්ගේ අධ්‍යාපන කටයුතු අඩාල වනවා”යැයි පවතින මතය බිඳ දැමූ යොවුන් ක්‍රීඩකයෙකු ලෙසත් ඔහුව හැඳින්විය හැකිය. පාසල් මලල ක්‍රීඩා උළෙලවල දී පදක්කම් දිනා ඇති ඔහු ඊටත් එහා ගොස් තමන්ගේ සෞන්දර්යාත්මක කුසලතා වර්ධනය කරගැනීමටත් ඔහු සමත්ව ඇත.

ක්‍රීඩාවට අමතරව අධ්‍යාපනය සහ කලාවට තියෙන නැඹුරුව කොහොමද?

ඕලෙවල් වලට A හතයි, B දෙකක් ගත්තා. ඒ ලෙවල් සයන්ස් කරා. වොලිබෝල් වලට ගොඩක් මහන්සි වුනේ ඒ ලෙවල් කරන අවුරුදු 2 1/2 තමයි. ඒ නිසා ක්ලාස් යන්න, පාඩම් කරන්න තිබුණු වෙලාව ගොඩක් සීමා වුනා. මාස 8ක කාලයක් ඇතුළත මම දෙවැනි වරටත් විභාගයට ලිව්වා. දැන් ප්‍රතිඵල එනකම් ඉන්නවා. සංගීතයටත් ගොඩක් කැමතියි. කීබෝඩ්, වයලින් වගේ දේවල් වාදනය කරන්න පුළුවන්.

2015 දී තබ්ලා වාදනයෙන් සමස්ත ලංකා පස්වැනි තැන දිනා ගත් ඔහු එම වසරේ දී ම භාත්කණ්ඩේ විශාරද විභාගය ද සමත්වී තිබේ. ක්‍රීඩාව, අධ්‍යාපනය, සෞන්දර්යය යන තෙඅංශයෙන්ම දස්කම් දැක්විය හැකි නම් එය විරල ගණයේ හැකියාවකි.

පවුලේ අය සහ පාසලේ විස්තර?

පවුලේ සාමාජිකයින් හතර දෙනයි. මමයි අම්මයි තාත්තයි නංගියි. නංගි ඕලෙවල් වලින් A නවයක් අරගෙන ඒලෙවල් පන්තියේ ඉගෙන ගන්නවා. තාත්තා කුමාරතුංග ජයලත්. එයා තැපැල් දෙපාර්තමේන්තුවේ ස්ථානාධිපති කෙනෙක් විදියට වැඩකරනවා. අම්මා ශ්‍රියානි ධම්මිකා .වෙන්නප්පුව ප්‍රාදේශීය ලේකම් කාර්යාලයේ වැඩකරනවා.

නාත්තන්ඩිය ධම්මිස්සර විද්‍යාලයට තමයි මම එක වසරේ ඉඳන් දහතුන වසර වෙනකන්ම ගියේ. දඟ වැඩ නම් කරපු නැති තරම්. ඒ තාත්තා ඒවා කරන්න දුන්නෙ නැති නිසා.

වොලිබෝල් ක්‍රීඩාව තෝරගන්න හිතුණේ ඇයි?

වොලිබෝල් ක්‍රීඩාව මට ලැබුණේ තාත්තගෙන්. ඇවිදින්න පුළුවන් කාලේ ඉඳලම වොලිබෝලේ එක්කම තමයි හිටියේ. තාත්තාගේ අරමුණක් තිබුණා මාව ලංකාවේ ඉහළ මට්ටමේ වොලිබෝල් ක්‍රීඩකයෙකු කරන්න. පොඩි කාලේ ඉඳන් මගේ අරමුණ වුනෙත් තාත්තාගේ අරමුණ ඉෂ්ට කරන එක තමයි.

ඒ අරමුණට අත පොවන දුරින් සිටින මහේල මේ වන විටත් ශ්‍රී ලංකාවේ යොවුන් ක්‍රීඩකයන් අතරින් වඩාත් කැපී පෙනෙන ක්‍රීඩකයා ය.

  • 2017/18 ඩයලොග් ජනාධිපති රන් කුසලාන වොලිබෝල් තරගාවලියේ දක්ෂතම ක්‍රීඩකයා,
  • 2017/18 DSI සුපර්ස්පෝට් වොලිබෝල් තරගාවලියේ දක්ෂතම ක්‍රීඩකයා

බවට පත්වෙමින් නමක් දිනා ගත් මහේල,

  • 2019 මන්චි ජාතික වොලිබෝල් ශූරතාවයේ දී යුධ හමුදා කණ්ඩායම නියෝජනය කරමින් සමස්ත ලංකාවේ දක්ෂතම ක්‍රීඩකයා බවට ද පත්විය.
Mahela Indeewara
“මහේල, ඩයලොග් ජනාධිපති රන් කුසලාන 2019 දක්ෂතම ක්‍රීඩකයා ලෙස සම්මාන ලබමින්.”

මහේලගේ මුල් පුහුණුකරුවන් කවුද?

මගේ පළවෙනිම පුහුණුකරු තමයි කුමාරතුංග ජයලත්. ඔව්, ඒ මගේ තාත්තා. පාසලේ දී මම කීර්ති ජයසේකර සර් යටතේ පුහුණු වුනා.

නාත්තන්ඩිය වැනි වොලිබෝල් පුරයක උපන් ඔහු ධම්මිස්සර විද්‍යාලයටත්, ඔහුගේ ගමටත් ගෞරවයක් ගෙනවිත් ඇත. එහෙත් එතැනින් නොනැවතී ශ්‍රී ලංකාව නියෝජනය කරමින් ජාත්‍යන්තර තරගාවලි වලට සහභාගී වීමට ඔහු සමත්ව ඇත.

මහේල දැනට ගිහින් තියෙන විදෙස් තරග සංචාර ගැන කිව්වොත්?

“2017 දී මියන්මාරයේ පැවැත්වුණු 19න් පහළ ආසියානු වොලිබෝල් ශූරතා තරගාවලිය,  

2018 දී තායිලන්තයේ පැවැත්වුණු 19න් පහළ ආසියානු බීච් වොලිබෝල් තරගාවලිය,

2018 දී බහරේන් වල පැවැත්වුණු ආසියානු 20න් පහළ වොලිබෝල් තරගාවලිය,

2019 දී ඉරානයේ පැවති ආසියානු විවෘත වොලිබෝල් තරගාවලිය කියන තරගාවලි වලට මම සහභාගී වුනා.

මේ හැම සංචාරයක්ම මම පාසල් යන කාලෙදීම සහභාගී වෙන්න ලැබුණු ඒවා. මම ඒක සලකන්නේ භාග්‍යයක් විදිහට. පළවෙනි සංචාරයේ දී නම් චකිතයක් තිබුණු නිසා යම් පසුබෑමකට ලක්වුනා. ඒත් දෙවැනි තරගාවලියේ දී අත්දැකීම් ලබාගෙන තිබුණු නිසා මම සක්‍රීය ක්‍රීඩකයෙක් වුනා.

Mahela Indeewara
“මහේල, 20න් පහළ ශ්‍රී ලංකා කණ්ඩායම වෙනුවෙන් ක්‍රීඩා කරමින්”

බහරේන් සංචාරයේ දී ඕස්ට්‍රේලියානු කණ්ඩායම පරාජය කරන්න ලොකු දායකත්වයක් ලබා දෙන්න ලැබුණු එක සතුටක්. බීච් වොලිබෝල් තරගාවලියේ දී ජපානය පරාජය කරද්දී කණ්ඩායමේ නායකත්වය දරන්න ලැබීමත් ගෞරවයක්. ආසියානු ජ්‍යෙෂ්ඨ තරගාවලියේ දී ඉතිහාසයේ පළමු වතාවට අපි කසකස්තානය පරාජය කළා. ඒ තරගයේ දී ලොකු දායකත්වයක් ලබා දෙන්න හැකි වීමත් මම ලබපු ජයග්‍රහණයක්. මේ හැම දෙයක්ම කළේ ශ්‍රී ලංකාවේ නම ආසියාවේ සහ ලෝකයේම බබළවන්න තමයි.

පාසල් ක්‍රීඩකයෙකුව සිටිය දී ම එවන් අත්දැකීම් රාශියක් එක්රැස් කරගැනීමට ලැබීම මහේල ලද භාග්‍යයක් මෙන්ම ශ්‍රී ලංකාවේ වොලිබෝල් ක්‍රීඩාව ලැබූ වාසනාවකි. මතු යම් දිනෙක ආසියානු වොලිබෝල් කරළිය තුළ හිස ඔසවන ශ්‍රී ලංකා වොලිබෝලයට ඔහුගේ දායකත්වය ලැබෙන්නේ තරුණ ජවය මෙන්ම එවැනි අත්දැකීම් රැසක් ද සමඟයි.

වොලිබෝල් ක්‍රීඩාවෙන් ජීවිතයට ඉගෙන ගන්න පුළුවන් දේවල් මොනවද?

ජීවිතයට ලබාගන්න පුළුවන් දේවල් බොහොමයි. කණ්ඩායමක් හැටියට එකමුතුව වැඩකිරීමෙන් ලැබෙන සාර්ථකත්වය ඉන් ප්‍රධාන වෙනවා. හැමදෙනාම එකම අරමුණකින්, එකම බලාපොරොත්තුවකින් කටයුතු කිරීම වැදගත් දෙයක්. එකිනෙකාට උදව් කරගැනීම, දක්ෂයාට සහයෝගය දීම වගේම තමන්ගේ අරමුණට යන්න කළ හැකි සෑම උත්සාහයක්ම කිරීමත්, ආත්මාභිමානයත් වැදගත් වෙනවා. ජීවිතේ වැදගත් අවස්ථාවල දී සහයෝගයෙන් වැඩ කරලා සාර්ථකත්වයක් ලබාගන්න වොලිබෝල් ක්‍රීඩාව නිසා මම ඉගෙන ගත්තා.

අපේ රටේ ඉන්න යොවුන් වොලිබෝල් ක්‍රීඩකයන් ජාත්‍යන්තර යොවුන් ක්‍රීඩකයන් එක්ක සැසඳුවොත්?

ලංකාවේ යොවුන් ක්‍රීඩකයන්ට ජාත්‍යන්තර මට්ටමේ නමක් දිනා ගන්න පුළුවන් කියන එක තමයි මගේ හැඟීම. ඒත් ඒ සඳහා විශේෂයෙන් අවධානය යොමු කළ යුතු දෙයක් තමයි කණ්ඩායම් හැඟීම සහ එකමුතුව ක්‍රීඩා කිරීම. ඒ දේවල් සම්පූර්ණ වුනොත් ආසියාවේ පළමු පෙළ කණ්ඩායමක් හැටියට නැගී සිටින්න ශ්‍රී ලංකාවට පුළුවන් බව තමයි මගේ විශ්වාසය.

ලංකාවේ ක්‍රීඩකයන්ගේ දක්ෂතා සහ උපාය වලින් ජාත්‍යන්තරයේ පෙරළියක් කරන්න පුළුවන් කියලා මම හිතනවා. යොවුන් ක්‍රීඩකයන්ගේ ක්‍රියාශීලී බව සහ දරාගැනීමේ හැකියාව ඕනෑවටත් වඩා තියෙනවනේ. ඒත් මනා කළමනාකාරීත්වයෙන් ක්‍රීඩා කරන්න පෙලඹුනොත් වෙනසක් කරන්න හැකි වෙයි.  ඒ නිසා මගේ අදහස අපි හරියට වොලිබෝල් ක්‍රීඩාවට අවධානය යොමු කරොත් අපට ආසියාවේ පළමු කණ්ඩායම් හතරට එන්න හැකියාවක් තියෙනවා කියලයි.

තරුණ ක්‍රීඩකයෙකු ලෙස පමණක් නොව, ක්‍රීඩාව ගැන ඔහුට ඇති දැක්ම ගැන ද සතුටුදායක හැඟීමක් ඇති වේ. ඒ ශ්‍රී ලංකාවේ අනාගත වොලිබෝල් පිටියේ මෙවැනි චින්තනයක් ඇති තරුණ ක්‍රීඩකයන් රැඳී සිටීම සෙසු ක්‍රීඩකයන්ගේ විශ්වාසය ද ඉහළ නැංවීමට හේතු වන බැවිනි.

මහේල කැමතිම ජාත්‍යන්තර ක්‍රීඩකයා කවුද?

ඉවාන් සයිත්සෙව් (ඉතාලිය). මම කැමතියි එයාගේ ස්ටයිල් එකට. ජම්පින්, ගහන ඇක්ෂන් එක. ඒ ඔක්කොටම කැමතියි.

Ivan Zaytzev
“මහේලගේ ප්‍රියතම ක්‍රීඩක ඉවාන් සයිත්සෙව්”

වොලිබෝල් ක්‍රීඩාව හරියට කරන්න ශාරීරිකව සහ මානසිකව කොච්චර කැපවෙන්න ඕනද?

ක්‍රීඩාව තුළ රැඳී ඉන්න නම් මනා කළමනාකාරීත්වයකින් ශරීරය පාලනය කරන්න වෙනවා. ඒකෙ දී ආහාර ගැනීම, බර එසවීම, දරාගැනීම වැඩි කරන ක්‍රියාකාරකම්, ඉපිලීමේ ක්‍රියාකාරකම්, කණ්ඩායම් ක්‍රියාකාරකම් වගේම තාක්ෂණික ක්‍රමවේද ගැනත් සැලකිලිමත් වෙන්න ඕන.

මානසිකවත් දරාගැනීමේ හැකියාව වැඩිදියුණු කරගන්න ඕන. ජය-පරාජය විඳ දරාගන්න සූදානම්ව ඉන්න ඕන. කොහොම වුනත් මහන්සි වීමයි, කැපවීමයි මත තමයි මේ ක්‍රීඩාවේ ජය-පරාජය තීරණය වෙන්නේ.  

දැනට පවතින COVID වසංගත තත්වය හේතුවෙන් ක්‍රීඩාව වෙනුවෙන් කැපවන බොහෝ තරුණ තරුණියන්ට යම් බාධකයක් පැනනැගී ඇත. එහෙත් මහේල ඒ සඳහා විශේෂ උපක්‍රම භාවිත කරනු අපට සමාජ මාධ්‍ය ඔස්සේ ද දැකිය හැකි විය.

නිරෝධායන නීති රීති තියෙන කාලෙදී දස්කම් අතර ඉන්න පාවිච්චි කරපු උපක්‍රම මොනවද?

කොරෝනා වසංගත කාලේ සංචාර සීමා පනවපු වෙලාවේ දස්කම් නැතිවෙන්න නොදී පවත්වගන්න මම නිවසේ එළිමහන් බිම පාවිච්චි කළා. ඉපිලීම වැඩිකරගන්න කරන ක්‍රියාකාරකම් සහ පන්දුව එක්ක කරන ක්‍රියාකාරකම් තමයි කළේ.  

ශ්‍රී ලංකාවේ පැවැත්වෙන වොලිබෝල් තරගාවලි ගැන ඔබේ අදහස?

දැනට පවත්වන තරගාවලි ගැන නම් සෑහීමකට පත්වෙන්න පුළුවන්. නමුත් වොලිබෝල් කියන්නේ ලංකාවේ ජාතික ක්‍රීඩාව නිසා ඒ ගැන වැඩි වැඩියෙන් අවධානය යොමුකළොත් අනාගත පරපුරට මේ ක්‍රීඩාව තවත් වැඩි දියුණු කිරීමට පුළුවන් වෙයි කියලා මම විශ්වාස කරනවා.

තරගාවලි පැවැත්වීම අපහසු කාලයක් වුවත් ඒ ගැන සිතාබැලීමට මේ හොඳම කාලයයි. 

ජීවිතේ දී ක්‍රීඩකයෙකු බලාපොරොත්තු වෙන්නේ මොනවද?

ජීවිතේ දී ක්‍රීඩකයෙක් බලාපොරොත්තු වෙන්නේ ලබාගත හැකි ඉහළම ජයග්‍රහණ තමන්ට සහ රටට ගෙන ඒම.

දැනට ඇවිත් තියෙන ගමන ගැන ස්තුතිවන්ත වෙන්න ඕන කාටද?

දැනට මං ගැන තියෙන සියලු ගෞරවයන් මගේ තාත්තට ලබා දෙන්න කැමතියි. ඊට අමතරව මගේ පාසලේ පුහුණුකරු කීර්ති ජයසේකර සර්ටත්, විදුහල්පති ඇතුළු ගුරුවරුන්ටත් ස්තුතිවන්ත වෙන්න කැමතියි. තව මට උදව් කරපු අම්මට සහ තාත්තගේ සහෝදරයන් දෙදෙනාටත් ස්තුතිවන්ත වෙන්න කැමතියි.

ඔහුගේ පියා වොලිබෝලය ඔහු අතට දී ඇත. ඔහු ඒ වොලිබෝලය දෑතට හුරු කරගෙන ඇත. පාසල් ක්‍රීඩකයෙකුව සිටියදීම ජාතික ජයග්‍රහණ දිනා ශ්‍රී ලංකා ජ්‍යෙෂ්ඨ කණ්ඩායම නියෝජනය කිරීමේ වරම දිනාගෙන ඇත.

ශ්‍රී ලංකා වොලිබෝල් කෙතේ නවතම සරු අස්වැන්න මහේල යැයි මම කීවෙමි. එහෙත් ඒ අස්වැන්න නෙළාගෙන, හොඳහැටි සකස් කොට, ජාත්‍යන්තර මට්ටමේ පැකේජයක බහා ලොවට ඉදිරිපත් කිරීම ශ්‍රී ලංකාවේ වොලිබෝල් ක්‍රීඩාව ගැන උනන්දුවක් දක්වන සෑම පාර්ශවයක් විසින්ම ප්‍රවේශමෙන් කළ යුත්තකි. මහේල ඉන්දීවර, වොලිබෝලය සමඟ දිගු ගමනක් යන්නට ඔබට ThePapare.com අපෙන් සුබපැතුම්!

 >> තවත් විශේෂාංග ලිපි සඳහා පිවිසෙන්න <<