ஐபிஎல் 2026 தொடர் இன்னும் 2 நாட்களில் ஆரம்பமாக உள்ள நிலையில், கொல்கத்தா நைட் ரைடர்ஸ் மற்றும் குஜராத் டைட்டன்ஸ் ஆகிய அணிகள் தமது வேகப்பந்து வீச்சுப் பிரிவில் முக்கிய மாற்றத்தைச் செய்துள்ளன.
ஐபிஎல் கிரிக்கெட் தொடரின் 19ஆவது சீசன் மார்ச் 28ஆம் திகதி ஆரம்பமாகவுள்ளது. இதில் எந்த அணி சாம்பியன் பட்டத்தை வெல்லும் என்ற எதிர்பார்ப்புகள் ரசிகர்கள் மத்தியில் நாளுக்கு நாள் அதிகரித்து வருகின்றன. ஒவ்வொரு அணியும் தொடருக்காக தீவிரமாக தயாராகி வரும் நிலையில், தொடருக்கு முன்பே சில வீரர்கள் காயம் காரணமாக அடுத்தடுத்து விலகி வருவது அணிகளுக்கு பெரும் பின்னடைவை ஏற்படுத்தி வருகிறது.
அந்த வகையில் காயம் காரணமாக ஐபிஎல் தொடரிலிருந்து விலகியுள்ள இளம் வீரர் ஹர்ஷித் ராணாவுக்குப் பதிலாக, அனுபவம் வாய்ந்த வேகப்பந்து வீச்சாளர் நவ்தீப் சைனியை அந்த அணி ஒப்பந்தம் செய்துள்ளது.
சமீபத்தில் நடைபெற்ற T20 உலகக் கிண்ணத்தில் காயம் காரணமாக விளையாடாத ஹர்ஷித் ராணா, தற்போது ஐபிஎல் தொடரிலிருந்தும் முழுமையாக விலகியுள்ளார். நீண்ட ஆலோசனைக்குப் பிறகு நவ்தீப் சைனியை அணியில் சேர்க்க கொல்கத்தா அணி நிர்வாகம் முடிவு செய்துள்ளது.
ஏற்கனவே ஆகாஷ் தீப் காயம் காரணமாக விலகியதால் அவருக்குப் பதிலாக சௌரப் துபேவை கொல்கத்தா அணி ஒப்பந்தம் செய்திருந்தமை குறிப்பிடத்தக்கது. தற்போது ராணாவின் விலகல் அந்த அணிக்கு மற்றொரு பின்னடைவைக் கொடுத்துள்ளது
- ராஜஸ்தான் ரோயல்ஸ் அணியில் இணையும் தசுன் ஷானக்க
- ஆஸி. வேக நட்சத்திரங்கள் IPL ஆரம்பப் போட்டிகளில் ஆடுவது சந்தேகம்
- சன்ரைஸர்ஸ் ஹைதராபாத் அணியின் தலைவராக இஷான் கிஷன்
2017-ஆம் ஆண்டு டெல்லி கேபிடல்ஸ் அணியால் முதன்முதலில் ஒப்பந்தம் செய்யப்பட்ட சைனி, அந்த சீசனில் விளையாடும் வாய்ப்பைப் பெறவில்லை. பின்னர் 2019-இல் றோயல் சேலஞ்சர்ஸ் பெங்களுர் அணிக்காக விளையாடிய அவர், 13 போட்டிகளில் 11 விக்கெட்டுகளை வீழ்த்தி அனைவரின் கவனத்தையும் ஈர்த்தார். அதனைத் தொடர்ந்து ராஜஸ்தான் ரோயல்ஸ் அணிக்காக விளையாடிய அவர், கடந்த ஏலத்தில் எந்த அணியாலும் வாங்கப்படவில்லை.
இந்திய அணிக்காக மூன்று வடிவிலான கிரிக்கெட் போட்டிகளிலும் விளையாடிய அனுபவம் கொண்ட சைனி, இதுவரை ஐபிஎல் தொடரில் மொத்தம் 23 விக்கெட்டுகளைக் கைப்பற்றியுள்ளார்.
அதேபோல் ஐபிஎல் வீரர்கள் மினி ஏலத்தில் குஜராத் டைட்டன்ஸ் அணியால் ரூ.30 இலட்சத்திற்கு ஒப்பந்தம் செய்யப்பட்டிருந்த வேகப்பந்து வீச்சாளர் பிரித்விராஜ் யார்ராவுக்குப் பதிலாக, இடதுகை வேகப்பந்து வீச்சாளர் குல்வந்த் கெஜ்ரோலியா-வை அந்த அணி ஒப்பந்தம் செய்துள்ளது.
டெல்லியைச் சேர்ந்த இவர் கடந்த 2018ஆம் ஆண்டு ஐபிஎல் தொடரில் அறிமுகமான நிலையில், 8 போட்டிகளில் விளையாடி 6 விக்கெட்டுகளை வீழ்த்தியுள்ளார் என்பது குறிப்பிடத்தக்கது.
ஐபிஎல் 2026 தொடரில் கொல்கத்தா நைட் ரைடர்ஸ் அணி தனது முதல் போட்டியில் மும்பை இந்தியன்ஸ் அணியை மார்ச் 29ஆம் திகதி மும்பை வான்கடே மைதானத்தில் எதிர்கொள்கிறது. மறுபுறத்தில் குஜராத் டைட்டன்ஸ் அணி தனது முதல் போட்டியில் பஞ்சாப் கிங்ஸ் அணியுடன் மார்ச் 31ஆம் திகதி முல்லன்பூரில் மோதவுள்ளது.
>>மேலும் கிரிக்கெட் செய்திகளைப் படிக்க<<
