பத்து வருட நீண்ட இடைவெளிக்குப் பிறகு, ஆசிய பிராந்திய வீர வீராங்கனைகள் கடற்கரை சார்ந்த விளையாட்டுகளில் தமது திறமைகளை வெளிப்படுத்தும் வகையில், 6ஆவது ஆசிய கடற்கரை விளையாட்டு விழா இன்று (22) சீனாவின் சான்யா நகரில் பிரம்மாண்டமாக ஆரம்பமாகிறது.
இன்று முதல் இம்மாதம் 30ஆம் திகதி வரை நடைபெறவுள்ள இந்த விளையாட்டு விழாவில், 45 நாடுகளைச் சேர்ந்த 2,000க்கும் மேற்பட்ட வீர வீராங்கனைகள் பங்கேற்கின்றனர். இதில் இலங்கையைப் பிரதிநிதித்துவப்படுத்தி 40 வீரர்கள் மற்றும் 37 வீராங்கனைகள் என மொத்தம் 77 பேர் களமிறங்குகின்றனர்.
இதில் ஒரு விசேட அம்சமாக, ஆசிய கடற்கரை விளையாட்டு விழா வரலாற்றில் முதன்முறையாக இலங்கை சார்பாக மெய்வல்லுநர் அணியொன்று இப்போட்டித் தொடரில் பங்கேற்கின்றது.
இம்முறை ஆசிய கடற்கரை விளையாட்டு விழா 14 விளையாட்டு நிகழ்ச்சிகளை உள்ளடக்கிய 61 போட்டிகளைக் கொண்டதாக நடைபெறவுள்ளது. இதில் இலங்கை 8 விளையாட்டுப் பிரிவுகளில் பங்கேற்கவுள்ளது. அதன்படி, திறந்த நீர் நீச்சல், கடற்கரை மெய்வல்லுநர், கடற்கரை மற்போர், கடற்கரை கரப்பந்து, கடற்கரை கபடி, கடற்கரை ஹேண்ட்பால், பாய்மரப் படகோட்டம் மற்றும் 3X3 கூடைப்பந்து ஆகிய போட்டி நிகழ்ச்சிகளில் இலங்கை வீரர்கள் பங்கேற்கவுள்ளனர். 
இந்த நிலையில், இன்று நடைபெறவுள்ள ஆரம்ப விழாவில் இலங்கைக் கொடியை ஏந்திச் செல்லும் கௌரவம், பாய்மரப் படகோட்ட வீரர் ஹரேன் தினேத் விக்ரமதிலக்க மற்றும் மெய்வல்லுநர் வீராங்கனை லக்ஷிகா சுகந்தி ஆகியோருக்கு வழங்கப்பட்டுள்ளது. இலங்கை அணியின் பிரதான அதிகாரியாக சமித் திலின செயற்படுகிறார்.
இதனிடையே, இம்முறை ஆசிய கடற்கரை விளையாட்டு விழாவிற்காக விளையாட்டுத்துறை அமைச்சு சுமார் 70 மில்லியன் ரூபாவை ஒதுக்கியுள்ளமை குறிப்பிடத்தக்கது.
இதேவேளை, ஆரம்ப விழாவுக்கு முன்னரே சில போட்டி நிகழ்வுகள் ஆரம்பமாகின. நேற்று நடைபெற்ற ஆண்களுக்கான ஹேண்ட்பால் போட்டியில், போட்டியை நடத்தும் சீனாவிடம் 2-0 என்ற கணக்கில் இலங்கை தோல்வியடைந்தது. இப்போட்டியின் புள்ளிகள் 18-8 மற்றும் 20-8 எனப் பதிவாகியிருந்தன.
இது இவ்வாறிருக்க, ஆசிய கடற்கரை விளையாட்டு விழா வரலாற்றில் இலங்கை இதுவரையில் 6 வெண்கலப் பதக்கங்களை மாத்திரமே சுவீகரித்துள்ளது. எனவே, பத்து வருட இடைவெளியின் பின்னர் நடைபெறும் இந்த விழாவில், புதிய வரலாற்றுச் சாதனைகளைப் படைக்கும் எதிர்பார்ப்புடன் இலங்கை வீரர்கள் இம்முறை சீனாவுக்குப் பயணமாகியுள்ளனர்.
>> மேலும் பல விளையாட்டு செய்திகளைப் படிக்க <<
 சீனாவின் சான்யா நகரில் பிரம்மாண்டமாக ஆரம்பமாகிறது. ){kind=link}