கொழும்பு ஆர்.பிரேமதாச சர்வதேச கிரிக்கெட் மைதானத்தில் நடைபெற்ற 19 வயதுக்குட்பட்ட இந்தியா மற்றும் இலங்கை அணிகளுக்கு இடையிலான இரண்டாவதும் கடைசியுமான இளையோர் டெஸ்ட் கிரிக்கெட் போட்டியில், இந்திய இளையோர் அணி 211 ஓட்டங்கள் வித்தியாசத்தில் அபார வெற்றிபெற்று 1-0 என தொடரைக் கைப்பற்றியுள்ளது.
இப்போட்டியில் முதலில் துடுப்பெடுத்தாடிய இந்திய 19 வயதுக்குட்பட்ட அணி, ஆரம்பத்தில் விக்கெட்டுகளை இழந்தபோதிலும் மத்திய வரிசை வீரர்களின் அபார சதங்களின் உதவியுடன் முதல் இன்னிங்ஸில் 411 ஓட்டங்களைக் குவித்தது. இந்திய அணி சார்பில் மனல் சௌஹான் 150 ஓட்டங்களையும், குஷாக்ரா ஓஜா 111 ஓட்டங்களையும், அணித்தலைவர் யாஷ்பர்தன் சௌஹான் 78 ஓட்டங்களையும் பெற்றனர்.
இலங்கை பந்துவீச்சில் கிம்ஹான் மெண்டிஸ் 102 ஓட்டங்களுக்கு 3 விக்கெட்டுகளையும், விக்னேஸ்வரன் ஆகாஷ், துல்னித் சிகேரா மற்றும் செத்மிக்க செனவிரட்ன ஆகியோர் தலா 2 விக்கெட்டுகளையும் கைப்பற்றினர்.
பதிலுக்கு முதல் இன்னிங்ஸைத் தொடங்கிய இலங்கை இளையோர் அணி, இந்திய வீரர்களின் நேர்த்தியான பந்துவீச்சை எதிர்கொள்ள முடியாமல் தடுமாறி 148 ஓட்டங்களுக்கு சகல விக்கெட்டுகளையும் இழந்தது. இலங்கை அணி சார்பில் துல்னித் சிகேரா அதிகபட்சமாக 31 ஓட்டங்களையும், திமன்த மஹாவித்தான 24 ஓட்டங்களையும் பெற்றனர்.
இந்திய பந்துவீச்சில் ரோஹித் யாதவ் 12 ஓட்டங்களுக்கு 4 விக்கெட்டுகளையும், சிகுருபதி வெங்கடா, ப்ரணவ் ராகவேந்த்ரா மற்றும் ஜெகநாதன் ஹேம்சுதேஷான் ஆகியோர் தலா 2 விக்கெட்டுகளையும் வீழ்த்தினர்.
- மஹவிதானவின் அதிரடிச் சதத்தால் இந்திய இளையோரை வீழ்த்தியது இலங்கை
- செனுஜ, கவிஜவின் போராட்டம் வீண்; இலங்கையை வீழ்த்தியது இந்தியா U19 அணி
இதனையடுத்து, 263 ஓட்டங்கள் முன்னிலையுடன் இரண்டாவது இன்னிங்ஸைத் தொடர்ந்த இந்திய அணி, ஆரம்ப துடுப்பாட்ட வீரர் லக்ஷியா ராய்ச்சாந்தனி ஆட்டமிழக்காமல் பெற்றுக்கொண்ட அபார சதத்தின் (100*) உதவியோடும் மனல் சௌஹானின் அரைச் சதத்தோடும் (51*) 3 விக்கெட்களை மட்டுமே இழந்து 208 ஓட்டங்கள் எடுத்திருந்த வேளையில் இன்னிங்ஸை இடைநிறுத்திக் கொண்டது.
இலங்கை சார்பாகப் பந்துவீச்சில் கவிஜ கமகே 2 விக்கெட்டுகளையும், விக்னேஸ்வரன் ஆகாஷ் ஒரு விக்கெட்டையும் கைப்பற்றினர்.
472 ஓட்டங்கள் என்ற கடினமான இலக்கை நோக்கி 2ஆவது இன்னிங்ஸில் துடுப்பெடுத்தாடிய இலங்கை இளையோர் அணி, அணித்தலைவர் விமத் தின்சரவின் 70 ஓட்டங்கள் மற்றும் செனுஜ வேக்குனாகொடவின் 64 ஓட்டங்கள் உதவியுடன் போராடி விளையாடிய போதிலும், இறுதியில் 260 ஓட்டங்களுக்கு அனைத்து விக்கெட்களையும் இழந்து தோல்வியைத் தழுவியது.
இலங்கையின் துடுப்பாட்டத்தில் கவிஜ கமகே 36 ஓட்டங்களையும், விரான் சமுதித்த 31 ஓட்டங்களையும் பெற்றனர். இந்திய அணி சார்பில் சிகுருபதி வெங்கடா 37 ஓட்டங்களுக்கு 3 விக்கெட்டுகளை வீழ்த்தி வெற்றிக்கு வழிவகுத்தார். இதன் மூலம் இந்திய இளையோர் அணி 211 ஓட்டங்கள் வித்தியாசத்தில் சிறப்பான வெற்றியைப் பதிவு செய்துள்ளது.
முன்னதாக, நடைபெற்ற 3 போட்டிகள் கொண்ட 2-1 என இலங்கை இளையோர் அணி கைப்பற்றியதுடன். 2 போட்டிகளைக் கொண்ட இளையோர் டெஸ்ட் தொடரின் முதல் போட்டி சமநிலையில் நிறைவுக்கு வந்தது.
>>மேலும் கிரிக்கெட் செய்திகளைப் படிக்க<<
