மஹவிதானவின் அதிரடிச் சதத்தால் இந்திய இளையோரை வீழ்த்தியது இலங்கை

இந்திய 19 வயதுக்குட்பட்ட அணிக்கு எதிராக ஹம்பாந்தோட்டையில் இன்று (06) நடைபெற்ற இரண்டாவது இளையோர் ஒருநாள் போட்டியில், இலங்கை 19 வயதுக்குட்பட்ட அணி 8 விக்கெட்டுகளால் அபார வெற்றி பெற்றுள்ளது.

இந்த வெற்றியைத் தொடர்ந்து 3 போட்டிகள் கொண்ட இளையோர் ஒருநாள் தொடர் தற்போது 1-1 என சமநிலை பெற்றுள்ளது.

இப்போட்டியில் நாணய சுழற்சியில் வென்று முதலில் துடுப்பெடுத்தாடிய இந்திய 19 வயதுக்குட்பட்ட அணி 47.2 ஓவர்களில் அனைத்து விக்கெட்டுகளையும் இழந்து 285 ஓட்டங்களைப் பெற்றது. இந்திய அணி தரப்பில் அதிரடியாக விளையாடிய அன்வே டிராவிட் 67 பந்துகளில் 87 ஓட்டங்களையும், அர்ஜுன் ராஜ்புத் 81 பந்துகளில் 76 ஓட்டங்களையும் பெற்றனர்.

இலங்கை அணியின் பந்துவீச்சில் மிரட்டிய கிம்ஹான் மெண்டிஸ் 41 ஓட்டங்களுக்கு 5 விக்கெட்டுகளைக் கைப்பற்றி அசத்தினார். கவிஜ கமகே 54 ஓட்டங்களுக்கு 2 விக்கெட்டுகளை வீழ்த்தினார்.

இதனையடுத்து 286 ஓட்டங்கள் என்ற கடினமான இலக்கை நோக்கிப் பதிலளித்துத் துடுப்பெடுத்தாடிய இலங்கை 19 வயதுக்குட்பட்ட அணி, 48 ஓவர்களிலேயே 2 விக்கெட்டுகளை மாத்திரம் இழந்து 291 ஓட்டங்களைப் பெற்று இலக்கை அடைந்தது.

>>செனுஜ, கவிஜவின் போராட்டம் வீண்; இலங்கையை வீழ்த்தியது இந்தியா U19 அணி<<

இலங்கை அணியின் வெற்றிக்குத் தூணாக நின்ற ஆரம்ப துடுப்பாட்ட வீரர் திமன்த மஹவிதான ஆட்டமிழக்காமல் 153 பந்துகளில் 155 ஓட்டங்களை விளாசி அணியை வெற்றிப் பாதைக்கு அழைத்துச் சென்றார். இதில் 5 சிக்ஸர்கள் மற்றும் 12 பவுண்டரிகள் அடங்கும். இவருக்குச் சிறந்த ஒத்துழைப்பு வழங்கிய செனுஜ வெக்குனாகொட 60 ஓட்டங்களையும், அணியின் தலைவர் விமத் தின்சர (ஆட்டமிழக்காமல் 56 ஓட்டங்களையும் பெற்றனர்.

இந்திய அணியின் பந்துவீச்சில் இஷான் சூட் மற்றும் ஷவின் வினோத் ஆகியோர் தலா ஒரு விக்கெட்டைக் கைப்பற்றினர்.

இந்தத் தொடரின் வெற்றியாளரைத் தீர்மானிக்கும் தீர்க்கமான மூன்றாவது மற்றும் இறுதி இளையோர் ஒருநாள் போட்டி 09ஆம் திகதி இதே மைதானத்தில் நடைபெறவுள்ளது.

>>மேலும் கிரிக்கெட் செய்திகளைப் படிக்க<<