டெஸ்ட் சம்பியன்ஷிப் தரவரிசையில் முன்னேறிய இலங்கை

295

பங்களாதேஷுக்கு எதிரான டெஸ்ட் தொடரை 1-0 என்ற கணக்கில் கைப்பற்றியதைத் தொடர்ந்து ஐ.சி.சி உலக டெஸ்ட் சம்பியன்ஷிப் புள்ளிகள் பட்டியலில் இலங்கை அணி நான்காவது இடத்திற்கு முன்னேறியுள்ளது.

இலங்கை கிரிக்கெட் அணி, பங்களாதேஷுக்கு சுற்றுப்பயணம் செய்து 2 போட்டிகள் கொண்ட டெஸ்ட் தொடரில் விளையாடியது.

ஐ.சி.சி உலக டெஸ்ட் சம்பியன்ஷிப் தொடரின் ஓர் அங்கமாக நடைபெற்ற இந்தத் தொடரின் முதலாவது டெஸ்ட் போட்டி சமநிலையில் நிறைவடைந்தது.

இந்த நிலையில் மிர்பூர், பங்ளா கிரிக்கெட் மைதானத்தில் நடைபெற்ற 2 ஆவதும் கடைசியுமான போட்டியில் இலங்கை அணி 10 விக்கெட்டுகளால் வெற்றிகொண்டு 2 போட்டிகள் கொண்ட டெஸ்ட் தொடரை 1-0 என கைப்பற்றியது.

இந்த வெற்றியுடன் 2 போட்டிகள் கொண்ட ஐ.சி.சி உலக டெஸ்ட் சம்பியன்ஷிப் தொடரை 1 – 0 என்ற கணக்கில் இலங்கை தனதாக்கிக்கொண்டது. அத்துடன், இந்த வெற்றிக்கான 12 டெஸ்ட் சம்பியன்ஷிப் புள்ளிகளைப் பெற்ற இலங்கை அணி தொடரில் மொத்தம் 18 புள்ளிகளைப் பெற்றது.

இதன்படி, இலங்கை அணி 55.56 புள்ளிகள் சதவீதத்துடன் பாகிஸ்தானை பின்னுக்குத் தள்ளி ஐ.சி.சி உலக டெஸ்ட் சம்பியன்ஷிப் புள்ளிகள் பட்டியலில் 4 ஆவது இடத்துக்கு முன்னேறி உள்ளது.

ஐ.சி.சி உலக டெஸ்ட் சம்பியன்ஷிப் தொடரின் கீழ் இதுவரை 6 டெஸ்ட் போட்டிகளில் விளையாடியுள்ள இலங்கை அணி, 3 வெற்றிகளுடன் 40 புள்ளிகளைப் பெற்றுக்கொண்டுள்ளமை குறிப்பிடத்தக்கது.

இந்தப் பட்டியலில் அவுஸ்திரேலிய அணி 75.0 புள்ளிகள் சதவீதத்துடன் முதலிடத்தில் உள்ளது. 71.43 புள்ளிகள் சதவீதத்துடன் தென்னாபிரிக்கா அணி 2 ஆவது இடத்திலும், 58.33 புள்ளிகள் சதவீதத்துடன் இந்திய அணி 3 ஆவது இடத்திலும் காணப்படுகிறது.

பாகிஸ்தான் அணி 52.38 புள்ளிகள் சதவீதத்துடன் பட்டியலில் 5 ஆவது இடத்தில் உள்ளது. நடப்பு சம்பியன் நியூசிலாந்து அணி 38.89 சதவீதத்துடன் 6 ஆவது இடத்தில் உள்ளது. அதனைத்தொடர்ந்து மேற்கிந்திய தீவுகள், பங்களாதேஷ் மற்றும் இங்கிலாந்து ஆகிய அணிகள் முறையே 7 முதல் 10 ஆவது இடங்களைப் பிடித்துள்ளது.

இதேவேளை, இலங்கை அணி அடுத்து அவுஸ்திரேலியா மற்றும் பாகிஸ்தான் ஆகிய அணிகளுடன் தலா 2 போட்டிகள் கொண்ட டெஸ்ட் தொடரில் சொந்த மண்ணில் விளையாடவுள்ளமை குறிப்பிடத்தக்கது.

>> மேலும் பல கிரிக்கெட் செய்திகளைப் படிக்க <<