LPL தொடரால் ஜிம்பாப்வே T20 தொடரை தவறவிடும் பங்களாதேஷ் வீரர்கள்

லங்கா பிரீமியர் லீக் (LPL) தொடரில் பங்கேற்பதற்காக பங்களாதேஷ் T20 அணியின் தலைவர் லிட்டன் தாஸிற்கு விடுப்பு வழங்கப்பட்டதை அடுத்து, ஜிம்பாப்வேக்கு எதிரான T20 தொடரில் பங்களாதேஷ் தரப்பின் தலைவராக தவ்ஹீத் ரிதோய் பெயரிடப்பட்டுள்ளார்.

>>மேற்கிந்திய தீவுகள் ஒருநாள் தொடருக்கான நியூசிலாந்து குழாம் வெளியீடு<<

ஜிம்பாப்வே சென்றிருக்கும் பங்களாதேஷ் கிரிக்கெட் அணி அங்கே மூவகைப் போட்டிகள் கொண்ட கிரிக்கெட் தொடர்களிலும் ஆடுகின்றது. இதில் டெஸ்ட் போட்டி நிறைவடைந்து ஒருநாள் தொடர் அடுத்ததாக ஆரம்பமாகவிருக்கும் நிலையில், அதன் பின்னர் T20 தொடர் இடம்பெறுகின்றது.

ஜூலை 15, 17 மற்றும் 19ஆம் திகதிகளில் புலவாயோவில் நடைபெறவிருக்கும் இந்த T20I தொடர், லங்கா பிரீமியர் லீக் தொடர் (LPL) அதே காலப்பகுதியில் இடம்பெறுவதன் காரணமாக குறிப்பிட்ட தொடரில் பங்கெடுக்கும் பங்களாதேஷ் அணிக்குழாத்தில் சில வீரர்களின் மாற்றம் நடைபெற்றுள்ளது.

முன்னர் குறிப்பிட்டதன் அடிப்படையில் இந்த தொடரில் பங்களாதேஷ் அணியின் தலைவராக செயற்படும் லிட்டன் தாஸ், LPL தொடரில் பங்கெடுப்பதனால் அவருக்கு ஜிம்பாப்வே தொடரில் விடுகை வழங்கப்பட்டுள்ளது.

பங்களாதேஷ் அணியின் முக்கிய வீரர்களான தஸ்கின் அஹமட் மற்றும் மெஹிதி ஹஸன் சிராஸ் ஆகியோருக்கும் LPL கடமைகளை நிறைவேற்ற அனுமதி வழங்கப்பட்டுள்ளது.

மறுமுனையில் மொசாதிக் ஹொசைன் மீண்டும் அணியில் சேர்க்கப்பட்டுள்ளார். அத்துடன் சுமார் மூன்று ஆண்டுகள் இடைவெளியின் பின்னர் யாசிர் அலியும் T20 அணிக்குத் திரும்பியுள்ளார். அதேநேரத்தில் துடுப்பாட்டத்தில் சோபிக்கத் தவறிய ஷமீம் ஹொசைனுக்கு ஜிம்பாப்வே தொடரில் ஓய்வு அளிக்கப்பட்டுள்ளது.

பங்களாதேஷ் T20 குழாம்:

தவ்ஹித் ரிதோய் (தலைவர்), பர்வேஸ் ஹொசைன், தன்சித் ஹஸன், மொஹமட் ஷைப் ஹஸ்ஸன், மொசாதிக் ஹொசைன், யாசிர் அலி, காஸ்ஸி நூருல் ஹசன், மஹெதி ஹஸன், நசும் அஹமட், ரிஷாத் ஹொசைன், ஷொரிபுல் இஸ்லாம், முஸ்தபிசூர் ரஹ்மான், நஹிட் ரனா, மொஹமட் சைபுத்தீன், அப்துல் கப்பார் சக்லைன்.

>>மேலும் கிரிக்கெட் செய்திகளைப் படிக்க<<