இலங்கையில் இடம்பெறும் முதல்தர ரக்பி போட்டியான டயலொக் ரக்பி லீக்கின் இரண்டாம் கட்டப் போட்டிகள் இன்று ஆரம்பமாகின்றன. எனவே அனைத்து அணிகளும் தீர்மானம் மிக்க இந்த சுற்றை வெற்றியுடன் ஆரம்பிக்க காத்திருக்கின்றன.
தரவரிசையில் முதலாம் நிலையிலுள்ள ஹெவலொக் அணி இறுதி நிலையிலுள்ள CH&FC அணியுடன் 29ஆம் திகதி மோதவுள்ளது. 30ஆம் திகதி கடற்படை அணி பொலிஸ் அணியை எதிர்கொள்ளவுள்ளதுடன், அதே தினத்தில் CR&FC அணி விமானப்படை அணியுடன் பலப்பரீட்சை நடத்தவுள்ளது. 31ஆம் திகதி இடம்பெறும் கண்டி விளையாட்டுக் கழகம் மற்றும் இராணுவப்படை அணிகளுக்கிடையிலான போட்டியுடன் இவ்வாரப் போட்டிகள் நிறைவடையும்.
CH&FC எதிர் ஹெவலொக்
காலம்: 29.12.2016 (வியாழக்கிழமை)
நேரம்: பி.ப. 4.00
இடம்: CR&FC மைதானம்
இந்த பருவகாலப் போட்டிகளில் தொடர்ந்து சிறப்பாக விளையாடி வந்த ஹெவலொக் அணி கடந்த போட்டியில் முதன்முறையாக கண்டி விளையாட்டுக் கழகத்துடன் தோல்வியை தழுவியது. எனினும் மீண்டும் தனது வெற்றியோட்டத்தை தொடரும் நோக்கில் ஹெவலொக் அணி, மோசமான ஆட்டத்தின் காரணமாக தடுமாறி வரும் CH&FC அணியுடனான போட்டியில் இவ்வாரம் களமிறங்கவுள்ளது.
முதற் சுற்று போட்டி முடிவு : ஹெவலொக்ஸ் 48 – 05 CH&FC
கவனிக்கத்தக்க வீரர்கள்
கசுன் ஸ்ரீநாத் CH&FC அணி சார்பில் சகல துறைகளிலும் திறமையை வெளிக்காட்டியிருந்தார். இரண்டாம் சுற்றில் இவரது பங்களிப்பு அணிக்கு அத்தியவசியமாக அமையும்.
விஷ்வ தினித் பல போட்டிகளில் மாற்று வீரராக களமிறங்கிய போதிலும், கிடைத்த அனைத்து வாய்ப்புக்களையும் தனது உதைக்கும் திறனைக் கொண்டு சிறப்பாக செயற்பட்ட ஒருவர்.
ஷாரோ பெர்னாண்டோ முதற் கட்ட போட்டிகளில் ஹெவலொக் அணியின் நம்பிக்கைகைக்குரிய வீரர்களில் ஒருவராக காணப்பட்டார். இவர் இரண்டாவது சுற்றுப் போட்டிகளிலும் தனது திறமையை வெளிக்காட்டுவார் என எதிர்பார்க்கப்படுகிறது.
ஹெவலொக் கழகத்தின் உதைக்கும் வீரரான துலாஜ் பெரேரா உபாதையில் இருந்து மீண்டு வந்த நிலையில் அபாரமான ஆட்டத்தை வெளிப்படுத்தியிருந்தார். இதுவரை மொத்தமாக 92 புள்ளிகளை பெற்றுத் கொடுத்துள்ள இவர், இரண்டாம் சுற்றில் ஹெவலொக் அணியின் முக்கியமான வீரர்களில் ஒருவராவார்.
கடற்படை அணி எதிர் பொலிஸ் அணி
காலம்: 30.12.2016 (வெள்ளிக்கிழமை)
நேரம்: பி.ப. 4.00
இடம்: வெலிசர கடற்படை மைதானம்
தரவரிசையில் முதலாம் இடத்தை ஹெவலொக் அணியிடமிருந்து தட்டிப்பறிக்கும் நோக்குடன் கடற்படை அணி களமிறங்கவுள்ளது. இதேவேளை முதற்கட்ட போட்டிகளில் ஒரே ஒரு வெற்றியை மாத்திரம் பெற்றுக் கொண்ட பொலிஸ் அணி, இச்சுற்றில் முன்னேற்றகரமான ஆட்டத்தை வெளிப்படுத்தும் நோக்கில் இப்போட்டிக்குள் பிரவேசிக்கின்றது.
முதற் சுற்று போட்டி முடிவு: கடற்படை அணி 29 – 08 பொலிஸ் அணி
கவனிக்கத்தக்க வீரர்கள்
கடந்த பருவகாலத்தில் அதிக புள்ளிகளை பெற்றுக் கொண்ட திலின வீரசிங்க இம்முறை பலராலும் எதிர்பார்க்கப்பட்ட வீரராக இருந்தார். எனினும் முதற்கட்ட போட்டிகளில் குறிப்பிட்டுக் கூறும் வகையில் திறமையை வெளிக்காட்டாத போதிலும், கடற்படை அணியின் சம்பியன் கனவை தக்கவைத்துக் கொள்ள வேண்டுமாயின் இவரின் பங்களிப்பு அத்தியாவசியமானதாக இருக்கும்.
ஸ்க்ரம்களில் சிறப்பாக செயற்பட்டு அணிக்கு பலம் சேர்த்த துலாஞ்சன விஜேசிங்க, இதுவரை 6 ட்ரைகளை வைத்துள்ளார். எதிரணியால் முக்கியமாக இலக்கு வைக்கப்படும் இவரது பங்களிப்பும் அணிக்கு முக்கியமானதாக அமையும்.
முதற்கட்ட போட்டிகளில் மட்டுமன்றி கடந்த சில வருடங்களாக பொலிஸ் அணியின் நம்பிக்கைக்குரிய வீரராக ரதீஷ செனவிரத்ன திகழ்கின்றார். முன்வரிசை வீரரான ரதீஷவின் உதவியுடன் தரவரிசைப் பட்டியலில் முன்னேற்றத்தை காணும் எதிர்பார்ப்புடன் பொலிஸ் அணி உள்ளது.
இப்பருவகாலத்தில் குறிப்பிடத்தக்க ஒரே பின்வரிசை வீரராக ராஜித சன்சொனி காணப்படுகின்றார். புல் பெக் மற்றும் ப்ளை ஹாப் நிலைகளில் விளையாடக்கூடிய ராஜித அணியை தோல்விப்பாதையிலிருந்து மீட்டெடுக்கும் நோக்கில் களமிறங்கவுள்ளார்.
விமானப்படை அணி எதிர் CR&FC
காலம்: 30.12.2016 (வெள்ளிக்கிழமை)
நேரம்: பி.ப. 4.00
இடம்: விமானப்படை மைதானம்
முதற்கட்ட போட்டிகளில் பிரபல அணிகளுக்கு பலத்த சவாலாக அமைந்த போதிலும், விமானப்படை அணி தனது இறுதிப்போட்டியில் தோல்வியை தழுவியது. இவ்விரு அணிகளுக்கிடையிலான போட்டி விறுவிறுப்பானதொன்றாக அமையும் என எதிர்பார்க்கப்படுகின்றது.
முதற் சுற்று போட்டி முடிவு: CR&FC 57 – 20 விமானப்படை அணி
கவனிக்கத்தக்க வீரர்கள்
விமானப்படை அணி இப்போட்டியில் சிறப்பான ஆட்டத்தை வெளிப்படுத்துவதாயின், கயந்த இத்தமல்கொடவின் பங்களிப்பு கட்டாயமானதாக இருக்கும். சில போட்டிகளில் பலரது கவனத்தையும் ஈர்த்த இத்தமல்கொட, தனது சிறப்பாட்டத்தை தொடர்வார் எனவே பலரும் எதிர்பார்த்துள்ளனர்.
இளம் ஸ்க்ரம் ஹாப் வீரர் அஷோக் விஜேகுமார் இலங்கை கனிஷ்ட அணியிலிருந்து மீண்டும் விமானப்படை அணிக்கு திரும்பவுள்ளார். இவரது வருகை விமானப்படை அணிக்கு பலமாக அமையும் என்பது உறுதி.
முதற்கட்டத்தில் அபாரமான ஆட்டத்தை வெளிக்காட்டி வந்த தரிந்த ரத்வத்த, ப்ளை ஹாப் நிலையிலிருந்து சென்டர் நிலைக்கு மாறியதன் பின்னர் அடுத்தடுத்து ட்ரைகள் வைத்து அசத்தினார். தனது அணியை வெற்றிப்பாதைக்கு அழைத்து செல்லும் முக்கிய வீரராக இவர் இருக்கின்றார் என்பதற்கு கடந்த போட்டிகள் சிறந்த சான்றாக இருந்தது.
CR&FC அணியின் தலைவர் ஷேன் சம்மந்தப்பெரும தனது அணியை சிறப்பாக வழிநடத்திவந்துள்ளார். ஆரம்பத்தில் சற்று மந்தமான ஆட்டத்தை வெளிக்காட்டிய போதிலும், முதற்கட்டத்தின் இறுதியில் CR அணி தனது முழுத்திறமையுடனும் சிறப்பான ஆட்டத்தை வெளிப்படுத்தியிருந்தது.
கண்டி விளையாட்டுக் கழகம் எதிர் இராணுவ அணி
காலம்: 31.12.2016 (சனிக்கிழமை)
நேரம்: பி.ப. 4.00
இடம்: நித்தவலை மைதானம்
நடப்பு சம்பியனான கண்டி அணி தனது பட்டத்தை தக்கவைத்துக்கொள்ள வேண்டுமாயின் இரண்டாம் கட்டத்தில் அனைத்து போட்டிகளிலும் வெற்றிபெற வேண்டிய நிலைக்கு தள்ளப்பட்டுள்ளது. இதேவேளை, சிறப்பாக விளையாடிய போதிலும் துரதிஷ்டவசமாக 5 போட்டிகளில் தோல்வியை தழுவியுள்ள இராணுவ அணி, கண்டி அணிக்கு அழுத்தம் கொடுக்கும் நோக்கிலே களமிறங்கவுள்ளது.
முதற் சுற்று போட்டி முடிவு: கண்டி கழகம் 34 – 10 இராணுவ அணி
கவனிக்கத்தக்க வீரர்கள்
கண்டி அணியுடனான தனது முதல் பருவகாலத்திலே சிறப்பான ஆட்டத்தை வெளிப்படுத்திய தனுஷ்க ரஞ்சன், இதுவரை 8 ட்ரைகளை வைத்து அசத்தியுள்ளார். இரண்டாம் கட்டப் போட்டிகளிலும் இவர் தனது சிறப்பாட்டத்தை தொடர்வார் எனின் அது கண்டி அணியின் சம்பியன் கனவை அடைவதற்கு சிறந்த பங்களிப்பாக இருக்கும்.
கடந்த பருவகாலத்தை போன்றே இம்முறையும் பிரகாசித்து வருகின்ற ரிச்சர்ட் தர்மபால அதிக ட்ரைகளை பெற்றோரின் தரவரிசையில் இரண்டாம் இடத்திலுள்ளார். கண்டி அணியின் எதிர்பார்ப்புக்களை தக்கவைத்துக்கொள்வதில் இவரது பங்களிப்பு முக்கியமாக அமையும்.
முன்னாள் அணித்தலைவர் அஷோக ஜெயலால் முதற் கட்ட போட்டிகளில் இராணுவ அணி சார்பாக அற்புதமாக விளையாடியிருந்தார். இராணுவ அணியை மீண்டும் வெற்றிப்பாதைக்கு இட்டுச் செல்ல முன்வரிசை வீரரான அஷோக ஜெயலால் தனது முழுப்பலத்துடன் களமிறங்கவுள்ளார்.
இராணுவ அணியின் தற்போதைய தலைவரான மனோஜ் சில்வா பின்வரிசையிலிருந்தபடி அணியை வழிநடத்தவுள்ளார். இரண்டாம் சுற்றில் இராணுவ அணியின் வாய்ப்புக்கள் மனோஜ் சில்வாவின் ஆட்டத்திலேயே தங்கியுள்ளது.
தரவரிசைப்பட்டியல்
