மாலைத்தீவுகளை வீழ்த்திய இலங்கைக்கு முதல் வெற்றி

CAVA Women's Volleyball Challenge Cup 2023

69

நேபாளத்தில் நடைபெற்று வரும் மத்திய ஆசிய கரப்பந்தாட்ட சம்மேளன (CAVA) மகளிர் கரப்பந்தாட்ட சவால் கிண்ணத்தில் புதன்கிழமை (24) நடைபெற்ற மாலைத்தீவுகள் அணிக்கு எதிரான தங்களுடைய கடைசி குழுநிலை போட்டியை இலங்கை மகளிர் அணி 3-0 என கைப்பற்றி தொடரில் முதல் வெற்றியை பதிவுசெய்தது.

முதல் இரண்டு போட்டிகளில் சிறந்த போட்டியை கொடுத்து தோல்வியடைந்திருந்த இலங்கை மகளிர் அணி, இன்றைய போட்டியில் மிகச்சிறப்பாக ஆடியிருந்தது.

>>விறுவிறுப்பான போட்டியில் தோல்வியடைந்த இலங்கை மகளிர் அணி<<

ஆட்டத்தின் முதல் செட்டை 25-18 என்ற புள்ளிகள் கணக்கில் வெற்றிக்கொண்ட இலங்கை மகளிர் அணி, இரண்டாவது செட்டிலும் அபாரமாக ஆடி புள்ளிகளை பெற்றுக்கொண்டது. அதன்படி இரண்டாவது செட்டை 25-13 என்ற புள்ளிகள் கணக்கில் இலகுவாக இலங்கை அணி வெற்றிக்கொண்டது.

அடுத்து நடைபெற்ற மூன்றாவது செட்டில் மாலைத்தீவுகள் அணி சற்று சவாலான ஆட்டத்தை வெளிப்படுத்தியது. இறுதிவரை விறுவிறுப்பாக நடைபெற்ற இந்த செட்டை இலங்கை அணி 26-24 புள்ளிகள் கணக்கில் வெற்றிபெற்று 3-0 என போட்டியை தமதாக்கியது.

எனவே இந்தப் போட்டியில் வெற்றிபெற்ற இலங்கை மகளிர் அணி 2 புள்ளிகளுடன் குழு Bயில் மூன்றாவது இடத்தை பிடித்துக்கொண்டமை குறிப்பிடத்தக்கதாகும்.

ஏனைய போட்டி முடிவுகள்

கிரிகிஸ்தான் எதிர் பங்களாதேஷ் (குழு A)

பங்களாதேஷ் மகளிர் அணிக்கு எதிரான தங்களுடைய கடைசி குழு நிலை போட்டியில் விளையாடிய கிரிகிஸ்தான் அணி 3-0 என வெற்றியை பதிவுசெய்தது.

முதலிரண்டு போட்டிகளிலும் இந்தியா மற்றும் நேபாளம் அணிகளிடம் தோல்வியடைந்த கிரிகிஸ்தான் அணி 25-16, 25-11 மற்றும் 25-20 என்ற புள்ளிகள் கணக்கில் இலகு வெற்றியை பெற்றுக்கொண்டது.

கஸகஸ்தான் எதிர் உஸ்பெகிஸ்தான் (குழு B)

குழு Bயில் தங்களுடைய முதல் இரண்டு போட்டிகளிலும் வெற்றிபெற்றிருந்த கஸகஸ்தான் மற்றும் உஸ்பெகிஸ்தான் அணிகளுக்கு இடையிலான இன்றைய மூன்றாவது போட்டியில் கஸகஸ்தான் அணி 3-1 என்ற செட்கள் கணக்கில் வெற்றியீட்டியது.

போட்டியின் முதல் செட்டை உஸ்பெகிஸ்தான் அணி 26-24 என திரில் வெற்றி பெற்றிருந்த போதும், அடுத்த மூன்று செட்களையும் 25-16, 25-11 மற்றும் 25-18 என்ற புள்ளிகள் கணக்கில் கஸகஸ்தான் அணி வெற்றிபெற்று புள்ளிப்பட்டியலில் முதலிடத்தை தக்கவைத்துக்கொண்டது.

>>WATCH – பாகிஸ்தானின் இலங்கை சுற்றுப்பயணத்தில் முக்கிய மாற்றம்?<<

இந்தியா எதிர் நேபாளம் (குழு A)

இந்தியா மற்றும் நேபாளம் அணிகளுக்கு இடையில் விறுவிறுப்பாக நடைபெற்ற இந்தப் போட்டியில் 3-1 என்ற செட்கள் கணக்கில் இந்திய அணி தங்களுடைய மூன்றாவது வெற்றியை பதிவுசெய்தது.

போட்டியின் முதல் இரண்டு செட்களையும் 25-12 மற்றும் 26-24 என கைப்பற்றிய இந்திய அணி மூன்றாவது செட்டில் 25-21 என தோல்வியை சந்தித்தது. எனினும் அடுத்த செட்டில் 25-21 என்ற புள்ளிகள் கணக்கில் வெற்றிபெற்ற இந்திய அணி மூன்றாவது வெற்றியுடன் குழுவில் முதலிடத்தை பிடித்துக்கொண்டது.

>> மேலும் பல விளையாட்டு செய்திகளைப் படிக்க <<