ஐசிசி மகளிர் வளர்ந்து வரும் நாடுகளுக்கான கிண்ணத் தொடரின் சுப்பர் சிக்ஸ் சுற்றில் நெதர்லாந்து மகளிர் அணியை 9 விக்கெட்டுகளால் இலங்கை மகளிர் அணி இலகுவாக வீழ்த்தியது.
ஐக்கிய அரபு இராச்சியத்தின் அஜ்மான் செவன் டிஸ்ட்ரிக்ட்ஸ் விளையாட்டுக் கழக மைதானத்தில் இன்று (22) நடைபெற்ற இப்போட்டியில், முதலில் துடுப்பெடுத்தாடிய நெதர்லாந்து மகளிர் அணி இலங்கை பந்துவீச்சாளர்களின் துல்லியமான தாக்குதலுக்கு ஈடுகொடுக்க முடியாமல் 17.4 ஓவர்களில் சகல விக்கெட்டுகளையும் இழந்து 57 ஓட்டங்களை மாத்திரமே பெற்றுக்கொண்டது.
நெதர்லாந்து அணி சார்பில் ஸ்டெர்ரே காலிஸ் 40 பந்துகளில் 26 ஓட்டங்களையும், ஐரிஸ் ஸ்வில்லிங் 22 பந்துகளில் 14 ஓட்டங்களையும் அதிகபட்சமாகப் பெற்றனர்.
இலங்கை அணியின் பந்துவீச்சில் கவிஷா தில்ஹாரி 8 ஓட்டங்களுக்கு 2 விக்கெட்டுகளையும், நிமேஷா மீபகே 13 ஓட்டங்களுக்கு 2 விக்கெட்டுகளையும் கைப்பற்றி நெதர்லாந்து அணியின் ஓட்ட வேகத்தைக் கட்டுப்படுத்தினர்.
இதனையடுத்து 58 ஓட்டங்கள் என்ற மிக இலகுவான வெற்றி இலக்கை நோக்கிப் பதிலுக்குத் துடுப்பெடுத்தாடிய இலங்கை மகளிர் அணி, 7.2 ஓவர்களில் ஒரு விக்கெட்டை மாத்திரம் இழந்து 58 ஓட்டங்களைப் பெற்று அபார வெற்றி பெற்றது.
- சகலதுறையிலும் பிரகாசித்த இலங்கை மகளிருக்கு ஐந்தாவது வெற்றி
- விஷ்மியின் ஹெட்ரிக் அரைச் சதத்துடன் இலங்கை மகளிருக்கு 4ஆவது வெற்றி
- விஷ்மியின் அதிரடியில் இலங்கை மகளிருக்கு மூன்றாவது வெற்றி
இலங்கை அணிக்காக ஆட்டமிழக்காமல் சிறப்பாகத் துடுப்பெடுத்தாடிய விஷ்மி குணரட்ன 23 பந்துகளில் 29 ஓட்டங்களையும், ஹர்ஷிதா சமரவிக்ரம 14 பந்துகளில் 21 ஓட்டங்களையும் குவித்து அணியின் வெற்றியை விரைவாக உறுதி செய்தனர். நெதர்லாந்து பந்துவீச்சில் ஐரிஸ் ஸ்வில்லிங் 16 ஓட்டங்களுக்கு ஒரு விக்கெட்டை வீழ்த்தினார்.
இத்தொடரில் பந்துவீச்சில் தொடர்ந்து பிரகாசித்து வருகின்ற கவிஷா தில்ஹாரி, ஐக்கிய அரபு இராச்;சியம் மற்றும் ஜிம்பாப்வே ஆகிய அணிகளுக்கு எதிரான போட்டிகளைத் தொடர்ந்து, இப்போட்டியிலும் ஆட்ட நாயகி விருதை வென்று அசத்தினார்.
இதனிடையே, இந்தத் தொடரில் ஸ்கொட்லாந்து, அயர்லாந்து, பப்புவா நியூகினி, ஐக்கிய அரபு இராச்சியம், ஜிம்பாப்வே மற்றும் நெதர்லாந்து ஆகிய அணிகளைத் தொடர்ச்சியாக வீழ்த்தி, ஒரு தோல்வியைக் கூட சந்திக்காமல் இலங்கை மகளிர் அணி இறுதிப்போட்டிக்குத் தகுதி பெற்றுள்ளமை குறிப்பிடத்தக்கது.
இதனிடையே, இலங்கை மகளிர் அணி, சுப்பர் சிக்ஸ் சுற்றின் தனது கடைசிப் போட்டியில் பாகிஸ்தான் மகளிர் அணி நாளை (23) எதிர்கொள்ளவுள்ளது.
போட்டியின் சுருக்கம்
நெதர்லாந்து மகளிர் – 57 (17.4 ஓவர்கள்): ஸ்டெர்ரே காலிஸ் 26, ஐரிஸ் ஸ்வில்லிங் 14, கவிஷா தில்ஹாரி 2/8, நிமேஷா மீபகே 2/13
இலங்கை மகளிர் – 58/1 (7.2 ஓவர்கள்): விஷ்மி குணரட்;ன 29*, ஹர்ஷிதா சமரவிக்ரம 21*, ஐரிஸ் ஸ்வில்லிங் 1/16
முடிவு: இலங்கை மகளிர் அணி 9 விக்கெட்டுகளால் வெற்றி பெற்றது.






















