கத்தாரில் நடைபெற்று வருகின்ற ‘ஏசிசி ரைசிங் ஸ்டார்ஸ்’ வளர்ந்து வரும் ஆசியக் கிண்ணத் தொடரின் A குழுவிற்கான மற்றுமொரு போட்டியில் ஹொங்கொங் அணியை 24 ஓட்டங்களால் வீழ்த்தி இலங்கை A அணி த்ரில் வெற்றி பெற்றுள்ளது.
தோஹாவில் உள்ள யுனிவஸ்சிட்டி ஒப் தோஹா சயன்ஸ் எண்ட் டெக்னொலஜ்ஜி iமானத்தில் நேற்று (21) நடைபெற்ற இப்போட்டியில், நாணயச் சுழற்சியில் வென்று முதலில் துடுப்பெடுத்தாடிய இலங்கை A அணி நிர்ணயிக்கப்பட்ட 50 ஓவர்கள் நிறைவில் 9 விக்கெட்டுகளை இழந்து 284 ஓட்டங்களைக் குவித்தது.
இலங்கை A அணி சார்பில் லசித் குரூஸ்புள்ளே 70 பந்துகளில் 75 ஓட்டங்களையும், நிஷான் மதுஷ்க 83 பந்துகளில் 64 ஓட்டங்களையும் அதிகபட்சமாகப் பெற்றனர். இவர்களுக்குத் துணையாக ஜனித் லியனகே 33 பந்துகளில் 52 ஓட்டங்களையும், அணித் தலைவர் பவன் ரத்நாயக்க 50 பந்துகளில் 51 ஓட்டங்களையும் வேகமாகக் குவித்து அணியின் ஓட்ட எண்ணிக்கையை உயர்த்தினர்.
ஹொங்கொங் அணியின் பந்துவீச்சில் ஐசாஸ் கான் 61 ஓட்டங்களுக்கு 3 விக்கெட்டுகளைக் கைப்பற்றினார்.
285 ஓட்டங்கள் என்ற சவாலான வெற்றி இலக்கை நோக்கிப் பதிலுக்குத் துடுப்பெடுத்தாடிய ஹொங்கொங் அணிக்கு 2ஆவது விக்கெட்டுக்காக ஜோடி சேர்ந்த அன்ஷி ரத் மற்றும் பாபர் ஹயாத் மிகச் சிறந்த இணைப்பாட்டத்தை வழங்கினர். இவர்கள் இருவரும் 2-ஆவது விக்கெட்டுக்காக 200 பந்துகளில் 170 ஓட்டங்களை இணைப்பாட்டத்தைப் பகிர்ந்து கொண்டு, ஹொங்கொங் அணியை வெற்றியை நோக்கி அழைத்துச் சென்றனர்.
>>ஆப்கானிஸ்தானுக்கு எதிராக இலங்கை A அணிக்கு இலகு வெற்றி<<
எனினும், போட்டியின் 34ஆவது ஓவரின் இரண்டாவது பந்தில், 114 பந்துகளில் 86 ஓட்டங்களைப் பெற்றிருந்த பாபர் ஹயாத்தை, நிபுன் தனஞ்சய ரன் அவுட் மூலம் ஆட்டமிழக்கச் செய்தார். இதில் பாபர் ஹயாத் 114 பந்துகளை எதிர்கொண்டு 7 பவுண்டரிகள் மற்றும் 3 சிக்ஸர்கள் அடங்கலாக 86 ஓட்டங்களைப் பெற்று இன்னிங்ஸின் அதிகபட்ச ஓட்டங்களைக் குவித்த வீரராக மாறினார்.
அதனைத் தொடர்ந்து வீசப்பட்ட 6-ஆவது பந்தில் அன்ஷி ரத்தும் ஆட்டமிழந்து வெளியேறினார். அப்போது அவர் 91 பந்துகளை எதிர்கொண்டு 3 பவுண்டரிகள் மற்றும் 3 சிக்ஸர்கள் அடங்கலாக 75 ஓட்டங்களைப் பெற்றிருந்தார். அதன் பின்னர் ஹொங்கொங் அணியின் விக்கெட்டுகள் ஒன்றன்பின் ஒன்றாக வேகமாகச் சரிந்தன.
தொடர்ந்து வந்த ஐசாஸ் கான் 27 பந்துகளை எதிர்கொண்டு 2 சிக்ஸர்கள் அடங்கலாக 29 ஓட்டங்களையும், அப்துல் சமத் 24 பந்துகளை எதிர்கொண்டு ஒரு சிக்ஸர் அடங்கலாக 21 ஓட்டங்களையும் பெற்றுக்கொண்டனர்.
பந்துவீச்சில் துலாஜ் சமுதித்த 33 ஓட்டங்களுக்கு 3 விக்கெட்டுகளை வீழ்த்தி இன்னிங்ஸின் சிறந்த பந்துவீச்சைப் பதிவு செய்தார். இவரைத் தவிர விஜயகாந்த் வியாஸ்காந்த் மற்றும் வனுஜ சஹன் ஆகியோர் தலா 2 விக்கெட்டுகளைக் கைப்பற்றினர்.
போட்டியின் ஆட்டநாயகனாக லசித் குரூஸ்புள்ளே தெரிவானார்.
இத்தொடரில் இலங்கை A அணி பங்கேற்கும் அடுத்த போட்டி பங்களாதேஷ் A அணியுடன் நாளை (23) வெஸ்ட் எண்ட் பார்க் மைதானத்தில் நடைபெறவுள்ளது.
போட்டியின் சுருக்கம்
இலங்கை A அணி – 284/9 (50 ஓவர்கள்) லசித் குரூஸ்புள்ளே 75, நிஷான் மதுஷ்க 64, ஜனித் லியனகே 52, பவன் ரத்நாயக்க 51, ஐசாஸ் கான் 3/61
ஹொங்கொங் அணி – 260/9 (50 ஓவர்கள்) பாபர் ஹயாத் 86, அன்ஷி ரத் 75, துலாஜ் சமுதித்த 3/33, வனுஜ சஹன் 2/42, விஜயகாத் வியாஸ்காந்த் 1/42
முடிவு: இலங்கை A அணி 24 ஓட்டங்களால் வெற்றி பெற்றது.






















