விஷ்மியின் அதிரடியில் இலங்கை மகளிருக்கு மூன்றாவது வெற்றி 

ஐசிசி மகளிர் வளர்ந்து வரும் நாடுகளுக்கான கிண்ணத் தொடரில் பப்புவா நியூ கினியா மகளிர் அணிக்கு எதிராக இன்று (15) நடைபெற்ற போட்டியில் 67 ஓட்டங்களால் இலங்கை அணி வெற்றியீட்டியது.

விஷ்மி குணரட்ன மற்றும் இமேஷா துலானியின் அபார துடுப்பாட்டம் சுகந்திகா குமாரி, சத்யா சந்தீபனி ஆகியோரின் துல்லியமான பந்துவீச்சுகள் என்பன இலங்கையின் வெற்றியில் முக்கிய பங்காற்றின.

ஓமானின் அஜ்மானில் நடைபெற்ற 12ஆவது லீக் போட்டியில் இலங்கை மற்றும் பப்புவா நியூ கினியா மகளிர் அணிகள் மோதிக்கொண்டன. இதில் நாணய சுழற்சியில் வென்ற பப்புவா நியூ கினியா மகளிர் அணி முதலில் பந்துவீசத் தீர்மானித்தது.

அதன்படி முதலில் துடுப்பெடுத்தாடிய இலங்கை மகளிர் அணி நிர்ணயிக்கப்பட்ட 20 ஓவர்களில் 5 விக்கெட் இழப்புக்கு 150 ஓட்டங்களைக் குவித்தது. இதில் அதிகபட்சமாக விஷ்மி குணரட்ன 48 பந்துகளில் 51 ஓட்டங்களையும், இமேஷா துலானி 21 பந்துகளில் 32 ஓட்டங்களையும் சேர்த்தனர்.

பப்புவா நியூ கினியா தரப்பில் நவோனி வாரே 3 விக்கெட்டுகளையும், பௌகே சியாகா ஒரு விக்கெட்டையும் கைப்பற்றினர்.

• அயர்லாந்து அணிக்கு எதிராக இலங்கைக்கு மகளிருக்கு வெற்றி ஆரம்பம்
• ஸ்கொட்லாந்தை வீழ்த்தி 2ஆது வெற்றியை பதிவு செய்தது இலங்கை மகளிர் அணி

பின்னர் 151 ஓட்டங்கள் என்ற வெற்றி இலக்கை நோக்கி ஆடிய பப்புவா நியூ கினியா மகளிர் அணி 20 ஓவர்களில் 9 விக்கெட் இழப்புக்கு 83 ஓட்டங்களை மட்டுமே எடுத்து தோல்வியைச் சந்தித்தது. அந்த அணியில் பௌகே சியாகா 25 ஓட்டங்களையும், நவோனி வாரே 15 ஓட்டங்களையும் எடுத்தனர்.

இலங்கை அணியின் பந்துவீச்சில் சுகந்திகா குமாரி மற்றும் சத்யா சந்தீபனி ஆகியோர் தலா 2 விக்கெட்டுகளை வீழ்த்தினர்.

இப்போட்டியில் சிறப்பான ஆட்டத்தை வெளிப்படுத்தி அரைச் சதம் அடித்து டி20 சர்வதேசப் போட்டிகளில் 1000 ஓட்டங்கள் மைல்கல்லை எட்டிய விஷ்மி குணரட்ன போட்டியின் நாயகியாகத் தெரிவு செய்யப்பட்டார்.

இந்தத் தொடரில் இலங்கை ஈட்டிய மூன்றாவது வெற்றி இதுவாகும். இதன் மூலம் குழு A இல் 3இல் ஆடி 2 வெற்றிகளைப் பெற்று 6 புள்ளிகளைப் பெற்றுக்கொண்டுள்ள இலங்கை மகளிர் அணி சுப்பர் சிக்ஸ் சுற்றுக்குத் தகுதி பெற்றுக்கொண்டது.

இலங்கை மகளிர் அணி, தனது நான்காவது மற்றும் கடைசி லீக் போட்டியில் நாளை (16) ஐக்கிய அரபு இராச்சியம் மகளிர் அணியை எதிர்கொள்ளவுள்ளது.

போட்டியின் சுருக்கம்

 

இலங்கை மகளிர் அணி – 150/5 (20) விஷ்மி குணரட்ன 51, இமேஷா துலானி 32, ஹசினி பெரேரா 20, நவோனி வாரே 3/17

 

பப்புவா நியூ கினியா மகளிர் அணி – 83/9 (20) பௌகே சியாகா 25, சுகந்திகா குமாரி 2/10, சத்யா சந்தீபனி 2/15

 

முடிவு – இலங்கை அணி 67 ஓட்டங்களால் வெற்றி பெற்றது

>>மேலும் கிரிக்கெட் செய்திகளைப் படிக்க<<