இலங்கை டெஸ்ட் அணித்தலைவர் பதவியிலிருந்து தனஞ்சய டி சில்வா விலகல்

இலங்கை டெஸ்ட் கிரிக்கெட் அணியின் தலைவர் பதவியிலிருந்து தனஞ்சய டி சில்வா உடனடியாக அமுலுக்கு வரும் விலகியிருப்பதாக தெரிவிக்கப்பட்டிருக்கின்றது.

>>பஹ்ரைன் கிரிக்கெட் அணிக்கு கரம் கொடுத்த இலங்கை கிரிக்கெட்<<

தான் அணித்தலைவர் பதவியிலிருந்து விலகுவது தொடர்பில் கருத்து வெளியிட்டுள்ள தனஞ்சய டி சில்வா, “அணித் தலைமைப் பொறுப்பு அடுத்த தலைமுறை வீரர்களுக்குச் செல்ல வேண்டும் எனக் கருதுகின்றேன். ” எனக் குறிப்பிட்டுள்ளார்.

அதேநேரம் ஒரு வீரராக இலங்கை அணிக்காகத் தொடர்ந்து விளையாடத் தயாராக இருப்பதாகவும் அவர் உறுதிப்படுத்தியுள்ளார். தனஞ்சய டி சில்வாவின் இந்த முடிவை ஏற்றுக்கொண்டுள்ள இலங்கை கிரிக்கெட் நிர்வாகம், அவர் தொடர்ந்து ஒரு வீரராக அணியில் நீடிப்பதை வரவேற்பதாகவும் தெரிவித்துள்ளது.

அணித்தலைவர் பதவியில் இருந்து விலகும் விடயம் குறித்து கருத்து வெளியிட்டுள்ள இலங்கை கிரிக்கெட் சபையின் பிரதம நிறைவேற்று அதிகாரி (CEO) ஏஷ்லி டி சில்வா, “இலங்கை கிரிக்கெட் சபை அவரது எஞ்சிய கிரிக்கெட் வாழ்க்கைக்கு நல்வாழ்த்துகளைத் தெரிவித்துக் கொள்வதுடன், எமது டெஸ்ட் அணியை வழிநடத்தியமைக்காக அவருக்கு நன்றிகளையும் தெரிவித்துக் கொள்கின்றது.” எனக் கூறியுள்ளார்.

இலங்கை அணியானது அடுத்ததாக நவம்பர் மாதம் பாகிஸ்தானுடன் இரண்டு போட்டிகள் கொண்ட டெஸ்ட் தொடரில் ஆடவுள்ள நிலையில், இந்த தொடருக்கான குழாம் புதிய தலைவருடன் களமிறங்கும் என எதிர்பார்க்கப்படுகின்றது.

>>மேலும் கிரிக்கெட் செய்திகளைப் படிக்க<<