ரினோனை வீழ்த்தி 9 வெற்றிகளுடன் சுப்பர் 6 சுற்றில் அப்கண்ட்ரி லயன்ஸ்

சுப்பர் லீக்கில் நேற்று (13) நடைபெற்ற ரினோன் அணிக்கு எதிரான லீக் போட்டியில் அப்கண்ட்ரி லயன்ஸ் அணி 2-0 என்ற கோல்கள் கணக்கில் வெற்றியீட்டி தொடரில் தோல்வியடையாத அணியாக அடுத்தச் சுற்றுக்கு செல்கிறது.

கொழும்பு சுகததாஸ அரங்கில் நடைபெற்ற இந்தப் போட்டியின் முதல் பாதியை பொருத்தவரை இரண்டு அணிகளும் சிறப்பான ஆட்டத்தை வெளிப்படுத்தியிருந்தன.

>>இரண்டாவது பாதியில் போட்டியை சமப்படுத்திய ரெட் ஸ்டார்<<

இதில் ரினோன் அணி அதிகமான கோல் வாய்ப்புகளை ஏற்படுத்த தவறியபோதும், அப்கண்ட்ரி அணிக்கு ஆரம்பத்தில் கோல்களை வழங்காமல் பின்கள வீரர்கள் செயற்பட்டிருந்தார்கள். எனினும் அப்கண்ட்ரி அணி சில வாய்ப்புகளை ஏற்படுத்தியும் அதனை கோலாக மாற்றத் தவறியது.

எனினும் ஆட்டத்தின் 39ஆவது நிமிடத்தில் மொஹமட் ஆகிப் இலாவகமாக தட்டிக்கொடுத்த பந்தை, கோல் கம்பத்துக்குள் உதைத்து மொஹமட் இஷான் அணிக்கான முதல் கோலை பெற்றுக்கொடுக்க, முதல் பாதி 1-0 என நிறைவுக்கு வந்தது.

முதல் பாதி – அப்கண்ட்ரி லயன்ஸ் வி.க 1-0 ரினோன் வி.க

இரண்டாவது பாதியின் ஆரம்பத்திலிருந்து அப்கண்ட்ரி லயன்ஸ் அணி அதிகநேரம் பந்தினை தம்வசப்படுத்தி, கோல் முயற்சிகளை மேற்கொண்ட போதும், ரினோன் அணியின் பின்கள வீரர்கள் சிறப்பாக கோல் வாய்ப்புகளை தடுத்தனர். எனினும் பந்தினை தம்வசப்படுத்தி பந்து பரிமாற்றங்களை மேற்கொள்ளவும், கோல் வாய்ப்புகளை உருவாக்கவும் ரினோன் அணி தவறியிருந்தது.

எனினும் 30 நிமிடங்கள் கோல்களின்றி இரண்டாவது பாதி நகர்ந்த போதும், தங்களுக்கு கிடைத்த கோர்ணர் வாய்ப்பொன்றை பயன்படுத்திக்கொண்ட அப்கண்ட்ரி லயன்ஸ் அணி இரண்டாவது கோலையும் பதிவுசெய்தது. கோர்ணர் உதையின்போது,  கோல் காப்பாளரை நோக்கிச்சென்ற பந்து தடுக்கப்பட்ட போதும், துரதிஷ்டவசமாக பந்து மீண்டும் நேரடியாக மொஹமட் ஆகிப் அருகில் சென்றது. இதனை பயன்படுத்தக்கொண்ட ஆகிப் இலகுவாக பந்தினை கோல் கம்பத்துக்குள் செலுத்தினார்.

>>கொழும்பு எப்.சியை வீழ்த்தி எட்டாவது வெற்றியை பெற்ற அப்கண்ட்ரி லயன்ஸ்<<

இந்த கோல் பெறப்பட்ட தருணத்தில் ஏற்கனவே நடுவரிடம் மஞ்சள் அட்டையை பெற்றிருந்த ரினோன் அணியின் பயிற்விறுப்பாளர் பஷ்லூர் ரஹ்மான், மீண்டும் நடுவரிடம் வாக்குவாதத்தில் ஈடுபட்டதால், அவருக்கு சிவப்பு அட்டை காண்பிக்கப்பட்டு மைதானத்திலிருந்து வெளியேற்றப்பட்டார். இதன்பின்னர் பிற்றுவிப்பாளரின்றி விளையாடிய ரினோன் அணி கோல்களை பெற்றுக்கொள்ளாத நிலையில், ஆட்டம் 2-0 என நிறைவுக்கு வந்தது.

எனவே இந்தப் போட்டியில் வெற்றிபெற்ற அப்கண்ட்ரி லயன்ஸ் அணி தாம் விளையாடிய 9 போட்டிகளிலும் வெற்றிபெற்று புள்ளிப்பட்டியலில் முதலிடத்தை பிடித்து, 27 புள்ளிகளுடன் தோல்வியடையாத அணியாக சுப்பர் 6 சுற்றுக்கு தகுதிபெற்றுள்ளது. இதேவேளை சுப்பர் சிக்ஸ் தகுதியை தக்கவைத்துள்ள ரினோன் அணி 4 வெற்றிகளுடன் புள்ளிப்பட்டியலில் (14 புள்ளிகள்) மூன்றாவது இடத்தை பிடித்துள்ளமை குறிப்பிடத்தக்கது.

முழுநேரம் – அப்கண்ட்ரி லயன்ஸ் வி.க 2-0 ரினோன் வி.க

கோல் பெற்றவர்கள் – மொஹமட் இஷான் 39’, மொஹமட் ஆகிப் 76’

>> மேலும் கால்பந்து செய்திகளுக்கு <<