சரித் அசலன்கவின் அதிரடியில் வெற்றியடைந்த கோல் கெலன்ட்ஸ்

லங்கா பிரீமியர் லீக் (LPL) 2026 தொடரின் 19ஆவது போட்டியில், கோல் கெலன்ட்ஸ் அணியை 13 ஓட்டங்கள் வித்தியாசத்தில் கொழும்பு கேப்ஸ் அணியை வீழ்த்தியிருப்பதோடு, மொத்தம் 5 வெற்றிகளுடன் LPL அணிகள் புள்ளிகள் அட்டவணையில் முதல் இடத்தினையும் பெற்றுள்ளது.

>>9 வருடங்களின் பின்னர் இலங்கை வரும் இந்திய டெஸ்ட் குழாம்<<

இந்தப் போட்டியின் நாணய சுழற்சியில் வென்ற கொழும்பு கேப்ஸ் அணி முதலில் பந்துவீச்சை தெரிவு செய்தது. கோல் கெலன்ட்ஸ் அணியின் ஆரம்பவீரர்கள் பெரிதாக சோபிக்காத போதும் சரித் அசலங்க மூன்றாம் இலக்க வீரராக வந்து அபாரமாக விளையாடி அரைச்சதம் விளாசினார். கோல் அணியின் இறுதிப் போட்டியிலும் அரைச்சதம் விளாசிய அவர் இம்முறை 37 பந்துகளில் 7 பௌண்டரிகள், 2 சிக்ஸர்களுடன் 58 ஓட்டங்கள் குவித்தார்.

பின்னர் மத்திய வரிசையில் சஹான் ஆராச்சிகேவின் ஆட்டமும், தசுன் ஷானக்கவின் இறுதிநேர அதிரடியும் கைகொடுக்க கோல் கெலன்ட்ஸ் அணி 20 ஓவர்கள் நிறைவில் 6 விக்கெட்டுக்களை இழந்து 201 ஓட்டங்கள் குவித்தது.

கோல் கெலன்ட்ஸ் துடுப்பாட்டத்தில் சஹான் ஆராச்சிகே 29 பந்துகளில் 2 சிக்ஸர்கள் மற்றும் 4 பௌண்டரிகள் அடங்கலாக 43 ஓட்டங்கள் பெற்றார். தசுன் ஷானக்க இறுதிவரை ஆட்டமிழக்காது 8 பந்துகளில் 2 சிக்ஸர்கள் மற்றும் ஒரு பௌண்டரியோடு 21 ஓட்டங்கள் எடுத்தார்.

>>இமேஷா துலானியின் கன்னி T20I சதத்தால் பாகிஸ்தானை வீழ்த்தியது இலங்கை<<

கொழும்பு கேப்ஸ் பந்துவீச்சில் வனுஜ சஹான் 28 ஓட்டங்களை விட்டுக்கொடுத்து 2 விக்கெட்டுகளைக் கைப்பற்றினார். முஜீபுர் ரஹ்மான், மிலான் ரத்நாயக்க, ஜேம்ஸ் நீஷம் மற்றும் மல்ஷ தருபதி ஆகியோர் தலா ஒரு விக்கெட் வீதம் வீழ்த்தினர்.

பின்னர் 202 ஓட்டங்கள் என்கிற கடின வெற்றியிலக்கை நோக்கி களமிறங்கிய கொழும்பு கேப்ஸ் அணியினையும் ஆரம்ப வீரர்களில் ஒருவரான ருபின் ஹேர்மன் 5 ஓட்டங்களுடன் ஏமாற்றினார்.

எனினும் சதீர சமரவிக்ரம மற்றும் பென் மெக்டெர்மாட் ஜோடி அதிரடியாக ஓட்டங்கள் சேர்த்தனர். எனினும் கோல் கெலன்ட்ஸ் அணியின் சுழற்பந்துவீச்சாளர் மொஹமட் நவாஸ் அபாரமாக பந்துவீசி கொழும்பு அணிக்கு நெருக்கடி உருவாக்கினார்.

இதனால் கொழும்பு கேப்ஸ் 19.4 ஓவர்களில் அனைத்து விக்கெட்டுக்களையும் இழந்து 188 ஓட்டங்கள் பெற்று போட்டியில் தோல்வியினை தழுவியது.

கொழும்பு அணியின் துடுப்பாட்டத்தில் பென் மெக்டெர்மோட் 38 ஓட்டங்களையும், சதீர சமரவிக்ரம 37 ஓட்டங்களையும் எடுத்தனர். போட்டியில் விறுவிறுப்பினை உண்டாக்கிய மல்ஷ தருபதி 3 சிக்ஸர்கள் மற்றும் 3 பௌண்டரிகள் அடங்கலாக 15 பந்துகளில் 36 ஓட்டங்கள் எடுத்தார்.

கோல் கெலன்ட்ஸ் பந்துவீச்சில் மொஹமட் நவாஸ் 3 விக்கெட்டுக்களைச் சாய்த்தார். ஆகிப் ஜாவேட் மற்றும் எஷான் மாலிங்க  தலா 2 விக்கெட்டுகளை வீழ்த்தினர். போட்டியின் ஆட்டநாயனாக கோல் கெலன்ட்ஸ் அணியின் சரித் அசலங்க தெரிவாகியிருந்தார்.

>>மேலும் கிரிக்கெட் செய்திகளைப் படிக்க<<