பாகிஸ்தான் மகளிர் அணிக்கு எதிராக நடைபெறவுள்ள T20I தொடருக்கான 15 பேர்கொண்ட இலங்கை மகளிர் குழாத்தை தேசிய கிரிக்கெட் தேர்வுக்குழு அறிவித்துள்ளது.
வழக்கம் போல சமரி அத்தபத்து தொடர்ந்து அணியை வழிநடத்துவார். அத்துடன், பங்காளதேஷிற்கு எதிரான கடந்த T20I தொடரில் பங்கேற்காத ஆரம்ப துடுப்பாட்ட வீராங்கனை விஷ்மி குணரத்ன மீண்டும் T20I அணிக்கு திரும்பியுள்ளார்.
இதேவேளை, இரு 17 வயதான இளம் வீராங்கனைகளுக்கு முதன்முறையாக தேசிய அணியில் வாய்ப்பு அளிக்கப்பட்டுள்ளது. இலங்கை ‘A’ மற்றும் 19 வயதுக்குட்பட்ட அணிகளில் வெளிப்படுத்திய திறமைகளின் மூலம், துடுப்பாட்ட வீராங்கனை சஞ்சனா காவிந்தி மற்றும் இடதுகை சுழல்பந்து வீராங்கனை சமுதி பிரபோதா ஆகியோர் முதல் தடவையாக தேசிய அணிக்காக அழைக்கப்பட்டுள்ளனர்.
மறுபுறம், ஹன்சிமா கருணாரத்ன, தெவ்மி விஹங்கா, மிதாலி அயோத்யா மற்றும் அனுபவமிக்க இடதுகை சுழல்பந்து வீராங்கனை இனோகா ரணவீர ஆகியோர் இந்த T20I தொடருக்கான அணியிலிருந்து நீக்கப்பட்டுள்ளனர்.
- பாகிஸ்தான் தொடரிலிருந்து காவ்யா காவிந்தி திடீர் விலகல்
- இலங்கைத் தொடருக்கான பாகிஸ்தான் மகளிர் ஒருநாள், T20I குழாம் அறிவிப்பு
- பாகிஸ்தானுக்கு எதிரான ஒருநாள் தொடரை கைப்பற்றி இலங்கை மகளிர் அணி சாதனை
பாகிஸ்தானுக்கு எதிரான ஒருநாள் தொடரை 2-1 என வரலாற்றுச் சிறப்புமிக்க வகையில் கைப்பற்றிய உற்சாகத்தோடு, தம்புள்ளையில் நடைபெறவுள்ள T20I தொடரையும் வெல்லும் முனைப்பில் இலங்கை மகளிர் அணி களமிறங்குகிறது.
3 போட்டிகள் கொண்ட இந்த T20I தொடரின் அனைத்து போட்டிகளும் ரங்கிரி தம்புள்ள சர்வதேச கிரிக்கெட் மைதானத்தில் நடைபெறவுள்ளன. முதல் போட்டி ஜூலை 31-ஆம் திகதியும், எஞ்சிய இரண்டு போட்டிகள் முறையே ஆகஸ்ட் 2 மற்றும் 4-ஆம் திகதிகளிலும் நடைபெறவுள்ளன.
இலங்கை T20I குழாம் விபரம்: சமரி அத்தபத்து (அணித்தலைவி), விஷ்மி குணரத்ன, ஹசினி பெரேரா, சஞ்சனா காவிந்தி, ஹர்ஷிதா சமரவிக்ரம, இமேஷா துலானி, நிலக்ஷிகா சில்வா, கௌஷானி நுத்யங்கனா, கவிஷா தில்ஹாரி, நிமாஷா மீபகே, சமுதி பிரபோதா, சுகந்திகா குமாரி, மல்கி மதாரா, காவ்யா காவிந்தி, ரஷ்மிகா செவ்வந்தி
>>மேலும் கிரிக்கெட் செய்திகளைப் படிக்க<<
