இலங்கை கிரிக்கெட்டுக்கு ஐ.சி.சி. இன் வேண்டுகோள்

எடின்பேர்க் நகரில் இடம்பெற்று முடிந்திருக்கும் சர்வதேச கிரிக்கெட் வாரியத்தின் (ஐ.சி.சி) ஆண்டுக் கூட்டத்தில், இலங்கை கிரிக்கெட்டுக்கு முக்கிய வேண்டுகோள் ஒன்று விடுக்கப்பட்டுள்ளதாக தெரிவிக்கப்பட்டுள்ளது.

>>கிரிக்கெட் உலகக் கிண்ண போட்டி அமைப்புக்களில் புதிய மாற்றம்<<

இலங்கை கிரிக்கெட் நிர்வாகம் கலைக்கப்பட்டு தற்போது எரான் விக்ரமரட்ன தலைமையிலான கிரிக்கெட் மறுசீரமைப்புக் குழு நிர்வாக விடயங்களை கவனித்து வருகின்ற நிலையில், புதிய மறுசீரமைப்புக்கள் குறித்த தகவல்கள் ஐ.சி.சி. இடம் சமர்ப்பிக்கப்பட்டிருந்தது.

எனினும், இலங்கை கிரிக்கெட்டில் நிர்வாகம் தொடர்பிலான தேர்தல்கள் இடம்பெறும் வரையில் ஐ.சி.சி நிர்வாகக் கூட்டங்களில் இலங்கை கிரிக்கெட் வாரியம் உறுப்பினராக பங்கேற்க முடியாது என அறிவிக்கப்பட்டுள்ளது.

இன்னும் ஆண்டுக்கூட்டத்தில் உறுப்பு நாடுகளின் நிதி உதவி தொடர்பான பல முக்கிய முடிவுகளும் எடுக்கப்பட்டுள்ளன. அதன்படி நிதி நெருக்கடிக்கு உள்ளாகியிருக்கும் மேற்கிந்திய தீவுகள் கிரிக்கெட் வாரியத்திற்கு (CWI) ஆதரவளிக்கும் வகையில் அதற்கு 12.82 மில்லியன் அமெரிக்க டொலர்களை (இலங்கை நாணயப்படி சுமார் 4291 மில்லியன் ரூபாய்களை) கடனாக வழங்க ஐ.சி.சி ஒப்புதல் அளித்துள்ளது.

>>கண்டி ரோயல்ஸ் அணிக்கு ஒப்பந்தமாகும் சஹீன் அப்ரிடி<<

மறுமுனையில் இந்த ஆண்டு கூட்டத்தில் ஐ.சி.சி. இன் 111ஆவது உறுப்பினர் நாடாக மொரிஷியஸ் இணைத்துக் கொள்ளப்பட்டுள்ளது.  இதன் மூலம் ஐ.சி.சி இல் தற்போது 12 முழு உறுப்பினர் நாடுகளும்,  மொரிஷியஸ் உட்பட 99 அங்கத்துவ உறுப்பினர் நாடுகளும் உள்ளமை குறிப்பிடத்தக்கது.

அதேவேளை கனடா கிரிக்கெட் வாரியத்தின் மீதான தடையை நீக்குவதற்கான மறுசீரமைப்பு நிபந்தனைகளுக்கு ஐ.சி.சி ஒப்புதல் வழங்கியிருப்பதோடு, குறித்த நிபந்தனைகள் நிறைவேற்றப்பட்ட பின்னரே தடை நீக்கப்படும் எனத் தெரிவிக்கப்பட்டிருக்கின்றது.

அதேநேரம் ஐ.சி.சி. இன் நிர்வாகத்தை மேம்படுத்தும் நோக்கில் தேவஜித் சய்க்கியா, தென்னாபிரிக்க கிரிக்கெட் வாரியத்தின் டாக்டர் முகமது மூசாஜி மற்றும் நிர்வாக இயக்குனர் Dr. ரோஸ் ரிவாஸ் ஆகியோர் உள்ளடங்கிய நிர்வாக மறுஆய்வுக்குழு நியமனம் செய்யப்பட்டுள்ளது.

அத்துடன் உலகெங்கும் நடைபெறும் லீக்குகளை கண்காணித்து முகாமை செய்யும் துணைக்குழுவும் அமைக்கப்பட்டுள்ளது. பங்களாதேஷ் கிரிக்கெட் அணியின் முன்னாள் வீரர் தமீம் இக்பால் தலைமையிலான இந்தக் குழுவில் தேவஜித் சக்ய்கியா, Dr. ரூடி வேன் வூரென் (நமீபியா), ரிச்சர்ட் கூல்ட் (இங்கிலாந்து), டொட் கிரீன்பெர்க் (அவுஸ்திரேலியா) ஆகியோர் இடம்பெற்றுள்ளனர்.

>>மேலும் கிரிக்கெட் செய்திகளைப் படிக்க<<