இந்தியா A அணிக்கு எதிராக நடைபெற்ற முத்தரப்பு தொடரின் முதல் ஒருநாள் போட்டியில் கடைசிவரை வெற்றி வாய்ப்பினை கொண்டிருந்த இலங்கை A அணி 8 ஓட்டங்களால் தோல்வியை தழுவியது.
இலங்கை, இந்தியா மற்றும் ஆப்கானிஸ்தான் A அணிகள் முத்தரப்பு தொடரில் விளையாடுகின்றன. தொடரின் முதல் போட்டியில் இலங்கை மற்றும் இந்தியா பலப்பரீட்சை நடத்தின.
>>பங்களாதேஷ் கிரிக்கெட் சபை தலைவராக தமீம் இக்பால் நியமனம்!
தம்புள்ள ரங்கிரி சர்வதேச கிரிக்கெட் மைதானத்தில் நடைபெற்ற இந்தப் போட்டியில் முதலில் துடுப்பெடுத்தாடிய இந்திய அணி 277 ஓட்டங்களை பெற்றுக்கொண்டது.
இந்திய அணி முதல் 3 விக்கெட்டுகளை 69 ஓட்டங்களுக்கு இழந்து தடுமாறிய போதும், திலக் வர்மா மற்றும் ருதுராஜ் கைக்வாட் ஆகியோர் சிறந்த இணைப்பாட்டம் ஒன்றை பெற்றுக்கொடுத்து அணியின் ஓட்ட எண்ணிக்கைக்கு உதவினர்.
ருதுராஜ் கைக்வாட் 101 ஓட்டங்களையும், திலக் வர்மா 60 ஓட்டங்களையும் பெற்று அணியின் ஓட்ட எண்ணிக்கையை அதிகரிக்க உதவினர். இறுதியாக ஆயுஸ் பதோனி 24 ஓட்டங்கள் மற்றும் சூர்யான்ஸ் செட்ஜே 26 ஓட்டங்களையும் விளாசியிருந்தனர். இலங்கை அணியின் பந்துவீச்சில் மொஹமட் சிராஸ் 2 விக்கெட்டுகளை அதிகபட்சமாக வீழ்த்தினார்.
பதிலுக்கு துடுப்பெடுத்தாடிய இலங்கை அணிக்காக நிரோஷன் டிக்வெல்ல (47 ஓட்டங்கள்) மற்றும் அவிஷ்க பெர்னாண்டோ (45 ஓட்டங்கள்) ஆகியோர் 93 ஓட்டங்களை முதல் விக்கெட்டுக்காக பகிர்ந்தனர்.
எனினும் இவர்கள் இருவரும் அடுத்தடுத்து ஆட்டமிழக்க இலங்கை அணி தொடர்ச்சியாக விக்கெட்டுகளை இழக்க தொடங்கியது. எனினும் அணித்தலைவர் சஹான் ஆராச்சிகே மற்றும் சதீர சமரவிக்ரம ஆகியோர் சிறந்த இணைப்பாட்டம் ஒன்றை வழங்கி அணியை வெற்றியை நோக்கி நகர்த்தினர்.
>>மகளிர் வீராங்கனைகளைச் சந்தித்த இலங்கை கிரிக்கெட் மறுசீரமைப்புக் குழு
துரதிஷ்டவசமாக சதீர சமரவிக்ர 46 ஓட்டங்களுடன் வெளியேறினார். இறுதிவரை போராடிய சஹான் ஆராச்சிகே 74 ஓட்டங்களுடன் ஆட்டமிழந்தார். அணிக்கு 17 பந்துகளில் 16 ஓட்டங்கள் தேவை என்ற நிலையில் ஆராச்சிகே ஆட்டமிழந்தமை அணியின் வாய்ப்பை மோசமாக்கியது. இந்த 16 ஓட்டங்களை பெறுவதற்கிடையில் இலங்கை அணி 4 விக்கெட்டுகளை இழந்து தோல்வியை தழுவியமை குறிப்பிடத்தக்கதாகும்.
இந்திய அணியின் பந்துவீச்சில் ஆயுஸ் பதோனி, அனுகுல் ரோய், அர்ஷாத் கான் மற்றும் விப்ராஜ் நீகம் ஆகியோர் தலா 2 விக்கெட்டுகளை வீழ்த்திய இந்திய அணியின் வெற்றிக்கு உதவினர்.
சுருக்கம்
இந்தியா ‘A’ – 277/6 (50) ருதுராஜ் கைக்வாட் 101, திலக் வர்மா 60, மொஹமட் சிராஸ் 2/67
இலங்கை ‘A’ – 269 (48.5) சஹான் ஆராச்சிகே 74, நிரோஷன் டிக்வெல்ல 47, சதீர சமரவிக்ரம 46, அவிஷ்க பெர்னாண்டோ 45, வனுஜ சஹான் 23, அர்ஷாட் கான் 2/24
முடிவு – இந்தியா ‘A’ அணி 8 ஓட்டங்களால் வெற்றி
>>மேலும் கிரிக்கெட் செய்திகளைப் படிக்க<<
