ஆப்கானிடமும் தோற்று அரையிறுதி வாய்ப்பை இழந்தது இலங்கை U19 அணி

ஓமானில் நடைபெற்று வரும் 19 வயதுக்குட்பட்ட ஆசியக் கிண்ணத் தொடரில் நேற்று (09) நடைபெற்ற ஆப்கானிஸ்தான் அணிக்கு எதிரான போட்டியிலும் 106 ஓட்டங்களால் தோல்வியை சந்தித்த இலங்கை அணி அரையிறுதி வாய்ப்பை இழந்து வெளியேறியது. 

ஓமானின் அல் அமீரத் கிரிக்கெட் மைதானத்தில் நேற்று (09) நடைபெற்ற போட்டியில் முதலில் துடுப்பெடுத்தாட பணிக்கப்பட்ட ஆப்கானிஸ்தான் 19 வயதுக்குட்பட்ட அணி. அனைத்து விக்கெட்களையும் இழந்து 275 ஓட்டங்களைப் பெற்றுக்கொண்டது. 

அந்த அணிக்காக முன் வரிசையில் களமிறங்கிய சுபான் சகைல் 111 பந்துகளுக்கு முகம்கொடுத்து 13 பவுண்டரிகள் மற்றும் ஒரு சிக்ஸருடன் 107 ஓட்டங்களையும், அபிதுல்லாஹ் நடர்ஜான் 55 ஓட்டங்களையும் அதிகபட்சமாகப் பெற்றனர். பந்துவீச்சில் செத்மிக்க செனவிரத்ன 44 ஓட்டங்களை விட்டுக்கொடுத்து 3 விக்கெட்களையும், விக்னேஸ்வரன் ஆகாஷ் 60 ஓட்டங்களை விட்டுக்கொடுத்து 2 விக்கெட்களையும் கைப்பற்றினார். 

• மலேசியாவை வீழ்த்தி U19 ஆசியக் கிண்ணத்தை வெற்றியுடன் ஆரம்பித்த இலங்கை
• U19 ஆசியக் கிண்ணத்தில் பங்களாதேஷிடம் வீழ்ந்தது இலங்கை

276 ஓட்டங்களை இலக்காகக் கொண்டு பதிலெடுத்தாடிய இலங்கை 19 வயதுக்குட்பட்ட அணி அடுத்தடுத்து விக்கெட்டுகளை இழந்து தடுமாறியதுடன், 34.1 ஓவர்களில் 169 ஓட்டங்களுக்கு சகல விக்கெட்டுகளையும் இழந்து தோல்வியைத் தழுவியது. இலங்கை அணிக்கான கித்ம விதானபத்திரண மாத்திரம் அரைச் சதம் (58) ஒன்றைப் பெற்றார்.  

ஆப்கானிஸ்தான் அணி சார்பில் நூர் அலி நியாசாய் 4 விக்கெட்களையும், அமீர் ஹம்சா, சொஹைல் கான் மற்றும் மொஹமட் அலி பராக்சாய் ஆகியோர் தலா 2 விக்கெட்கள் வீதம் வீழ்த்தியிருந்தனர்.  

இம்முறை இளையோர் ஆசியக் கிண்ணத்தில் இலங்கை அணி முதல் போட்டியில் மலேசியாவை வீழ்த்தியபோதும், பங்களாதேஷுக்கு எதிரான போட்டியில் தோல்வியை சந்தித்தமை குறிப்பிடத்தக்கது. 

இதனிடையே, பங்களாதேஷ் 19 வயதுக்குட்பட்ட அணி நேற்று நடைபெற்ற மலேசியாவுக்கு எதிரான போட்டியில் 205 ஓட்டங்களால் வெற்றியீட்டியது. இதன்படி பி குழுவில் இருந்து ஆப்கானிஸ்தானுடன் பங்களாதேஷ் 19 வயதுக்குட்பட்ட அணிகள் அரையிறுதிக்கு தகுதி பெற்றன. 

போட்டியின் சுருக்கம் 

ஆப்கானிஸ்தான் U19 அணி – 275 (49.5) சுபான் சகைல் 107, அபிதுல்லாஹ் நடர்ஜான் 55, செத்மிக செனவிரத்ன 3/44, விக்னேஸ்வரன் ஆகாஷ் 2/60 

 

இலங்கை U19 அணி – 169 (34.1) கித்ம விதானபத்திரண 58, செத்மிக செனவிரத்ன 23, நூர் அலி நியாசாய் 4/35, அமீர் ஹம்சா 2/42, சொஹைல் கான் 2/42, மொஹமட் அலி பராக்சாய் 2/24 

 

முடிவு – ஆப்கானிஸ்தான் U19 அணி 106 ஓட்டங்கள் வித்தியாசத்தில் வெற்றி பெற்றது.