“හදවතට තුන්පාරක් පිහියෙන් ඇන්නා වගෙයි”

ශ්‍රේෂ්ඨ පැසිපන්දු ක්‍රීඩක කෝබි බ්‍රයන්ට් මියගිය ශෝකය තවමත් අපතරින් මැකී ගොස් නැත. ඔහුගේ සමීපතම මිතුරෙකු වූ ෂකීල් ඔ’නීල්ට ඒ වේදනාව දෙගුණයකි. ෂකීල් (ෂැක්) සිය බාල සොයුරෙකු ලෙස හැඳින්වූ කෝබි බ්‍රයන්ට් ගැන TNT හරහා මතකය අවධි කළේ මෙලෙසිනි.

අන්තිම මාස කිහිපයම හරිම අමාරුවෙන් ගෙවුණේ. මට මගේ පොඩි නංගිව නැති වුනා. අපි හිනා වුනා, අපි එකිනෙකාව බලා ගත්තා, විහිළු කරගත්තා. ඒත් යථාර්ථය වුනේ ඇය නැතිවීමයි.” ෂැක් විසින් මෙලෙස සිහි කරනු ලැබුවේ පිළිකා රෝගයෙන් පීඩා විඳිමින් සිට මියගිය තම සොයුරිය වන අයේෂා හැරිසන් ගැන ය.

ෂැක්ගේ මියගිය සොහොයුරිය, අයේෂා හැරිසන්. – monstersandcritics.com

ජීවිතය විසින් අපව යථාර්ථයට විවෘත කරන අවස්ථාවන් පුදුමාකාරය. එක් සංවේගයකින් සිත මුදවාගන්නා විට තවත් සංවේගයක් සිත වෙලාගන්නේ පූර්ව දැනුම් දීමකින් තොරව ය. ෂැක් හටද එසේය. තම ආදරණීය සොයුරිය මියගොස් මාස දෙකක් ගතවෙද්දීම ඔහුගේ ප්‍රබලතම කණ්ඩායම් සගයෙකු වූ කෝබි බ්‍රයන්ට් හෙලිකොප්ටර් අනතුරකින් මියගියේය. එම පුවත දැනගන්නට ලැබෙන විට ද ෂැක් සිටියේ ඊට කිසිදු සූදානමක් ඇතිව නොවේ.

මම පුතයි බෑනයි එක්ක පහළ තට්ටුවේ ව්‍යායාම කරමින් හිටියේ. මගේ අනිත් බෑනා අඬ අඬා එතෙන්ට දුවගෙන ඇවිත් මට ෆෝන් එක පෙන්නුවා. මම ඔහුට කිව්වා ඕක මෙතනින් අයින් කරපන් කියලා. අපි ඉන්න ලෝකේ ඕනෑම දෙයක් ෆොටෝෂොප් කරලා, බොරු පුවත් හදන්න පුළුවන්. මට ඒක විශ්වාස කරන්න ඕන වුනේ නෑ.” කෝබි මියගිය බවට වූ පුවත එක්වරම පිළිගන්නට තරම් අප මෙන්ම ඔහු ද සූදානම් වූයේ නැත.

ඊට පස්සේ හැමෝගෙන්ම කෝල්ස් ආවා. එතකොට අපි දැනගත්තා ඒක ස්ථිරයි කියලා. අවුරුදු 47ක මිනිහෙක් හැටියට එහෙම වේදනාවක් මට කාලෙකින් දැනිලා තිබුණේ නෑ. ආච්චි අම්මලා දෙන්නෙක් නැතිවුණු, සහෝදරියක් නැතිවුණු මට අන්තිමේ දී පොඩි සහෝදරයෙකුත් නැතිවුණා.” ෂැක් එසේ කීවේ දෑසින් කඳුළු වැගිරෙද්දීය.

ෂැක් සහ කෝබි, එකට ක්‍රීඩා කරන සමයේදී. – meredithcorp.io

අපි කරපු දේවල් නිසා අපේ නම් දෙක එකටම ඇලවිලා තියේවි. මිනිස්සු හැමවෙලේම අහනවා අපේ සම්බන්ධතාවය ගැන. මම කියන්නේ අපි හයිය හිත් තිබුණු දෙන්නෙක් කියලා. දිනන්න අවශ්‍ය සීමාවේ කෙළවරටම යන්න ඕන වෙනකොට අපි දෙන්නා තමයි ඒක කළේ. ඒක හරියට හදවතට තුන්පාරක් පිහියෙන් ඇන්නා වගෙයි.” ෂකීල් ඔනීල් සහ කෝබි බ්‍රයන්ට් යන නම් ද්විත්වය 2000-2004 කාල සමයේ NBA තරගාවලිය තුළ තිබූ විශිෂ්ටතම සෙන්ටර්-ෂූටින් ගාඩ් සම්බන්ධතාවයයි. 2000, 2001, 2002, 2004 යන වර්ෂයන් වලදී NBA ශූරයන් වූ ලොස් ඇන්ජලීස් ලේකර්ස් කණ්ඩායම වෙනුවෙන් ඔවුන් දෙදෙනා පෑ හරඹයන් අදටත් පැසිපන්දු ඉතිහාසඥයින් විසින් කතා බහට ලක්කරන්නකි.

පසුව දෙදෙනා අතර විරසකයක් ඇතිවූ බවට පුවත් වාර්තා වූ අතර සිද්ධිය අවසන් වුනේ ෂැක් මයාමි හීට් කණ්ඩායම වෙත මාරුවක් ලබා ගැනීමෙනි. එහෙත් පසුව නැවතත් මිතුරන් බවට පත්වූ ෂැක් සහ කෝබි පැරණි විරසකයක් නොතිබූ ආකාරයෙන් සතුටින් කල් ගෙව්වේය.

අන්තිමට තමයි දැනගත්තේ ඔහුගේ දුවත් හෙලිකොප්ටරයේ සිටි බව. මම ඔවුන්ගේ නිවසට ගිය හැම වෙලේම මම කිව්වේ හායි, මම අන්කල් ෂැක්කියලා. කෝබිත් එහෙමයි. ෂරීෆ් (ෂැක්ගේ පුත්‍රයා) කරදරයක වැටුනහම කෝබි මට මැසේජ් එකක් දාලා බලනවා එයාට කොහොමද කියලා…” එතැනින් පසුව ෂැක් දිගු සුසුමක් ගත්තේය. ඔහු හඬන්නට විය. ළඟින් ආශ්‍රය කළ එවැනි මිතුරෙකුගේ වියෝව ඕනෑම කෙනෙකුට ගෙන එන්නේ දරාගැනීමට අපහසු සංවේගයකි. එහෙත් නැවත සිහි එලවා ගත් ඔහු මෙසේ පැවසුවේය.

කෝබි සමඟ මියගිය වැඩිමහල් දියණිය, නතාලියා බ්‍රයන්ට්. – Axios

මේ ලෝකේ ඉන්නකොට අපි ගොඩක් දේවල් හරියට ගණන් ගන්නේ නැහැ. මම ඔයාලටවත් (අනෙකුත් TNT පැසිපන්දු විශේෂඥයන්ට) මට අවශ්‍ය තරමට කතා කරන්නේ නෑ.” ෂැක් කියන්නේ ඇත්ත ය. ජීවත්ව සිටින විට අප මිනිසුන් සමඟින් දයානුකම්පාව පෙරදැරිව කටයුතු කළ යුතුය. නොසඟවා ආදරය කළ යුතුය. කෙනෙකු මියගිය විට කෙතරම් ඒවා කීවත් ඉන් ඇති ඵලක් නැත.

අපිට ඔහුව විශිෂ්ටයන්ගේ සමාජයට ඇතුළත් වෙන දවසේ විහිළු කරන්නට බැරිවේවි. මට 5යි උඹට 4යිකියලා ඔහුට ආයෙත් කියන්නට බැරි වේවි. අපි එකට හිටිය නම් අපට ශූරතා 10ක් ගන්නට තිබුණාකියලා මට කියන්නටත් බැරිවේවි. ඒවා ආයෙත් ගන්න බැරි දේවල් (හඬමින්).” කෝබි කෙතරම් විශිෂ්ට ක්‍රීඩකයෙකු වුවත් ඔහුව නිල වශයෙන් විශිෂ්ටයන්ගේ සමාජයට (Hall of Fame) වෙත නම්කොට තිබුණේ නැත. එය ඉතා ආසන්නයේ දී ම සිදුවීමට තිබූ දෙයකි. කෝබි සිය NBA ක්‍රීඩා දිවිය තුළ දී ශූරතා 5ක් දිනා ඇත. ෂැක් විසින් දිනා තිබුණේ 4කි. එහෙත් ෂැක්ගේ කතාව සත්‍යයකි. ඔවුන් දෙදෙනා කෙටි කලකටවත් විරසක නොවූයේ නම්, ශූරතා 10ක් වුවත් දිනාගැනීමේ හැකියාව ලේකර්ස් කණ්ඩායම සතුවිය.

ෂකීල් ඔනීල්, කෝබි බ්‍රයන්ට් හට රූපවාහිනියේ දී ඇමතූ අවසන් වතාව වූයේ කෝබිගේ අවසන් NBA තරගයට පෙරාතුවය. එහි දී ඔහු කෝබිට අභියෝගයක් ලබා දුන්නේය.   

මම ඔහුට 50ක් ගන්න කිව්වා. ඔහු 60ක් ගත්තා.” කෝබි සිය අවසන් වෘත්තීය පැසිපන්දු තරගයේ දී තනිව ලකුණු 60ක් වාර්තා කළේය. වෘත්තීය තරගයක දී තනිව ලකුණු 30ක් වාර්තා කිරීම පවා ඉහළ දස්කමකි. එහෙත් සිය ක්‍රීඩා දිවියේ අවසානයේ දී පවා කෝබි සිටි මට්ටම එයයි.

Video – ගුවනේදී මාරයාට හසුවූ “Black Mamba” – Kobe Bryant

මම වැඩිපුර මිනිස්සුන්ට කතා කරන්න, දෑත දිගුකරන්න ඕන. මොකද කාටවත් කියන්න බෑ, ජීවිතය හරි කෙටියි. මම කවදාවත් මෙහෙම දෙයක් දැකලා නෑ.”

එවැන්නක් අප ද දැක තිබුණේ නැත. ජීවත්ව සිටිනා කාලයේ දී මිනිසුන්ට දෑත දිගුකරන්නට නොපැකිලි විය යුතුය. ප්‍රියයන්ගෙන් නික්මයාම, ප්‍රියයන්ගෙන් වෙන්වීම යථාර්ථයයි. විශිෂ්ටයන්ගේ නික්මයාම යනු ද ඒ යතාර්ථයෙහිම කොටසකි.    

>> තවත් සඳහා පිවිසෙන්න <<