සාන්තුවරුන් සතුටින් විසිර යයි; ශූරතාව සමව බෙදේ

101

කොළඹ CR&FC ක්‍රීඩාංගණය කේන්ද්‍රකර ගනිමින් අද (25) දිනයේ දී ක්‍රියාත්මක වූ 29 වැනි “සාන්තුරුවන්ගේ පාපන්දු ගැටුම” ජය පරාජයෙන් තොරව අවසන් වූයේ දිනය අවසානයේ දී පාසල් දෙකටම සතුටුදායක අවසානයක් සටහන් කරදෙමිනි. 

ඉතා උණුසුම් මුහුණුවරක් ගත් මෙම තරගයේ සම්පූර්ණ කාලය අවසන් වන විට සාන්ත පීතර විද්‍යාලය සහ සාන්ත ජෝසප් විද්‍යාලය ගෝල එක බැගින් වාර්තා කරමින් සම තත්වයේ පසු විය.

සුජාන්ගේ දක්‍ෂතා හමුවේ ශ්‍රී ලංකාවෙන් තවත් දුර්වල තරගයක්

2022 FIFA පාපන්දු ලෝක කුසලාන තරගාවලිය හා 2023 ආසියානු පාපන්දු ශූරතාවලිය සඳහා සුදුසුකම්…

කෙසේ නමුත් දඬුවම් පහර මඟින් තරගයේ ඉරණම විසඳීම සඳහා සංවිධායක මඩුල්ල දැඩි පරිශ්‍රමයක් දැරූවත්, පැවති අයහපත් ආලෝක තත්වය හමුවේ එම කටයුත්ත සාර්ථක කරගැනීමට ඔවුහූ අපොහොසත් වූහ. 

ඒ අනුව ගියවර ශූරයින් බවට පත්වෙමින් කිරුළු පැළඳූ ජෝසප්වරුන් හට තවත් වසරක කාලසීමාවක් දක්වා ගරු ස්ටැන්ලි අබේසේකර සහ ජෝ වික්‍රමසිංහ පියතුමන්ලාගේ කුසලානයෙහි හිමිකාරීත්වය භාර කෙරිණි.

මේ දිනවල ඇඳ හැලෙන ධාරානිපාත වර්ෂාව නිසාවෙන් CR පිටිය තරමක් තෙත් සහ ලිස්සන සුළු ස්වභාවයක් ගත් නමුත් නියමිත වේලාවට තරගය ආරම්භ කිරීමට එම තත්වයන් බාධාවක් නොවීය. 

විනිසුරු තරංග පුෂ්පකුමාරගේ ආරම්භක සංඥාවත් සමඟම කාල ගණන යන්ත්‍රය පණ ගැන්වුණු අතර ආරම්භක මිනිත්තු කිහිපයේ දී ම තම ස්ථාවරය මැනවින් කියා පෑමට ජෝසප් ක්‍රීඩකයින් වඩාත් යුහුසුලු විය.

සාන්ත පීතර ක්‍රීඩකයින්ට සාපේක්ෂව හැඩි දැඩි දේහධාරී ක්‍රීඩකයින්ගෙන් සැදුම්ලත් සාන්ත ජෝසප් කණ්ඩායම විසින් දිගින් දිගටම එල්ල කළ ආක්‍රමණ නවතාලීමට ප්‍රතිවාදීන් හට අමතර වෙහෙසක් දැරීමට සිදු විය. 

පන්දු පාලනයේ දී මෙන්ම ක්‍රීඩකයින් ස්ථානගත කිරීමේ දී ද තම ඒකාධිකාරය පතුරවාලූ ජෝසප් ක්‍රීඩකයින්ගේ බලයට යටත් නොවී තනිවම නැඟී සිටීමට සාන්ත පීතර ගෝල රකින ක්‍රීඩක ප්‍රතීෂ් සතිචන්ද්‍ර ගත් වෑයම මෙහි දී වඩාත් කැපී පෙනුණි.

Mbappe නැවතත් වැඩ පෙන්නද්දී Real Madridට පළමු ජයග්‍රහණය

යුරෝපයේ ප්‍රමුඛතම පාපන්දු තරගාවලිය වන ‘UEFA Champions League’ තරගාවලියේ තෙවැනි…

සාන්ත ජෝසප් ඉදිරි පෙළ ප්‍රහාරකයින් දෙදෙනා වන චලන ප්‍රමන්ත සහ ශෙනාල් සන්දේශ් හට සාන්ත පීතර ආරක්ෂක වැට ඔස්සේ රිංගා යමින් ගෝල රැස්කිරීමේ අවස්ථාවන් කිහිපයක්ම නිර්මාණය කිරීමට හැකි වූ නමුත් ඔවුන්ට එරෙහිව පවුරක් සේ නැඟී සිටිමින් ප්‍රතිරෝධය පෑමට සාන්ත පීතර ගෝල රකින්නා සමත්කම් දැක්විය.

නමුත් පළමු අර්ධය අවසන් වීමට විනාඩියකටත් අඩු කාලයක් ඉතිරිව තිබිය දී ජීවය ලැබූ සාන්ත ජෝසප් ක්‍රීඩකයින් එතෙක් වේලාවක් නිද්‍රාශීලිව තිබුණු ලකුණු පුවරුව පණ ගැන්වූයේ ශෙනාල් සන්දේශ් විසින් වාර්තා කළ අලංකාර ගෝලයත් සමඟිනි. 

ඒ අනුව පිටියේ වම් පස පැති රේඛාව ආසන්නයෙන් ගෝල රාමු කලාපයට යොමු කළ පන්දුව ගුවනේ දී ම එක පහරින් (Volley) ගෝලය තුලට හරවා යැවීමට ශෙනාල් සමත් විය.

පළමු අර්ධය: සාන්ත ජෝසප් විද්‍යාලය 01 – 00 සාන්ත පීතර විද්‍යාලය

විවේක කාලය අතරතුර දී තමන් අතින් පළමු අර්ධයේ දී සිදු වූ අඩුපාඩුකම් පිළිබඳ මනා අවබෝධයක් ලබා ගත් පීතරයින් දෙවන භාගය සඳහා සටනට පිවිසුණේ වඩාත් ධනාත්මක මුහුණුවරකිනි. 

එතෙක් වේලාවක් පන්දුවේ ඒකාධිකාරය තම පාලනය නතුකොට තබා ගත් ජෝසප්වරුන්ගෙන් පන්දුව ඩැහැගනිමින් තර්ජනාත්මක ආක්‍රමණ කිහිපයක්ම දියත් කිරීමට සාන්ත පීතර ක්‍රීඩකයෝ සමත්කම් දැක්වූහ.

එම සුභවාදී ආකල්පය නිසාවෙන්ම වැඩි වේලාවක් ගත වීමට මත්තෙන් ලකුණු පුවරුවේ ඔවුන්ගේ අන්තය වර්ණවත් කිරීමට පීතරයින් සමත් වූයේ මොහොමඩ් සෙයිඩ් විසින් දිනා දුන් දර්ශනීය ගෝලයත් සමඟිනි. තම හිස ආධාරයෙන් පන්දුව ගෝල රාමුවේ වම් පස කෙළවරට ඉලක්කගත කළ සෙයිඩ් පීතරයින් හට තරගයේ ජයග්‍රහණය පිළිබඳ නැවුම් බලාපොරොත්තුවක් ගෙනදීමට සමත් විය.

Lionel Messi තවත් වාර්තාවක්; Liverpoolට සුපිරි ජයක්

ශූරයින්ගේ ලීග් පාපන්දු තරගාවලියේ තෙවැනි තරග දිනය මේ දිනවල පැවැත්වෙනවා. තරගාවලියේ ඉතා…

තරගයේ පළමු කාර්තු දෙක තුල ජෝසප් ක්‍රීඩකයින් තරග කළ විලාසය අනුව ඔවුන්ව නවතාලීමට නම් පීතරයින් හට උපාය මාර්ගිකව විශාල වෙනසක් සිදු කළ යුතුව තිබුණ අතර ඒ පිළිබඳ ඉතාමත් හොඳ අවබෝධයකින් යුතුව ක්‍රීඩා කළ සාන්ත පීතර ක්‍රීඩකයින් ප්‍රතිවාදී කඳවුර වෙත පීඩනයක් එල්ල කරමින් තරගයේ පෙරමුණ ගැනීමට දැඩි ප්‍රයත්නයක නිරත විය.

මේ අතරවාරයේ පසුගිය වර්ෂයේ පැවති මහා ගැටුමේ තරගයේ වීරයා බවට පත් වූ ජෝසප් විද්‍යාලයේ චලන ප්‍රමන්ත හට ද ගෝලයක් රැස් කිරීමට තිබූ ඉතාමත් හොඳ අවස්ථාවක් අවාසනාවන්ත ලෙස ගිලිහී ගියේ, ගෝල රාමු කලාපයට ආසන්නයෙන් එල්ල කළ නිදහස් පහර වම් ගෝල කණුව ආසන්නයෙන් ඉවතට ඇඳී යාම නිසාවෙනි. 

සාන්ත ජෝසප් ගෝල රකින්නාගේ භූමිකාව රඟ දැක්වූ මාෂල් කොඩිකාර ද තම කාර්‍යභරය නිසියාකාරව ඉටු කළේ ප්‍රතිවාදීන් විසින් ගෝලය තුලට යොමු කළ වේගවත් පහර කිහිපයක්ම දක්ෂ ලෙස නවතාලමිනි. 

ඒ අනුව විනාඩි 80ක කාලයක් පුරාවට දිව ගිය 29 වැනි ජෝසප් – පීතර පාපන්දු සංග්‍රාමය එතෙකින් නිමාවට පත් වූයේ ගෝල 1-1ක් ලෙස කණ්ඩායම් දෙකටම සැනසිලිදායක අවසානයක් උරුම කරදෙමිනි.

සම්පූර්ණ කාලය: සාන්ත ජෝසප් විද්‍යාලය 01 – 01 සාන්ත පීතර විද්‍යාලය 

ගෝල ලාභීන් 

  • සාන්ත ජෝසප් විද්‍යාලය – ශෙනාල් සන්දේශ් 40′
  • සාන්ත පීතර විද්‍යාලය – මොහොමඩ් සෙයිඩ් 50′

>> පාපන්දු පුවත් සඳහා පිවිසෙන්න – පාපන්දු ක්‍රීඩා පිටුවට <<