பங்களாதேஷ் மகளிர் அணிக்கு எதிராக நடைபெறவுள்ள இருதரப்பு கிரிக்கெட் தொடரில் விளையாடவுள்ள இலங்கை குழாம்களை இலங்கை கிரிக்கெட் நிறுவனம் வெளியிட்டுள்ளது.
இந்த இரண்டு அணிகளுக்கும் வழமைபோல் சமரி அத்தபத்து தலைவியாக நியமிக்கப்பட்டுள்ளதுடன், அனுபவம் வாய்ந்த துடுப்பாட்ட வீராங்கனை விஷ்மி குணரட்னவின் சேவை இழக்கப்பட்டுள்ளது. அவரது கையில் ஏற்பட்டுள்ள உபாதை காரணமாக இந்தச் சுற்றுப்பயணத்தில் அவர் பங்கேற்க மாட்டார் என அறிவிக்கப்பட்டுள்ளது.
மூன்று ஒருநாள் மற்றும் மூன்று T20I போட்டிகள் கொண்ட இந்தத் தொடருக்காக அறிவிக்கப்பட்டுள்ள இருவேறு குழாம்களில், T20I போட்டிகளுக்கான அணியில் பாடசாலை வீராங்கனையான மிதலி அயோத்யா இணைக்கப்பட்டுள்ளமை விசேட அம்சமாகும்.
திருகோணமலை மாவட்டத்தின் கந்தளாய் மத்திய மகா வித்தியாலயம் மற்றும் ரஜாஎல பாடசாலைகளில் ஆரம்பக் கல்வியைப் பயின்ற மிதலி, தற்போது கந்தளாய் மத்திய மகா வித்தியாலயத்தில் கல்வி பயின்று வருகிறார். வேகப்பந்து வீச்சு சகலதுறை வீராங்கனையான இவர், அண்மையில் நடைபெற்ற வளர்ந்து வரும் அணிகளுக்கான ஆசியக் கிண்ணத் தொடரில் இலங்கை வளர்ந்து வரும் அணியைப் பிரதிநிதித்துவப்படுத்தித் தனது திறமையை வெளிப்படுத்தியிருந்தார். இவரது உள்வாங்கலானது திருகோணமலை மாவட்ட கிரிக்கெட் வரலாற்றில் ஒரு முக்கிய மைல்கல்லாகப் பார்க்கப்படுகிறது.
ஏப்ரல் மாதம் 20ஆம் திகதி ஆரம்பமாகும் ஒருநாள் தொடருக்கான இலங்கை குழாமில் 16 வீராங்கனைகள் உள்வாங்கப்பட்டுள்ளனர். இறுதியாக நடைபெற்ற மேற்கிந்தியத் தீவுகள் தொடருக்கான குழாமில் இடம்பிடிக்காத சகலதுறை வீராங்கனைகளான பியுமி வத்சலா மற்றும் ஹன்சிமா கருணாரத்ன ஆகியோரை மீண்டும் அணியில் இணைக்கத் தேர்வுக்குழு தீர்மானித்துள்ளது.
- இங்கிலாந்து U19 மகளிர் அணியை சுழலில் வீழ்த்திய இலங்கை
- சகலதுறையிலும் பிரகாசித்த இலங்கை 19 வயதின் கீழ் மகளிர் அணிக்கு முதல் வெற்றி
- இலங்கை இளையோர் மகளிர் அணியை வழிநடத்தும் சமோதி
ஒருநாள் தொடரைத் தொடர்ந்து நடைபெறவுள்ள T20I தொடருக்காக 15 வீராங்கனைகள் கொண்ட குழாம் பெயரிடப்பட்டுள்ளது. இதில் ஒருநாள் தொடரில் விளையாடும் பியுமி வத்சலா, சேத்தனா விமுக்தி மற்றும் காவ்யா காவிந்தி ஆகியோர் நாடு திரும்பவுள்ளதுடன், அவர்களுக்குப் பதிலாக மிதலி அயோத்யா மற்றும் ரஸ்மிகா செவ்வந்தி ஆகியோர் T20I குழாமில் இணைந்துகொள்வர்.
இந்தத் தொடரின் ஒருநாள் போட்டிகள் அனைத்தும் ராஜ்ஷாஹி நகரில் ஏப்ரல் 20, 22 மற்றும் 25ஆம் திகதிகளில் பகல் போட்டிகளாக நடைபெறும். அதனைத் தொடர்ந்து, T20I தொடரின் மூன்று போட்டிகளும் சிலெட்டில் ஏப்ரல் 28, 30 மற்றும் மே 02ஆம் திகதிகளில் மாலை 6.00 மணிக்கு ஆரம்பமாகும். 2026 ஏப்ரல் 17ஆம் திகதி பங்களாதேஷ் பயணமாகும் இலங்கை மகளிர் அணிக்கு, சர்வதேச மட்டத்தில் அனுபவங்களைப் பெற்றுக்கொள்ளவும் தமது தரவரிசையை மேம்படுத்திக்கொள்ளவும் இந்தச் சுற்றுப்பயணம் ஒரு சிறந்த வாய்ப்பாக அமையும்.
பங்களாதேஷ் தொடரில் பங்கேற்கவுள்ள இலங்கை மகளிர் கிரிக்கெட் அணி நேற்று (17) பங்களாதேஷ் நோக்கிப் புறப்பட்டுச் சென்றமை குறிப்பிடத்தக்கது.
இலங்கை ஒருநாள் குழாம்:
சமரி அத்தபத்து (தலைவர்), ஹசினி பெரேரா, இமேஷா துலானி, ஹன்சிமா கருணாரத்ன, கௌஷானி நுத்யங்கனா, ஹர்ஷிதா சமரவிக்ரம, நிலக்ஷி டி சில்வா, பியுமி வத்சலா, கவிஷா டில்ஹாரி, தெவ்மி விஹங்கா, மல்கி மதாரா, காவ்யா காவிந்தி, சேத்தனா விமுக்தி, இனோகா ரணவீர, சுகந்திகா குமாரி, நிமேஷா மதுஷானி.
இலங்கை T20I குழாம்:
சமரி அத்தபத்து (தலைவர்), ஹசினி பெரேரா, இமேஷா துலானி, ஹன்சிமா கருணாரத்ன, கௌஷானி நுத்யாங்கனா, ஹர்ஷிதா சமரவிக்ரம, நிலக்ஷி டி சில்வா, ரஸ்மிகா செவ்வந்தி, கவிஷா டில்ஹாரி, தெவ்மி விஹங்கா, மல்கி மதாரா, மிதலி அயோத்யா, இனோகா ரணவீர, சுகந்திகா குமாரி, நிமேஷா மதுஷானி.
போட்டி அட்டவணை:
ஒருநாள் தொடர்:
- ஏப்ரல் 20: முதலாவது ஒருநாள் போட்டி (பகல் போட்டி)
- ஏப்ரல் 22: இரண்டாவது ஒருநாள் போட்டி (பகல் போட்டி)
- ஏப்ரல் 25: மூன்றாவது ஒருநாள் போட்டி (பகல் போட்டி)
T20I தொடர்:
- ஏப்ரல் 28: முதலாவது T20I போட்டி
- ஏப்ரல் 30: இரண்டாவது T20I போட்டி
- மே 02: மூன்றாவது T20I போட்டி
>>மேலும் கிரிக்கெட் செய்திகளைப் படிக்க<<
