ශ්‍රී ලංකා වයස අවුරුදු 17න් පහළ කණ්ඩායම සහ බංග්ලාදේශ වයස අවුරුදු 17න් පහළ කණ්ඩායම අතර පැවැති පළමු තුන් දින ක්‍රිකට් තරගයෙන් ලකුණු 27ක ජයග්‍රහණයක් ලබා ගැනීමට බංග්ලාදේශ වයස අවුරුදු 17න් පහළ ක්‍රීඩකයෝ සමත් වූවා.
Sher-e-Bangla ජාතික ක්‍රිකට් ක්‍රීඩාංගණයේ දී පැවැති මෙම තරගයේ තෙවැනි දිනය වූ අද (29) ආරම්භ වෙන්නේ බංග්ලාදේශ වයස අවුරුදු 17න් පහළ ක්‍රීඩකයෝ තම දෙවැනි ඉනිමට කඩුලු 8ක් දැවී ලකුණු 230ක් ලබා සිටියදීයි.
අද ඔවුන්ගේ ඉනිමට ලකුණු 2ක් පමණක් එක් වෙද්දී පෙර දිනයේ දැවැන්ත ඉනිමක් ගොඩ නැගූ Junayed Hossain දැවී යනවා. ඔහුට අද දවසේ දී කිසිදු ලකුණක් ලබා ගැනීමට හැකි වෙන්නෙ නැහැ. ඒ අනුව ඔහුගේ ඉනිම පන්දු 219ක දී අවසන් වෙන අතර ඒ වෙද්දී ඔහු හතරේ පහර 4ක් සහ හයේ පහරක් සමඟින් ලකුණු 87ක් ලබා සිටියා.
ඊට අමතර ව Md Nubayet Alam පන්දු 24කට මුහුණ දෙමින් හතරේ පහරක් සමඟින් ලකුණු 14ක් ලබා ගත්තා.
කඩුලු දවා ගැනීමේ දී පෙර දිනයේ බංග්ලාදේශ වයස අවුරුදු 17න් පහළ කණ්ඩායමේ දැවී ගිය කඩුලු 6ක් ම දවා ගැනීමේ ගෞරවය හිමිකර ගත්, වමතින් දඟ පන්දු යැවූ හිමරු දේශාන් ට අද එකඳු හෝ කඩුල්ලක් දවා ගැනීමට හැකි වූයේ නැහැ. දැවී ගිය අනෙකුත් කඩුලු අතුරින් ගිම්හාන් මෙන්ඩිස් කඩුලු 2ක් ද, නඳුන් බණ්ඩාර සහ මානිත රාජක්ෂ කඩුල්ල බැගින් ද දවා ගත්තා.
- පළමු දිනයට කඩුලු 22ක් බිලිවෙයි
- බංග්ලාදේශ යෞවනයෝ ලකුණු 248ක් ඉදිරියෙන්
- 2026 T20 ලෝක කුසලානයේ තරග කාලසටහන ප්‍රකාශයට පත් කරයි!
- රෙහාන්, අරෝෂ සහ චනුල්ලා බංග්ලාදේශයට යයි
ලකුණු 265ක් පිටුපස සිටිමින් තම දෙවැනි ඉනිමට පිටියට පිවිසි ශ්‍රී ලංකා වයස අවුරුදු 17න් පහළ ක්‍රීඩකයෝ තරගය අවසන් කරන්නේ සියලුම දෙනා දැවී ලකුණු 238ක් පමණක් ලබා ගනිමිනුයි.
එම ඉනිමේ වැඩිම ලකුණුලාභියා වූයේ සනුල් වීරරත්න. ඔහු පන්දු 134කට මුහුණ දෙමින් හතරේ පහර 3ක් සමඟින් ලකුණු 61ක් ලබා ගත්තා. ඊට අමතර ව ආරම්භක පිතිකරු අරෝෂ සිතුමිණ පන්දු 42කට මුහුණ දෙමින් හතරේ පහර 4ක් සහ ශ්‍රී ලංකා ඉනිමේ එල්ල කළ එක ම හයේ පහර ද එල්ල කරමින් ලකුණු 40ක් ලබා ගත්තා.
ඊට අමතර ව ජේසන් ප්‍රනාන්දු පන්දු 37කට මුහුණ දෙමින් හතරේ පහර 2ක් සමගින් ලකුණු 22ක් ද සහ ඉනිම අවසන් වන විට ගිම්හාන් මෙන්ඩිස් පන්දු 48කට මුහුණ දෙමින් හතරේ පහරක් සමඟින් නොදැවී ලකුණු 22ක් ද ලබා සිටියා.
කඩුලු දවා ගැනීමේ දී Md. Rakibul Hossan ලකුණු 32කට කඩුලු 4ක් දවා ගනිමින් ඉනිමේ හොඳම පන්දු යැවීම වාර්තා කළ අතර ඊට අමතර ව MD Maheenujjaman Mahabir, Sahidul islam sahid සහ Md Nubayet Alam කඩුලු ද්විත්වය බැගින් දවා ගත්තා.
තරගයේ කෙටි ලකුණු පුවරුව
- බංග්ලාදේශ වයස අවුරුදු 17න් පහළ කණ්ඩායම – පළමු ඉනිම සියලුම දෙනා දැවී 120 (39.3)Lawrence Roy19, Adrito Gosh 36, Junayed Hossain 19, Md. Rakibul Hossan 20, ගිම්හාන් මෙන්ඩිස් 2/14, හිමරු දේශාන් 2/20, මානිත රාජපක්ෂ 4/29
- ශ්‍රී ලංකාවයස අවුරුදු 17න් පහළ කණ්ඩායම– පළමු ඉනිම සියලුම දෙනා දැවී 102 (27.4) සනුල් වීරරත්න 27, හිමරු දේශාන් 24, Mohammad Akash 2/33, MD Maheenujjaman Mahabir 3/22, Md Nubayet Alam 2/30, Sahidul islam sahid 2/15
- බංග්ලාදේශ වයස අවුරුදු 17න් පහළ කණ්ඩායම– දෙවැනි ඉනිම සියලුම දෙනා දැවී 247 (103.0)Kawsar Ahmed 18, Md. Rakibul Hossan 41, Junayed Hossain 87, Sourav Karmakar 25, ගිම්හාන් මෙන්ඩිස් 2/53, හිමරු දේශාන් 6/83
- ශ්‍රී ලංකා වයස අවුරුදු 17න් පහළ කණ්ඩායම – දෙවැනි ඉනිම සියලුම දෙනා දැවී238(71.4) අරෝෂ සිතුමිණ 40, ජේසන් ප්‍රනාන්දු 22, සනුල් වීරරත්න 61, ගිම්හාන් මෙන්ඩිස් නොදැවී 22, MD Maheenujjaman Mahabir 2/36, Md Nubayet Alam 2/75, Sahidul islam sahid 2/43, Md. Rakibul Hossan 4/32
බංග්ලාදේශ වයස අවුරුදු 17න් පහළ කණ්ඩායමට ලකුණු 27ක ජයක්.
දෙරට අතර පැවැත්වෙන 2 වැනි තුන් දින ක්‍රිකට් තරගය දෙසැම්බර් මස 2 වැනිදා සිට 4 වැනිදා දක්වා Bashundra හි දී පැවැත්වීමට නියමිතයි.
දෙස් විදෙස් ක්‍රීඩා පිටියේ උණුසුම් පුවත් දැන ගැනීමට රැදී සිටින්න ThePapare.com අප සමඟ ම.
>> තවත් ක්‍රිකට් පුවත් සඳහා පිවිසෙන්න <<
