இலங்கைக்கு எதிரான முத்தரப்பு ஒருநாள் தொடர் முதல் போட்டியில் முதலில் துடுப்பெடுத்தாடிய பாகிஸ்தான் அணி, 49.5 ஓவர்களில் அனைத்து விக்கெட்டுகளையும் இழந்து 305 ஓட்டங்களைப் பெற்றுள்ளது.
இலங்கை – பாகிஸ்தான் அணிகள் இடையிலான T20 தொடரினை அடுத்து தற்போது அங்கே மூன்று போட்டிகள் கொண்ட ஒருநாள் தொடர் இடம்பெறுகின்றது.
>>பாகிஸ்தான் ஒருநாள் தொடரில் இருந்து விலகும் பெதும் நிஸ்ஸங்க<<
ராவல்பிண்டியில் ஆரம்பமாகிய இந்த ஒருநாள் தொடரின் முதல் போட்டியில் இலங்கை அணியின் தலைவர் குசல் மெண்டிஸ் நாணய சுழற்சியில் வென்று முதலில் துடுப்பாடும் சந்தர்ப்பத்தினை பாகிஸ்தான் அணிக்கு வழங்கியிருந்தார்.
பின்னர் இப்போட்டியில் நாணய சுழற்சி முடிவுகளுக்கு அமைய முதலில் துடுப்பாடிய பாகிஸ்தான் அணிக்கு ஆரம்ப வீரர்களாக வந்த பகர் ஷமான் 16 ஓட்டங்களுடனும், சயீம் அய்யூப் 7 ஓட்டங்களுடனும் டில்ஷான் மதுஷங்கவின் பந்துவீச்சில் ஆரம்பத்திலேயே ஆட்டமிழந்தனர். எனினும் பின்னர் இணைந்த பாபர் அசாம் 57 பந்துகளில் 45 ஓட்டங்களையும், சாட் பயிக் 40 பந்துகளில் 39 ஓட்டங்களையும் எடுத்து அணியை மீட்டெடுத்தனர். 74 ஓட்டங்கள் வரை இணைப்பாட்டம் பெறப்பட்ட இவ்விருவரின் விக்கெட்டுக்களையும் எஷான் மாலிங்க வீழ்த்தினார்.
மத்திய வரிசையில் அபாரமாக துடுப்பெடுத்தாடிய சல்மான் அலி அகா நிதானமாக தொடங்கிய போதும் பின்னர் அதிரடி காட்டி 90 பந்துகளில் 10 பெளண்டரிகள் மற்றும் ஒரு சிக்ஸருடன் 107 ஓட்டங்கள் குவித்து அணியின் ஓட்ட எண்ணிக்கையை வலுப்படுத்தினார். அவருக்கு ஒத்துழைப்பு அளித்த ஹசன் நவாஸ் 37 ஓட்டங்களையும், அரபாத் மின்ஹாஸ் 18 ஓட்டங்களையும் சேர்த்தனர்.
பின்னர் முதல் இன்னிங்ஸ் இறுதிக் கட்டத்தில் இலங்கை அணியின் வேகப்பந்துவீச்சாளர்கள் நெருக்கடி வழங்க பாகிஸ்தான் அணியானது 49.5 ஓவர்களில் அனைத்து விக்கெட்டுக்களையும் இழந்து 305 ஓட்டங்கள் எடுத்தது.
இலங்கை பந்துவீச்சில் தரப்பில் எஷான் மாலிங்க 4 விக்கெட்டுகளையும், அசித பெர்னாண்டோ 3 விக்கெட்டுகளையும், டில்ஷான் மதுஷங்க 2 விக்கெட்டுகளையும் கைப்பற்றினர்.
