சுற்றுலா நியூஸிலாந்து A அணிக்கு எதிராக நடைபெறவுள்ள இரண்டு வகை கிரிக்கெட் தொடர்களுக்கான இலங்கை A குழாத்தில் தமிழ் யூனியன் கழக வீரரும், யாழ்ப்பாணம் மத்திய கல்லூரியின் பழைய மாணவருமான விஜயகாந்த் வியாஸ்காந்த், யாழ்ப்பாணம் ஹாட்லி கல்லூரியின் முன்னாள் வீரரும் தற்போது மருதானை புனித சூசையப்பர் கல்லூரி வீரருமான விக்னேஷ்வரன் ஆகாஷ், BRC கழக வீரரும் கண்டி மதீனா கல்லூரியின் பழைய மாணவருமான மொஹமட் ஷிராஸ் ஆகியோர் உள்வாங்கப்பட்டுள்ளனர்
இதில் இலங்கை கிரிக்கெட்டின் எதிர்கால நம்பிக்கையாகப் பார்க்கப்படும் இளம் வீரர்களில் ஒருவரான விக்னேஷ்வரன் ஆகாஷ் தற்போது இலங்கை A அணியில் இடம்பிடித்து ஒரு வரலாற்றுச் சாதனையைப் படைத்துள்ளார்.
அண்மைக்காலமாக இலங்கை 19 வயதுக்குட்பட்ட அணியில் திறமைகளை வெளிப்படுத்தி வருகின்ற 17 வயது இடதுகை லெக் ஸ்பின் சுழல்பந்து வீச்சாளரான விக்னேஷ்வரன் ஆகாஷ், முதல் தடவையாக இலங்கை A அணிக்காக உள்வாங்கப்பட்டுள்ளமை மற்றுமொரு சிறப்பம்சமாகும்.
கடந்த ஆண்டின் இறுதியில் இலங்கை 19 வயதுக்குட்பட்ட அணி மேற்கிந்தியத் தீவுகளுக்கு சுற்றுப்பயணம் மேற்கொண்டது. 7 போட்டிகள் கொண்ட இளையோர் ஒருநாள் தொடரில், ஆகாஷ் 20 விக்கெட்டுகளை வீழ்த்தி அசத்தியிருந்தார். அதன் பிறகு இந்த ஆண்டு முற்பகுதியில் ஐசிசி இளையோர் ஒருநாள் உலகக் கிண்ணத்திலும் இலங்கை அணிக்காக ஆடி பந்துவீச்சில் திறமைகளை வெளிப்படுத்தியிருந்தார்.
இறுதியாக, கடந்த மாதம் நடைபெற்ற புனித பேதுரு கல்லூரி அணிக்கெதிராக 92ஆவது புனிதர்களின் மாபெரும் கிரிக்கெட் சமரில் புனித சூசையப்பர் கல்லூரி அணிக்காக ஆடிய ஆகாஷ், 10 விக்கெட்டுகளை வீழ்த்தியிருந்தமை குறிப்பிடத்தக்கது.
அதேபோல, வடக்கின் மற்றுமொரு நம்பிக்கை சுழல்பந்து வீச்சாளரான விஜயகாந்த் வியாஸ்காந்தும் இலங்கை A அணிக்காக அழைக்கப்பட்டுள்ளார். உள்ளூர் கழக மட்டப் போட்டிகளில் தொடர்ச்சியாக ஆடி திறமைகளை வெளிப்படுத்தி வருகின்ற 24 வயதான வியாஸ்காந்த், இறுதியாக இலங்கை கிரிக்கெட் நிறுவனத்தினால் நடத்தப்பட்ட மேஜர் கழகங்களுக்கிடையிலான 3 நாள் கிரிக்கெட் தொடரில் தமிழ் யூனியன் கழகத்துக்காக 8 போட்டிகளில் ஆடி 27 விக்கெட்டுகளை வீழ்த்தியிருந்தார். அதற்கு முன் கடந்த நவம்பர் பாகிஸ்தானில் நடைபெற்ற முக்கோண T20 தொடரில் ஒரு போட்டியிலும் இலங்கை அணிக்காக ஆடி இருந்தமை குறிப்பிடத்தக்கது.
- இலங்கை இளையோர் மகளிர் அணியை வழிநடத்தும் சமோதி
- 2024ஆம் ஆண்டின் பின்னர் நியூசிலாந்து அணிக்குத் திரும்பும் சுழல்வீரர்
- ஜூன் மாதம் மேற்கிந்திய தீவுகள் செல்லும் இலங்கை கிரிக்கெட் அணி
இதனிடையே, உள்ளூர் கழக மட்டப் போட்டிகளில் தொடர்ச்சியாக ஆடி திறமைகளை வெளிப்படுத்தி இலங்கை அணிக்காக இதுவரை 2 ஒருநாள் போட்டிகளிலும், இலங்கை A அணியின் நிரந்தர வேகப்பந்து வீச்சாளரக இடம்பிடித்து அண்மைக்காலங்களில் அனைவரது கவனத்தைப் பெற்றுக்கொண்டவருமான 31 வயதுடைய மொஹமட் சிராஸ், நியூசிலாந்து A அணிக்கெதிரான இலங்கை குழாத்தில் தனது இடத்தை தக்கவைத்துக் கொண்டுள்ளார்.
இவர் அண்மையில் நிறைவுக்கு வந்த மேஜர் கழகங்களுக்கிடையிலான 3 நாள் கிரிக்கெட் தொடரில் BRC கழகத்துக்காக 8 போட்டிகளில் ஆடி 28 விக்கெட்டுகளை வீழ்த்தியிருந்தார். இதில் 3 போட்டிகளில் 5 விக்கெட் குவியலையும் அவர் பதிவு செய்திருந்தமை குறிப்பிடத்தக்கது.
இதேவேளை, நியூசிலாந்து A அணிக்கெதிராக நடைபெறவுள்ள இரண்டு போட்டிகள் கொண்ட உத்தியோகப்பற்றற்ற நான்கு நாள் டெஸ்ட் தொடருக்கான இலங்கை A அணியின் தலைவராக பசிந்து சூரியபண்டார நியமிக்கப்பட்டுள்ளார். மறுபுறுத்தில், அந்த அணியுடனான ஒருநாள் கிரிக்கெட் தொடருக்கான இலங்கை A அணியின் தலைவராக சகலதுறை வீரர் சஹான் ஆராச்சிகே நியமிக்கப்பட்டுள்ளார்.
இந்த இரண்டு வகை தொடர்களுக்காகவும் அறிவிக்கப்பட்டுள்ள 26 பேர் கொண்ட குழாத்தில் டெஸ்ட் வீரர்களான ரமேஷ் மெண்டிஸ் மற்றும் லஹிரு குமார ஆகியோர் பெயரிடப்பட்டுள்ளனர். அத்துடன், அண்மையில் நிறைவடைந்த மேஜர் கழகங்களுக்கிடையிலான 3 நாள் கிரிக்கெட் தொடரில் அதிக ஓட்டங்களைப் பெற்ற NCC அணியின் லஹிரு உதார (10 போட்டிகளில் 908 ஓட்டங்கள்) மற்றும் அதிக விக்கெட்டுகளை வீழ்த்திய பொலிஸ் அணியின் டிலும் சுதீர (10 போட்டிகளில் 61 விக்கெட்டுகள்) ஆகியோரும் இந்த அணியில் உள்வாங்கப்பட்டுள்ளனர்.
மூன்று போட்டிகளைக் கொண்ட ஒருநாள் கிரிக்கெட் தொடர் காலி சர்வதேச கிரிக்கெட் மைதானத்தில் ஞாயிற்றுக்கிழமை (05) நடைபெறவுள்ள முதலாவது போட்டியுடன் ஆரம்பமாகிறது. அடுத்த இரண்டு ஒருநாள் போட்டிகளும் ஹம்பாந்தோட்டை மஹிந்த ராஜபக்ஷ சர்வதேச கிரிக்கெட் மைதானத்தில் ஏப்ரல் 8ஆம், 11ஆம் திகதிகளில் நடைபெறும்.
இதே மைதானத்தில் ஏப்ரல் 16ஆம் திகதியிலிருந்து 19ஆம் திகதிவரை முதலாவது நான்கு நாள் கிரிக்கெட் போட்டியும், 23ஆம் திகதியிலிருந்து 26ஆம் திகதிவரை இரண்டாவது நான்கு நாள் போட்டியும் நடைபெறவுள்ளன.
இலங்கை A குழாம்:
பசிந்து சூரியபண்டார (4 நாள் கிரிக்கெட் இலங்கை A அணித் தலைவர்), சஹான் ஆராச்சிகே (ஒருநாள் கிரிக்கெட் இலங்கை A அணித் தலைவர்), கமில் மிஷார, லசித் குரூஸ்புள்ளே, நிஷான் மதுஷ்க, லஹிரு உதார, கவிஜ கமகே, பவன் ரத்நாயக்க, நுவனிது பெர்னாண்டோ, அஹான் விக்ரமசிங்க, சொனால் தினுஷ, சொஹான் டி லிவேரா, மிலான் ரத்நாயக்க, ரவிந்து பெர்னாண்டோ, சாமிக்க ஹீனட்டிகல, வனுஜ சஹன், விஜயகாந்த் வியாஸ்காந்த், ட்ரவிஸ் மெத்யூஸ், விக்னேஷ்வரன் ஆகாஷ், ரமேஷ் மெண்டிஸ், டிலும் சுதீர, இஸித்த விஜேசுந்தர, லஹிரு குமார, துலாஜ் சமுதித்த, ப்ரமோத் மதுஷான், மொஹமத் ஷிராஸ், டில்ஷான் மதுஷன்க, துவிந்து ரணதுங்க.
>>மேலும் கிரிக்கெட் செய்திகளைப் படிக்க<<
