பங்களாதேஷ் அணிக்கு எதிராக நடைபெறவுள்ள மூன்று போட்டிகள் கொண்ட ஒருநாள் தொடருக்கான பாகிஸ்தான் குழாம் உத்தியோகபூர்வமாக அறிவிக்கப்பட்டுள்ளது.
இதில் தற்போது இந்தியா மற்றும் இலங்கையில் நடைபெற்று வருகின்ற ஐசிசி T20 உலகக் கிண்ணத்தில் பெரிதும் பிரகாசிக்கத் தவறிய அனுபவ வீரர் பாபர் அசாம் மற்றும் ஆரம்ப துடுப்பாட்ட வீரர் சயீம் அய்யூப் ஆகிய இருவரும் பாகிஸ்தான் ஒருநாள் குழாத்திலிருந்து நீக்கப்பட்டுள்ளனர். இவர்களது நீக்கத்திற்குக் காரணம், T20 உலகக் கிண்ணத்தில் அவர்களின் மோசமான செயல்பாடு என தெரிவிக்கப்படுகின்றது. குறிப்பாக, இலங்கை அணிக்கு எதிரான சுப்பர் 8 போட்டியில் கூட இருவரும் இறுதிப் பதினொருவர் அணியிலிருந்து நீக்கப்பட்டு இருந்தனர்.
இந்த நிலையில், பாகிஸ்தான் ஒருநாள் அணியில் ஆறு புதுமுக வீரர்களுக்கு வாய்ப்பளிக்கப்பட்டுள்ளது. இதில் இம்முறை T20 உலகக் கிண்ணத்தில் அதிக ஓட்டங்கள் குவித்த சாகிப்சாதா ஃபர்ஹான் பாகிஸ்தான் அணிக்காக ஒருநாள் போட்டியில் அறிமுகமாகவுள்ளார்.
இதுதவிர, 28 வயது துடுப்பாட்ட வீரர் அப்துல் ஸமத், 20 வயது துடுப்பாட்ட சகலதுறை வீரர் மாஸ் சதாக்கத், 22 வயது விக்கெட் காப்பு துடுப்பாட்ட வீரர் மொஹம்மட் காஸி கோரி, 21 வயது சகலதுறை வீரர் சாத் மசூத், 21 வயது ஆரம்ப துடுப்பாட்ட வீரர் ஷமில் ஹுசைன் ஆகியோரும் இடம்பெற்றுள்ளனர். இவர்கள் தற்போது அபுதாபியில் நடைபெற்று வருகின்ற இங்கிலாந்து லயன்ஸுக்கு எதிராக பாகிஸ்தான் ஷஹீன்ஸ் அணிக்காக விளையாடி இருந்தமை குறிப்பிடத்தக்கது.
- பாகிஸ்தானிடம் போராடித் தோற்ற இலங்கை; தசுன், பவான் அதிரடி வீண்
- இலங்கை – ஆப்கானிஸ்தான் தொடருக்கான போட்டி அட்டவணை வெளியானது
- இந்தியா – பாகிஸ்தான் போட்டி தொடர்பில் வெளியான முக்கிய அறிவிப்பு
பங்களாதேஷ் அணிக்கெதிரான ஒருநாள் தொடருக்காக அறிவிக்கப்பட்டுள்ள குழாத்தில் சஹீன் அப்ரிடி தலைவராக தொடர, மொஹமட் ரிஸ்வான் விக்கெட் காப்பாளராக நீடிக்கிறார். இதனிடையே, இறுதியாக நடைபெற்ற இலங்கை அணிக்கெதிராக ஒருநாள் தொடரில் ஆடிய ஃபக்கர் ஜமான், ஹசீபுல்லாஹ், மொஹமட் நவாஸ், வேகப்பந்து வீச்சாளர் நசீம் ஷா ஆகியோரும் பாகிஸ்தான் ஒருநாள் அணியிலிருந்து நீக்கப்பட்டுள்ளனர்.
இதனிடையே, அப்ரார் அஹ்மட், ஃபஹீம் அஷ்ரப், பைசல் அக்ரம், ஹரிஸ் ரவூப், ஹுசைன் தலத், மொஹமட் வசீம் ஜூனியர், சல்மான் அலி ஆகா போன்ற முக்கிய வீரர்கள் தங்கள் இடங்களைத் தக்கவைத்துக் கொண்டனர்.
சுற்றுலா பாகிஸ்தான் – பங்களாதேஷ் அணிகள் மோதும் ஒருநாள் தொடர் இம்மாதம் 11, 13 மற்றும் 15 ஆகிய திகதிகளில் டாக்காவில் நடைபெறவுள்ளது.
பாகிஸ்தான் ஒருநாள் குழாம்:
சஹீன் ஷா அப்ரிடி (தலைவர்). அப்துல் ஸமத், அப்ரார் அஹ்மட், பஹீம் அஷ்ரப், பைசல் அக்ரம், ஹரிஸ் ரவூப், ஹூசைன் தலாத். மாஸ் சதாக்கத், மொஹமட் ரிஸ்வான். மொஹமட் வசீம் ஜுனியர், காஸி கோரி, சாத் மசூத், சஹிப்சதா பர்ஹான், சல்மான் அலி ஆகா, ஷமில் ஹூசைன்.
>> மேலும் கிரிக்கெட் செய்திகளைப் படிக்க <<
