அயர்லாந்து, இங்கிலாந்து டெஸ்ட் தொடர்களுக்கான நியூசிலாந்து குழாம் வெளியீடு

அயர்லாந்துக்கு எதிரான ஒரு டெஸ்ட் மற்றும் இங்கிலாந்துக்கு எதிரான மூன்று போட்டிகள் கொண்ட டெஸ்ட் தொடர்களில் பங்கெடுக்கும் நியூசிலாந்து ஆடவர் கிரிக்கெட் குழாம் வெளியிடப்பட்டுள்ளது.

>>LPL தொடர் 2026; வெளிநாட்டு வீரர்களுக்கான பதிவு விபரம் வெளியீடு<<

19 பேர் கொண்ட இந்த நியூசிலாந்து அணிக்குழாத்தில் வேகப்பந்து வீச்சாளர்களான கைல் ஜேமிசன் மற்றும் வில் ஓ’ரூர்க்கே ஆகியோர் மீண்டும் இடம்பிடித்துள்ளமை குறிப்பிடத்தக்க வியடமாகும்.

இதில் கடந்த 2024ஆம் ஆண்டின் பெப்ரவரி மாதம் ஏற்பட்ட முதுகு உபாதையினால் நீண்ட இடைவெளி காரணமாக டெஸ்ட் போட்டிகளில் ஆடாதிருந்த கைல் ஜேமிசன், இரண்டு ஆண்டுகளுக்குப் பிறகு டெஸ்ட் அரங்கிற்குத் திரும்புகின்றமை குறிப்பிடத்தக்க விடயமாகும்.

வெறும் 19 டெஸ்ட் போட்டிகளில் மாத்திரம் விளையாடியுள்ள ஜேமிசன் 19 என்கிற பந்துவீச்சு சராசரியுடன் 80 விக்கெட்டுகளை வீழ்த்தியுள்ளமை சுட்டிக்காட்டத்தக்கது. அதேபோல் உபாதையில் இருந்து மீண்டுள்ள 24 வயது வீரர் வில் ஓ’ரூர்க்கேவின் மீள்வருகையும் நியூசிலாந்து அணிக்கு பலமாக அமைகின்றது.

>>T20I தொடரில் பங்களாதேஷை வைட்வொஷ் செய்த இலங்கை மகளிர்<<

மறுமுனையில் நியூசிலாந்து அணியில் மேட் ஹென்ரி, ஜேக் போல்க்ஸ், நதன் ஸ்மித் மற்றும் ப்ளையர் டிக்னர் ஆகிய வேகப்பந்துவீச்சாளர்களும் இடம்பெற்றுள்ளனர்.

உள்ளூர் போட்டிகளில் சிறப்பான அடைவுகளை வெளிப்படுத்திய டீன் பொக்ஸ்கிராப்ட் அறிமுக வீரராக அணியில் இடம்பிடித்துள்ளமையும் குறிப்பிடத்தக்கது.

டொம் லேதம் தலைமையிலான அணியில் டொம் பிளண்டல், டெவோன் கொன்வேய் மற்றும் கேன் வில்லியம்சன் ஆகியோர் முக்கிய துடுப்பாட்டப் பலமாக அமைகின்றமை சுட்டிக்காட்டத்தக்கது.

நியூசிலாந்து அணியானது மே 27ஆம் திகதி தமது இந்த சுற்றுப்பயணத்தின் முதல் டெஸ்ட் போட்டியில் அயர்லாந்தினை பெல்பஸ்ட் நகரில் வைத்து சந்திக்கின்றது. இந்த டெஸ்ட் போட்டி நான்கு நாட்கள் கொண்டதாக அமைந்திருக்கின்றமை குறிப்பிடத்தக்க விடயமாகும். அதன் பின்னர் ஜூன் 4ஆம் திகதி தொடக்கம் இங்கிலாந்துடனான மூன்று போட்டிகள் கொண்ட டெஸ்ட் தொடர் ஆரம்பமாகுகின்றது.

நியூசிலாந்து டெஸ்ட் குழாம்

 

டொம் லேதம் (தலைவர்), டொம் ப்ளண்டல் (விக்கெட்காப்பாளர்), கிறிஸ்டியன் கிளார்க் (அயர்லாந்து தொடர் மட்டும்), டெவோன் கொன்வே, ஜேக் போல்க்ஸ், டீன் பொக்ஸ்கிராப்ட், மேட் ஹென்றி, கைல் ஜேமிசன், டேரைல் மிச்செல், ஹென்ரி நிகோல்ஸ், வில் ஓ‘ரூர்க்கே, கிளன் பிலிப்ஸ், மைக்கேல் ரேய் (அயர்லாந்து தொடர் மட்டும்), ரச்சின் ரவீந்திரா, பென் சீயர்ஸ்(அயர்லாந்து தொடர் இங்கிலாந்து தொடரில் மேலதிக வீரர்), நதன் ஸ்மித், ப்ளையர் டிக்னர், கேன் வில்லியம்சன், வில் யங் (அயர்லாந்து தொடர் மட்டும்)

>>மேலும் கிரிக்கெட் செய்திகளைப் படிக்க<<