சுற்றுலா நியூசிலாந்து மற்றும் இலங்கை A கிரிக்கெட் அணிகள் இடையிலான முதலாவது நான்கு நாட்கள் கொண்ட முதல்தரப் போட்டி சமநிலை முடிவினை எட்டியிருக்கின்றது.
சுற்றுலா நியூசிலாந்து A கிரிக்கெட் அணி மற்றும் இலங்கை கிரிக்கெட் அணிகள் இடையிலான ஓருநாள் தொடரினை அடுத்து, நான்கு நாட்கள் கொண்ட முதல்தரப் போட்டிகள் கொண்ட தொடர் ஒழுங்கு செய்யப்பட்டிருக்கின்றது.
>>சர்பராஸ் அஹ்மட்டுக்கு பாகிஸ்தான் அணியில் முக்கிய பதவி<<
அதன்படி இரு போட்டிகள் கொண்ட தொடரின் முதல் போட்டி கடந்த வியாழன் (16) ஹம்பந்தோட்டையில் ஆரம்பமாகியது. இந்தப் போட்டியின் நாணய சுழற்சியில் வென்ற இலங்கை A அணியினர் முதலில் துடுப்பாட்டத்தினை தெரிவு செய்ததோடு, முதலில் துடுப்பாடி முதல் இன்னிங்ஸில் 97.5 ஓவர்களுக்கு அனைத்து விக்கெட்டுக்களையும் இழந்து 381 ஓட்டங்கள் பெற்றனர்.
இலங்கை A தரப்பிற்கு மோசமான ஆரம்பம் கிடைத்த போதும் மத்திய வரிசை வீரராக களமிறங்கியிருந்த சொனல் தினுஷ ஒரு சிக்ஸர் மற்றும் 9 பௌண்டரிகள் அடங்கலாக 108 ஓட்டங்கள் பெற்றார். அதேவேளை லஹிரு உதார 61 ஓட்டங்கள் எடுத்திருந்தார்.
நியூசிலாந்து A அணியின் பந்துவீச்சில் டிம் பிரிங்கில் 3 விக்கெட்டுக்களையும் ரயான் ஹர்ரிசன் மற்றும் பீட்டர் யங்ஹஸ்பன்ட் தலா 2 விக்கெட்டுக்கள் வீதமும் சுருட்டியிருந்தனர்.
பின்னர் தமது முதல் இன்னிங்ஸ் துடுப்பாட்டத்தினை ஆரம்பம் செய்த நியூசிலாந்து A கிரிக்கெட் அணியானது ஹேர்டிஸ் ஹீப்பி மற்றும் டிம் ரொபின்சன் ஆகியோரது அபார சதங்களோடு முதல் இன்னிங்ஸில் 479 ஓட்டங்கள் பெற்றது.
>>இலங்கை மகளிர் கிரிக்கெட் அணியில் இடம்பிடித்த பாடசாலை மாணவி மிதலி<<
நியூசிலாந்து A அணியின் துடுப்பாட்டம் சார்பில் ஹேர்டிஸ் ஹீப்பி 162 ஓட்டங்கள் எடுக்க டிம் ரொபின்சன் 130 ஓட்டங்கள் பெற்றிருந்தார். இலங்கை பந்துவீச்சில் இசித விஜேசுந்தர, ரமேஷ் மெண்டிஸ் மற்றும் சொனால் தினுஷ ஆகியோர் தலா 2 விக்கெட்டுக்கள் வீதம் கைப்பற்றினர்.
பின்னர் 98 ஓட்டங்கள் பின்தங்கி இரண்டாம் இன்னிங்ஸ் துடுப்பாட்டத்தினை ஆரம்பம் இலங்கை A அணியானது போட்டியின் நான்காம் நாள் ஆட்டநேரம் நிறைவுக்கு வந்து போட்டி சமநிலை அடையும் போது 49 ஓவர்களில் 4 விக்கெட்டுக்களை இழந்து 168 ஓட்டங்கள் பெற்றிருந்தது.
இலங்கை A அணியின் இரண்டாம் இன்னிங்ஸ் துடுப்பாட்டத்தில் நுவனிது பெர்னாண்டோ ஆட்டமிழக்காது 50 ஓட்டங்கள் பெற்றிருந்தார். அதேவேளை டிம் பிரிங்கில் நியூசிலாந்து A அணிக்காக இம்முறை 3 விக்கெட்டுக்களைச் சாய்த்திருந்தார்.
ஸ்கோர் சுருக்கம்
இலங்கை A அணி: 381 (97.5) சொனல் தினுஷ 108, லஹிரு உதார 61, ரமேஷ் மெண்டிஸ் 48, டிம் பிரிங்கில் 3/88 & 168/4 (49), நுவனிது பெர்னாண்டோ 50*, லஹிரு உதார 39, டிம் பிரிங்கில் 3/50.
நியூசிலாந்து A – 479 (153.4) ஹேர்டிஸ் ஹீப்பி 162, டிம் ரொபின்சன் 130, பிரேசர் ஷீட் 61*, இசித விஜேசுந்தர 2/56, சொனல் தினுஷ 2/72, ரமேஷ் மெண்டிஸ் 2/105
முடிவு – போட்டி சமநிலை அடைந்தது
>>மேலும் கிரிக்கெட் செய்திகளைப் படிக்க<<
